ތިން މިނިސްޓްރީއެއްގައި އަލިފާން ރޯވި ސަބަބު އަދި ނުހޯދޭ ކަމަށާއި، އެކަން ދެނެގަތުމަށް ތަހުގީގު ކުރަމުންދާ ކަމަށް ފުލުހުން ބުނެފި އެވެ.
މިދިޔަ ބުރާސްފަތި ދުވަހު ހެނދުނު އަލިފާން ރޯވެ އަނދައި އަޅިޔަށްވި ތިން މިނިސްޓްރީއަކީ ހައުސިން މިނިސްޓްރީ އާއި އިންފްރާސްޓްރަކްޗާ މިނިސްޓްރީ އަދި އެންވަޔަރަމެންޓު މިނިސްޓްރީ އެވެ. އީޕީއޭ ހިންގަމުން ދިޔައީ އަލިފާން ރޯވި، ގްރީން ބިލްޑިންގުގަ އެވެ. އަލިފާނުގެ ހާދިސާގައި ސިޓީ ކައުންސިލްގެ އިމާރާތަކަށް ވެސް ގެއްލުންވި އެވެ.
ފުލުހުންގެ މީޑިއާ އޮފިޝަލް "އަދަދު" އަށް ވިދާޅުވީ އަލިފާނުގެ ހާދިސާއާ ގުޅިގެން އެ ތަންތަނުގެ ފޮރެންސިކް ތަހުލީލުތައް ކުރަމުންދާ ކަމަށެވެ.
"މައްސަލަ ތަހުގީގު ކުރަމުންދަނީ. އެތަނުގައި ފޮރެންސިކުން ވެސް ތަހުލީލުތައް އެބަ ކުރޭ. މިހާތަނަށް ރޯވާން މެދުވެރިވި ސަބަބު ދެނެގަނެވިފައެއް ނުވޭ،" މީޑިއާ އޮފިޝަލް ވިދާޅުވި އެވެ.
އަލިފާނުގެ ހާދިސާގައި އެއްވެސް މީހަކަށް ގެއްލުން ނުވެ އެވެ. ނަމަވެސް ކްލައުޑުގައި ރައްކާކޮށްފައި ހުރި މައުލޫމާތު ފިޔަވައި، ތިން މިނިސްޓްރީ އާއި އީޕީއޭގައި ހުރި ހުރިހާ މައުލޫމާތެއް ކަހަލަ ގޮތަކަށް ވަނީ އަޅިޔަށް ވެފަ އެވެ.
އަލިފާނުގެ ހާދިސާއާ ގުޅިގެން ހިދުމަތް ހުއްޓުނު މިނިސްޓްރީތަކުގެ ހިދުމަތް ދަރުބާރުގޭގައި އަލުން ފެށުމަށް އަންނަނީ ތައްޔާރުވަމުންނެވެ.
