އިންޑިއާގެ އެންމެ ބޮޑު އެއް ތައުލީމީ ބޯޑު ކަމަށްވާ ސެންޓްރަލް ބޯޑް އޮފް ސެކަންޑަރީ އެޑިއުކޭޝަން (ސީބީއެސްއީ) އިން ބޭއްވި ގްރޭޑް 12 ގެ އިމްތިހާނުގެ ނަތީޖާއާ ގުޅިގެން ބޮޑެތި އޮޅުންބޮޅުންތަކެއް އަރައި، މުޅި ގައުމުގައި ބޮޑު ބަހުސެއް ވަނީ ފެށިފަ އެވެ.
މި މައްސަލަ ފެންމަތިވީ ދަރިވަރަކު އޭނާގެ ފިޒިކްސް ކަރުދާހުގެ އަސްލާއި ޑިޖިޓަލްކޮށް ފެންނަން ހުރި ކަރުދާސް ދިމާނުވާ ކަމަށް ބުނެ ސޯޝަލް މީޑިއާގައި ކުރި ޝަކުވާއަކާ ގުޅިގެންނެވެ. މިހާރު މި މައްސަލަ ވަނީ އިމްތިހާނު ކަރުދާސްތައް މާކްކުރުމަށް އަލަށް ތައާރަފުކުރި ޑިޖިޓަލް ނިޒާމުގެ އިތުބާރާ މެދު ސުވާލު އުފެދޭ ހިސާބަށް ގޮސްފައެވެ.
އޮން-ސްކްރީން މާކިން (އޯއެސްއެމް) ގެ ނަމުގައި ތައާރަފުކުރި މި ނިޒާމަކީ ދަރިވަރުން ލިޔާ ކަރުދާސްތައް ސްކޭންކޮށް، އޮންލައިން ޕޯޓަލްއެއް މެދުވެރިކޮށް ޓީޗަރުންނަށް މާކްކުރެވޭ ގޮތަށް ފަރުމާކޮށްފައިވާ ނިޒާމެކެވެ. ސީބީއެސްއީން ބުނާ ގޮތުގައި މި ނިޒާމުގެ ބޭނުމަކީ އިންސާނީ ގޯސްތައް މަދުކޮށް، މާކްކުރުމުގެ މަސައްކަތް އަވަސްކުރުމެވެ. ނަމަވެސް ގިނަ އަދަދެއްގެ ދަރިވަރުން ބުނަމުންދަނީ މި ނިޒާމުގެ ސަބަބުން އިތުރު މައްސަލަތަކެއް ކުރިމަތިވެފައިވާ ކަމަށެވެ. އޭގެ ތެރޭގައި ސްކޭންކޮށްފައިވާ ކަރުދާސްތައް ފުސްވުމާއި، ބައެއް ސަފުހާތައް މަދުވުމާއި، އަދި އެއް ދަރިވަރެއްގެ ކަރުދާސް އަނެއް ދަރިވަރެއްގެ ނަމުގައި ހުރުން ފަދަ ސީރިއަސް މައްސަލަތައް ހިމެނެއެވެ.
މި މައްސަލައާ ގުޅިގެން އިންޑިއާގެ އެޑިއުކޭޝަން މިނިސްޓަރު ދަރުމެންދުރާ ޕްރަދާން ވިދާޅުވީ، މިއީ ސީބީއެސްއީން މި ނިޒާމު ބޭނުންކުރި ފުރަތަމަ ފަހަރު ކަމަށާއި، ނަތީޖާގައި ބައެއް އޮޅުންތައް ހުރިކަން ގަބޫލުކުރައްވާ ކަމަށެވެ. މިކަމުގެ ޒިންމާ އުފުއްލަވާ ކަމަށާއި، އެއްވެސް ދަރިވަރެއްގެ ޝަކުވާއަކަށް ހައްލު ނުލިބި ނުދާނެ ކަމުގެ ޔަގީންކަން މިނިސްޓަރު ވަނީ ދެއްވާފައެވެ. ނަމަވެސް އިދިކޮޅު ލީޑަރު ރާހުލް ގާންދީ ވަނީ ސަރުކާރުން ޒުވާނުންގެ މުސްތަގުބަލާ މެދު އިހުމާލުވަމުންދާ ކަމަށް ތުހުމަތުކުރައްވައި، އެޑިއުކޭޝަން މިނިސްޓަރުގެ އިސްތިއުފާއަށް ގޮވާލައްވާފައެވެ.
މި މައްސަލައިގެ ތެރެއިން އެންމެ ބޮޑު ސަމާލުކަމެއް ލިބުނީ ވޭދާންތު ސްރިވަސްތަވާ ނަމަކަށް ކިޔާ ދަރިވަރެއްގެ މައްސަލައަށެވެ. އޭނާ ބުނި ގޮތުގައި އޭނާގެ ފިޒިކްސް ކަރުދާސް އަލުން ބަލައިދިނުމަށް އެދުމުން ސީބީއެސްއީން ފޮނުވި ސްކޭން ކޮޕީއަކީ އޭނާގެ އަތުލިޔުމެއް ނޫނެވެ. އަދި އޭނާ ޖަވާބު ނުދޭ ސުވާލުތަކަކަށް އެ ކަރުދާހުގައި ޖަވާބު ދީފައި ހުރި ކަމަށްވެސް އޭނާ ބުންޏެވެ. މި ޝަކުވާ ސޯޝަލް މީޑިއާގައި ފެތުރުމާއެކު، އެތައް ހާސް ދަރިވަރުންނެއް ވަނީ އެފަދަ މައްސަލަތައް ހުރި ކަމަށް ބުނެ އަޑުއުފުލަން ފަށާފައެވެ.
މީގެ އިތުރުން، ސީބީއެސްއީގެ ޕޯޓަލް ހެކް ކުރެވިދާނެ ކަމުގެ ބިރުވެސް ވަނީ ހީވެފައެވެ. ނިސާރްގާ އަދިކާރީ ނަމަކަށް ކިޔާ "އެތިކަލް ހެކަރެއް" ބީބީސީއަށް މައުލޫމާތު ދެމުން ބުނީ، އޭނާ އެ ނިޒާމުގެ މާސްޓާ ޕާސްވޯޑް ހޯދައި، ދަރިވަރުންގެ ރެކޯޑްތަކާއި މާކްސްތަކަށް ބަދަލު ގެނެވޭ ފަދަ އެކްސެސްއެއް ހޯދި ކަމަށެވެ. ނަމަވެސް ސީބީއެސްއީން މި ވާހަކަތައް ދޮގުކުރެއެވެ. އެ ބޯޑުން ބުނާ ގޮތުގައި ހެކް ކުރި ކަމަށް ބުނާ ސައިޓަކީ ހަމައެކަނި ޓެސްޓް ކުރުމަށް ބޭނުންކުރި ސައިޓެކެވެ.
އިންޑިއާގައި މެޑިސިން ކިޔެވުމަށް ބާއްވާ ނީޓް-ޔޫޖީ އިމްތިހާނުގެ ކަރުދާސް ލީކުވި މައްސަލަ ހޫނުވެފައިވާ ދަނޑިވަޅެއްގައި، ސީބީއެސްއީގެ މި މައްސަލަ ފެންމަތިވުމުން އާންމުންގެ ނުރުހުން ވަނީ ވަރަށް ބޮޑަށް އިތުރުވެފައެވެ. ގާތްގަނޑަކަށް ދެ މިލިއަން ދަރިވަރުން ބައިވެރިވި މި އިމްތިހާނަކީ ކޮލެޖް އެޑްމިޝަނާއި ވަޒީފާގެ ފުރުސަތުތަކަށް ވަރަށް މުހިންމު އިމްތިހާނަކަށް ވުމުން، މި މައްސަލައަށް އަވަސް ހައްލެއް ބޭނުންވާ ކަމަށް ތައުލީމީ ދާއިރާގެ މާހިރުން ބުނެއެވެ. މިހާތަނަށް ހަތަރު ލައްކައަށްވުރެ ގިނަ ދަރިވަރުން ވަނީ އެކުދިންގެ ކަރުދާސްތަކުގެ ސްކޭން ކޮޕީ ހޯދުމަށް އެދިފައެވެ.
