ޓޫރިސްޓު ފެސިލިޓީތަކުން ރާއްޖޭގެ ބޭންކުތަކަށް ޑޮލަރު މާރު ކުރަން މަޖުބޫރުކޮށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވައިލި ބޭރު ފައިސާ މާރުކުރުމުގެ ގަވާއިދުގެ ދަށުން 40 އާއި 30 މިލިއަން ޑޮލަރާ ދެމެދުގެ އަދަދެއް ބޭންކުތަކަށް މާރު ކުރާނެ ކަމަށް ބެލެވޭ ކަމަށް އެމްއެމްއޭއިން ބުނެފި އެވެ.

ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރު ކުރަން މަޖުބޫރުކޮށް އެމްއެމްއޭ އިން ބޭރު ފައިސާގެ ގަވާއިދަށް ބަދަލު ގެނައީ މިދިޔަ އޮކްޓޯބަރު 1، ގަ އެވެ. އެ ގަވާއިދަށް މިމަހު 1، އިން ފެށިގެން އަމަލު ކުރުން ލާޒިމުވާނެ އެވެ.

Advertisement

އެކަމާ ގުޅޭގޮތުން "އަދަދު" އިން ސުވާލުކުރުމުން އެމްއެމްއޭގެ އޮފިޝަލެއް ބުނީ އެ ގަވާއިދުގެ ދަށުން ރެޖިސްޓްރީ ކުރި 175 ރިސޯޓުގެ ތެރެއިން 138 ރިސޯޓެއްގެ މިދިޔަ އޮކްޓޫބަރުމަހުގެ ސޭލްސް ރިޕޯޓު ލިބިފައިވާ ކަމަށެވެ. 40 މިލިއަނެއްހައި ޑޮލަރު މާރު ކުރާނެ ކަމަށް ބެލެވެނީ އެ ރިޕޯޓުތަކަށް ބެލުމަށްފަހު ކަމަށް އޭނާ ބުންޏެވެ.

"ސޭލްސް ރިޕޯޓު ނުލިބެނީ 37 ރިސޯޓްގެ، މިހައިތަނަށް ހުށަހަޅާފައިވާ ސޭލްސް ރިޕޯޓޫތަކަށް ބަލާއިރު 30 މިލިއަން ޑޮލަރާއު 40 މިލިއަން ޑޮލަރާއި ދެމެދުގެ އަދަދެއް ބޭރު ފައިސާ މާރު ކުރުމުގެ ގަވާއިދުގެ ސަބަބުން ބޭންކުތަކަށް މާރު ކުރެވިގެން ދާނެ ކަމަށް ލަފާ ކުރެވޭ،" އެމްއެމްއޭގެ އޮފިޝަލް ބުންޏެވެ.

ބޭރު ފައިސާ މާރު ކުރުމާބެހޭ ގަވާއިދުގެ ދަށުން ބޭންކުތަކަށް ޑޮލަރު މާރު ކުރަންޖެހޭ އެންމެ ފަހު ތާރީހަކީ ކޮންމެ މަހެއްގެ ވެސް 28 އެވެ. އެ ގަވާއިދުގެ ދަށުން ރާއްޖޭގައި ކުރާ ހުރިހާ މުއާމަލާތެއް ކުރަން ވާނީ ދިވެހި ރުފިޔާއިންނެވެ.

Advertisement

މިހެން ނަމަވެސް ބޭރު ފައިސާ ލިބޭ ވިޔަފާރިތަކަށް ގިނަ އިސްތިސްނާތަކެއް އެ ގަވާއިދުގެ ތެރެއިން ލިބިފައިވެ އެވެ. އެއީ:

• ގާނޫނެއް ނުވަތަ ގަވާއިދެއްގެ ދަށުން ސަރުކާރަށް ނުވަތަ ދައުލަތަށް ދެއްކުމަށް ހޭދަކުރާ ފައިސާ
• ބޭންކުތަކާއި ފައިނޭންސިން ކުންފުނިތަކުން ދޭ ހިދުމަތްތަކާ ގުޅިގެން ކަސްޓަމަރާ ދެމެދު ކުރެވޭ މުއާމަލާތްތައް
• ރެމިޓެންސް ހިދުމަތްދޭ ވިޔަފާރިތަކާއި އެ ވިޔަފާރިތަކުން ކަސްޓަމަރުންނާ ކުރާ މުއާމަލާތްތައް
• ޓޫރިޒަމް ދާއިރާގައި މުދަލާއި ހިދުމަތްދޭ ވިޔަފާރިތަކަށް އިންޝުއަރެންސް ކުންފުނިތަކާ ދެމެދު ކުރެވޭ މުއާމަލާތްތައް
• ބައިނަލްއަގުވާމީ މުއާމަލާތްތައް
• ޓޫރިސްޓުންނަށް ވިއްކާ މުދަލާއި ހިދުމަތުގެ އަގު
• ބޭރު ފައިސާއިން އާމްދަނީ ލިބޭ ވިޔަފާރިއަކުން ގަންނަ މުދަލަކަށް ނުވަތަ ހިދުމަތަކަށް އެ ވިޔަފާރިއަކުން ބޭރު ފައިސާއިން އަގު އަދާކުރުން
• ބޭރު ފައިސާއިން އާމްދަނީ ލިބޭ ވިޔަފާރިއަކުން ބޭނުން ނަމަ ޑިވިޑެންޑް ދިނުމާއި ހިއްސާދާރުންނާ ދެމެދު ކުރެވޭ މުއާމަލާތްތައް
• ބޭރު ފައިސާއިން އާމްދަނީ ލިބޭ ވިޔަފާރިއެއްގެ ހިއްސާ ގަނެ ވިއްކުން
• ބޭރު ފައިސާއިން އާމްދަނީ ލިބޭ ވިޔަފާރިއަކުން ބޭނުން މުސާރަ އާއި އިނާޔަތް ބޭރު ފައިސާއިން ދިނުން
• ޑިއުޓީ ފްރީ ފިހާރަތަކުން ޓޫރިސްޓުންނަށް ވިއްކާ މުދަލާއި ހިދުމަތުގެ އަގު

ބޭރު ފައިސާ ގަވާއިދަށް އަމަލުކުރަން ފެށި ފަހުން ބޭރު ފައިސާ މާރުކުރުމާ ބެހޭ ގާނޫނެއް ވަނީ ވުޖޫދުކޮށްފަ އެވެ. މި ގާނޫނުގެ ދަށުން 500 ޑޮލަރު ނުވަތަ އެ މަހެއްގެ އާމްދަނީއަށް ލިބުނު 20 ޕަސެންޓު މާރުކުރުމުގެ އިހުތިޔާރު ރިސޯޓުތަކަށް ލިބެ އެވެ.