މި ސަރުކާރުގެ އެންމެ ބިޔަ މަޝްރޫއު ކަމުގައިވާ ރަސްމާލެ ތަރައްގީކުރުމަށްޓަކައި ފުށިދިއްގަރުފަޅު ހިއްކައި ނިންމަން އިތުރު އަށް މަސް ދުވަސް ބޭނުންވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެ މަޝްރޫއުގެ އަމަލީ ފަށްޓަވަމުން ޑިސެމްބަރު 18، 2023 ގައި ރައީސް ޑރ. މުހައްމަދު މުއިއްޒު ވަނީ އެ މަސައްކަތް މެދުނުކެނޑި އަށް މަސްދުވަހުގެ ތެރޭގައި ނިމޭނެ ކަމަށް ވިދާޅުވެފަ އެވެ. އެ މުއްދަތު އަންނަ މަހު 18 އަށް ހަމަވާނެ އެވެ.
ނަމަވެސް، ރާއްޖޭގެ 59 ވަނަ މމިނިވަން ދުވަސް ފާހަގަކުރަން ޒުވާނުންގެ މަރުކަޒުގެ ބޭއްވި ރަސްމީ ޖަލްސާގައި ރައީސް މުއިއްޒު ވިދާޅުވީ ރަސްމާލެއިން ބިން ދޭ ގޮތަށް، ބިން ހިއްކުމުގެ މަސައްކަތް ކުރިއަށް ގެންދިޔުން ކަމުނުދާ ކަމަށާއި، އެހެންވެ، އެ މަސައްކަތް ހަވާލުކޮށްފައިވާ ސީއެމްސީސީ ކުންފުންޏާއެކު ވެފައިވާ އެއްބަސްވުން ބާތިލުކޮށްފައިވާ ކަމަށެވެ.
"ރަސްމާލޭގެ 1100 ހެކްޓަރުގެ ބިން އެކި ކުންފުނިތަކާ ހަވާލުކޮށްގެން ހިއްކުމުގެ މަސައްކަތް އެޗްޑީސީއާއި މީޓް ފްރީ ޒޯން ދެ ކުންފުނި ގުޅިގެން މިހާރު އެ ވަނީ ފެށިފަ، ކުރިއަށް އޮތް އަށް މަސްދުވަހުގެ ތެރޭގަ އިރާދަކުރެއްވިއްޔާ ހިއްކާ ނިންމާނަން،" އެމަނިކުފާނު މިރޭ ވިދާޅުވި އެވެ.
ރައީސް މިރޭ ވިދާޅުވީ ރަސްމާލެ މަޝްރޫއު ދެން ކުރިއަށް ގެންދާނީ އެއްވެސް ފަރާތަކަށް ކުރު މުއްދަތަކަށްވެސް އަދި ދިގު މުއްދަތަކަށްވެސް ބިމެއް ނުދީ ކަަމަށެވެ.
"އެތަނުގަ ހިއްކާ ކޮންމެ ވެލިފުކަކީ ދިވެހި ރައްޔިތުންނަށް މިލްކުވާ ވެލިފުކެއް، އެއްވެސް ބޭރު ފަރާތަކަށް އެންމެ ދުވަހަކަށް ކުއްޔަށް ވެސް ހިލޭ ވެސް ލިބޭނެ ބިމެއް ނޫން އެތަނުގަ ހިކިގެން ދާނީކީއެއް،" ރައީސް ވިދާޅުވި އެވެ.
ޑިސެމްބަރު 18، 2023 ގައި ރަސްމާލެ ހިއްކުމުގެ މަޝްރޫއު ފެށީ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީސީ) އާ ހަވާލުކޮށްގެންނެވެ. އެ ކުންފުންޏާ މަޝްރޫއު ހަވާލުކުރީ ހުޅުމާލެއިން 10 ހެކްޓަރާއި ފުށިދިއްގަރުފަޅުން ހިއްކާ 60 ހެކްޓަރު ބިން ދިގު މުއްދަތަށް ދޭގޮތަށެވެ. އެ ބިމުގެ އަގު 45 ބިލިއަން ރުފިޔާއަށް އަރަ އެވެ.
އެކި ކުންފުނިތަކަށް ރަސްމާލޭގެ ބިން ހިއްކަން ހަވާލުކުރާނެ ކަމަށް ރައީސް މިރޭ ވިދާޅުވި ނަމަވެސް، ރަސްމާލެއިން ފުރަތަމަ ހިއްކި 29 ހެކްޓަރުގެ ސައިޓު ޖޭ އަށްފަހު ދެން ހިއްކަން ނިންމާ އީއައިއޭ ހަދާފައިވާ ސައިޓު އެފްގެ މަސައްކަތްވެސް ހަވާލުކޮށްފައިވަނީ ސީއެމްސީސީ އާ އެވެ.
