ބެންގަލޫރުގައި އެބޯލާ ވައިރަހަށް ޝައްކު ކުރެވިގެން ކަރަންޓީނު ކުރި ޔޫގެންޑާގެ އަންހެން މީހާ އެ ބައްޔަށް ނެގެޓިވް ވެފައިވާ ކަމަށް އިންޑިއާގެ ހެލްތު މިނިސްޓްރީން ހާމަކޮށްފި އެވެ.
ނަމަވެސް، އޭނާ އެކަހެރިކޮށްފައި ހުރި ހުރުމުން ދޫކޮށްލާނެ ވަގުތެއް މިނިސްޓްރީން އަދި ހާމައެއް ނުކުރެ އެވެ.
އެބޯލާ ފެތުރުން އިތުރުވަމުންދާތީ، ދުނިޔޭގެ ސިއްހަތު ޖަމިއްޔާއިން މިއީ ބައިނަލްއަގުވާމީ ސިއްހީ ކުއްލި ނުރައްކަލުގެ ހާލަތެއްގެ ގޮތުގައި ވަނީ ކަނޑައަޅައިފަ އެވެ.
އިންޑިއާގެ ހެލްތު މިނިސްޓްރީން ނެރުނު ބަޔާނެއްގައި ބުނެފައިވަނީ ބެންގަލޫރުން ފެނުނު ކޭސްގެ ޓެސްޓުތަކުގެ ނަތީޖާ އެބޯލާ ވައިރަހަށް ނެގެޓިވް ވެފައިވާ ކަމަށެވެ.
މިއީ މި ބަލި ޖެހިފައިވާ މީހެއް ކަމަށް ކަށަވަރުވި ނަމަ، މިއީ 2014 ވަނަ އަހަރަށް ފަހު އިންޑިއާއިން މި ބަލި ފެނުނު ފުރަތަމަ ފަހަރަށް ވީހެވެ.
ޔޫގެންޑާއިން އިންޑިއާއަށް ދަތުރުކުރި އުމުރުން 28 އަހަރުގެ މި އަންހެން މީހާ ކަރަންޓީނު ކުރި ހޮސްޕިޓަލުގެ މެޑިކަލް ސުޕްރިންޓެންޑެންޓް ޑޮކްޓަރު އަނިލް ކުމާރު ބަނާގަރް ވިދާޅުވީ، އޭނާގެ ކިބައިން ބަލީގެ އަލާމާތްތަކެއް ފެނިފައި ނުވާ ކަމަށާއި އޭނާ އެކަހެރި ކުރީ ރައްކާތެރިކަމުގެ ފިޔަވަޅެއްގެ ގޮތުން ކަމަށެވެ. ނަމަވެސް، ހެލްތު މިނިސްޓްރީން ބުނެފައިވަނީ އޭނާގެ ހަށިގަނޑުގައި ކުޑަކޮށް ރިއްސުން ހުރި ކަމަށެވެ.
އޭނާ ބެންގަލޫރަށް އައީ ޔޫގެންޑާއިން ފުރައިގެން އިންޑިއާގެ ހުޅަނގުގެ ސިނާއީ ރަށެއް ކަމަށްވާ އަހުމަދުއާބާދަށް ދިއުމަށް ފަހުގަ އެވެ.
އެބޯލާ ފެތުރުން ހުއްޓުވުމަށްޓަކައި އިންޑިއާގެ އެއާޕޯޓުތަކާއި އެހެނިހެން ބޯޑަރުތަކުގައި މިހާރު ވަނީ ސްކްރީން ކުރުމާއި މޮނިޓާ ކުރުމުގެ ވަރުގަދަ ފިޔަވަޅުތަކެއް އަޅާފައެވެ. މީގެ އިތުރުން، ސަރުކާރުން ވަނީ ރައްކާތެރިކަމުގެ އިރުޝާދުތައް ނެރެ، ކޮންގޯ، ޔުގެންޑާ އަދި ދެކުނު ސޫދާނަށް ކޮންމެހެން ކުރަންޖެހޭ ދަތުރުތައް ފިޔަވައި އެހެން ދަތުރުތައް ނުކުރުމަށް ރައްޔިތުންނަށް އިލްތިމާސްކޮށްފައެވެ.
އެފްރިކާގެ ސިއްހީ ހާލަތާ މެދު އޮތް ކަންބޮޑުވުންތަކާ ހުރެ، މި ހަފުތާގައި އިންޑިއާގެ ވެރިރަށް ނިއުދިއްލީގައި ބޭއްވުމަށް ހަމަޖެހިފައި އޮތް އިންޑިއާ-އެފްރިކާ ފޯރަމް ސަމިޓް ވެސް ވަނީ ފަސްކޮށްފައެވެ.
ދުނިޔޭގެ ސިއްހަތު ޖަމިއްޔާއިން ހާމަކޮށްފައިވާ ގޮތުގައި، މިހާތަނަށް ދުނިޔޭގެ އެކި ކަންކޮޅުތަކުން ޝައްކު ކުރެވޭ 900 އަށް ވުރެ ގިނަ ކޭސް ފެނިފައިވާއިރު، އޭގެ ތެރެއިން 101 ކޭސްއަކީ ބަންޑިބުގްޔޯ ސްޓްރެއިންގެ އެބޯލާ ކަމަށް ވަނީ ކަށަވަރު ކުރެވިފައެވެ. މި ވައިރަހަށް އަދި މިހާތަނަށް އެއްވެސް ވެކްސިނެއް ނުވަތަ ފަރުވާއެއް ހޯދިފައެއް ނުވެއެވެ.
