އިންޑިއާގެ އަސްކަރީ އުޅަނދުތައް އޮޕަރޭޓު ކުރުމަށް ތިބި އެ ގައުމުގެ ސިފައިން އަނބުރާ ފޮނުވާލުމަށް ފަހު މި ވެރިކަމުގައި ގެނައި "މަދަނީން" އަމަލުކުރަނީ ކުރިން ތިބި ސިފައިން ވެސް އަމަލުކުރި އެއްބަސްވުމަށް ކަމަށް ޑިފެންސް މިނިސްޓްރީން ބުނެފި އެވެ.
ތިން ބެޗަކަށް ބަހާލައިގެން އިންޑިއާގެ 76 ސިފައިން އަނބުރާ ގެންގޮސް ނިމުނު ކަމަށް ސަރުކާރުން ބުނީ މެއި 10، ގަ އެވެ. ބަދަލުގައި ގެނައީ އިންޑިއާގެ ސަރުކާރުން ހިންގާ ޑިފެންސް ކުންފުންޏެއް ކަމަށްވާ ހިންދުސްތާން އޭރޮނެޓިކްސް މަދަނީން ކަމަށްވެސް ސަރުކާރުން ބުނެފައިވެ އެވެ.
މިކަމާ ގުޅިގެން އެއީ މަދަނީންކަން ކަށަވަރުކުރި ގޮތާއި، އެ މީހުންގެ ތަފުސީލުތަކާއި އުޅަނދުތައް އޮޕަރޭޓުކުރުމުގާ އަމަލުކުރާ ގޮތްތައް ހޯދުމަށް، މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން "އަދަދު" އިން ވާނީ ހުށަހަޅާފަ އެވެ.
މެއި 12، ގައި ހުށަހެޅި އެ އާރުޓީއައި އަށް ޑިފެންސުން ޖަވާބު ދިނީ ޖުލައި 25، ގައި ސަރުކާރުން އަވަސް އަރުވާލައިގެން ދިން ޖަވާބުތަކުގެ ތެރެއިންނެވެ. ނަމަވެސް ގިނަ ތަފުސީލުތައް ދޭން ޑިފެންސުން ވަނީ ދެކޮޅު ހަދާފަ އެވެ.
މި ނޫހުން ހޯދަން އެދުނު މައުލޫމާތުގެ ތެރޭގައި އިންޑިއާގެ މަދަނީންނަށް ހަރަދުކުރާ ފަރާތްވެސް ހިމެނެ އެވެ. އެގޮތުން 76 މަދަނީންނަށް ހަރަދުކުރަނީ އިންޑިއާގެ ސަރުކާރުންތޯ، ދިވެހި ސަރުކާރުންތޯ ނުވަތަ އެ މީހުން ނިސްބަތްވާ ހިންދުސްތާން އޭރޮނެޓިކްސް ކުންފުނިންތޯ ވާނީ ސުވާލުކޮށްފަ އެވެ.
ޑިފެންސުން ލިޔުމުން ދިން ރަސްމީ ޖަވާބުގައި ބުނީ، އެ ހަރަދުތައް ކުރަނީ ސީދާ އިންޑިއާގެ ސަރުކާރުން ކަމަށެވެ. އަދި, މަދަނީންވެސް އަމަލުކުރަމުން ދަނީ އުޅަނދުތައް އޮޕަރޭޓު ކުރުމަށް އިންޑިއާ ސިފައިން ބޭތިއްބުމަށް ހަދާފައިވާ އެއްބަސްވުމަށް ކަމަށްވެސް ޑިފެންސުން ބުންޏެވެ.
"މަދަނީންވެސް އަމަލުކުރަމުންދަނީ ކުރީގެ އެއްބަސްވުމަށް ކަމުން، މި މީހުންގެ އެންމެހާ ހަރަދުތައް ބަލަހައްޓަމުން ދަނީ އިންޑިއާ ސަރުކާރުން،" މިނިސްޓްރީގެ ޖަވާބުގައި ބުންޏެވެ.
ރާއްޖޭގައި ތިބި އިންޑިއާ ސިފައިން އަމަލުކުރަމުންދިޔައީ ކުރީގެ ރައީސް އަބްދުﷲ ޔާމީނުގެ ސަރުކާރުގައި ރާއްޖެއާ އިންޑިއާއާ ދެމެދު ހެދި "ޑިފެންސް އެކްޝަން ޕްލޭން" ގެ ދަށުން ވެފައިވާ އެކި އެއްބަސްވުންތަކަށެވެ. ބެލެވޭ ގޮތުގައި ޑިފެންސުން ރިއާޔަތް ކުރަނީ އެ އެއްބަސްވުމަށެވެ.
ނަމަވެސް، އިންޑިއާ ސިފައިން ފޭބުމަށާއި މަދަނީން ގެނައުމަށް ވަކީ ލެޓާ އޮފް އެކްސްޗޭންޖެއްގައި ސޮއިކުރި ކަމަށާއި އިންޑިއާގެ މަދަނީން ރާއްޖޭގައި ތިބޭނީ އެ އެލްއޯއީގައި ވެފައިވާ އެއްބަސްވުމުގެ ދަށުން ކަމަށް ސަރުކާރުން ކުރިން ބުންޏެވެ.
އެގޮތުން ފޮރިން މިނިސްޓަރު މޫސާ ޒަމީރު، މެއި 11، ގައި ވިދާޅުވީ އެ އެލްއޯއީގެ ދަށުން އައްޑޫ އަދި ކައްދޫގައި ތިބި މަދަނީންގެ މުއްދަތު ފެބްރުއަރީ 2025، ގައި ހަމަވާނެ ކަމަށާއި ޑޯނިއާ ދުއްވާ މަދަނީންގެ މުއްދަތު ފެބްރުއަރީ 2026 ގައި ހަމަވާނެ ކަމަށެވެ. ނަމަވެސް ޑިފެންސްގެ މި ޖަވާބާއެކު މަދަނީން އަމަލުކުރަނީ ކުރީގެ އެ ވިދާޅުވި އެލްއޯއީއަށްތޯ ވަނީ ސުވާލު އުފެދިފަ އެވެ.
އަމަލުކުރާ އެއްބަސްވުމާއި ހަރަދުކުރާ ފަރާތުގެ އިތުރަށް ރާއްޖޭގައި މިހާރު ތިބި މަދަނީންގެ އިތުރު އެއްވެސް ތަފުސީލެއް ދޭން ޑިފެންސުން ވަނީ ދެކޮޅު ހަދާފަ އެވެ. އެ މިނިސްޓްރީން ދެއްކި އުޒުރުތަކަކީ އެ މައުލޫމާތުތައް ދޫކޮށްފި ނަމަ ގައުމީ ސަލާމަތައް ނުރައްކަލެއް ކުރިމަތިވުމެވެ. އަދި، ބައެއް މައުލޫމާތަކީ އެ މީހުންގެ ޒާތީ މައުލޫމާތު ކަމުން ދެވެން ނެތް ކަމަށްވެސް ޑިފެންސުން ބުނެފައިވެ އެވެ.
