ގެދޮރުވެރިޔާ ފްލެޓުތަކުގެ ދާއިމީ ލިސްޓުގައި ޝަރުތު ހަމަވާކަމަށް ބުނާ 20 ޕަސަންޓު މީހުންނަށް ފްލެޓު ދޫކުރުމުގެ މަސައްކަތް އަންނަ ހަފުތާގައި ފަށާނެ ކަމަށް ހައުސިން މިނިސްޓަރު އަލީ ހައިދަރު ވިދާޅުވެއްޖެ އެވެ.

މިއަދު މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީގައި ހައިދަރު ވިދާޅުވި ގޮތުގައި ޝަރުތު ހަމަވާ މީހުންނަށް ފްލެޓް ދޫކުރުމުގެ މަސައްކަތް ނުފެށިގެން އުޅެނީ އެންޓި ކޮރަޕްޝަން ކޮމިޝަން (އޭސީސީ)ގެ ތަހުގީގަށް އަތުލާފައި އޮތް ގެދޮރުވެރިޔާ ޕޯޓަލްގެ އެކްސެސް ނުލިބޭތީ ކަމަށެވެ.

"މި ރާވަނީ އަންނަ ހަފްތާގައި [ފްލެޓު ދޫކުރުމުގެ] މަސައްކަތް ފަށައިގަނެވޭނެ ކަމަށް. އޭސީސީން މި ހަފްތާ ކުރީކޮޅު ވިދާޅުވީ ދެތިން ދުވަހެއް ތެރޭގައި އެކްސެސް ލިބޭނޭ. ލިބުނީމަ [ފްލެޓް ލިބޭ] މީހުންނަކީ ކޮބާކަން ކަނޑައެޅިގެން އެނގި, އެމީހުންނަށް ގުޅައިގެން ގެނެސް ފްލެޓް ހަވާލު ކުރުމުގެ މަސައްކަތް ކުރަން އަޅުގަނޑުމެން ރާވާފައި އޮތީ" ހައިދަރު ވިދާޅުވި އެވެ.

ހައިދަރު ވިދާޅުވީ މިހާތަނަށް އޭސީސީން ދީފައިވާ ލިސްޓުގައި ހުރީ ޝަރުތު ހަމަވާ ކަމަށް ކަނޑައަޅާފައިވާ 20 ޕަސަންޓު މީހުންގެ ފޯމު ނަންބަރުތައް އެކަނި ކަމަށެވެ. އަދި އެއީ ކޮންބައެއްކަން އެނގޭނީ ޕޯޓަލްގެ އެކްސެސް ލިބިގެން, ޕޯޓަލްއިން ބަލައިގެން ކަމަށެވެ. ހައިދަރު ވަނީ އޭސީސީން މިހާރު ލިބިފައިވާ ލިސްޓު މަޖިލީހާ ހިއްސާކުރައްވާނެ ކަމަށް ވިދާޅުވެފަ އެވެ.

ހައިދަރު ވިދާޅުވީ ޝަރުތު ހަމަވާ މީހުންނަށް ފްލެޓް ދޫކުރުމުގައި ގެންގުޅޭ އުސޫލަކީ, ޕޯޓަލް މެދުވެރިކޮށް ޝަރުތު ހަމަވާ މީހުން ޔަގީން ކުރުމަށްފަހު މިނިވަން ކޮމިޓީއެއް އެކުލަވާލައިގެން އެ ކޮމިޓީގެ ލަފައާއެކު ފްލެޓް ދޫކުރުމުގެ ކަންތައް ކުރިއަށް ގެންދިއުން ކަމަށެވެ.

ފްލެޓު ލިބޭނެ ކަމަށް ކުރީގެ ސަރުކާރުން ކަނޑައެޅި މީހުންގެ ތެރެއިން 59 ޕަސެންޓު މީހުންގެ ޝަރުތު ހަމަނުވާ ކަމަށް އޭސީސީން ބުނެ އެވެ. އަދި ޝަރުތު ހަމަވި ނަމަވެސް މައްސަލަ އުޅޭ 19.7 މީހުންނަށް ފްލެޓު ދީފައިވާ ކަމަށް އެ ކޮމިޝަނުން ބުނެ އެވެ.

"59 ޕަސަންޓު މީހުންނަކީ ކަނޑައެޅިގެން ޝަރުތު ހަމަނުވާ މީހުން ކަމަށް އެ ބޭފުޅުން ކަނޑައަޅުއްވާފައި ވާތީ އެއީ އަޅުގަނޑު ވަރަށް ކަނބޮޑުވާ ކަމެއް. 59 ޕަސަންޓަކީ މެޖޯރިޓީއަށްވުރެ މާ ބޮޑު އަދަދެއް. އެވަރަށް ޝަރުތު ހަމަނުވާ ކަމަށް ކަނޑައެޅީމާ އަޅުގަނޑުމެން އެބަޖެހޭ ކީއްވެގެންކަން ޝަރުތު ހަމަ ނުވަނީ އޮޅުންފިލުވުން." ހައިދަރު ވިދާޅުވި އެވެ.

އޭނާ ވިދާޅުވި ގޮތުގައި އޭސީސީން ފޮނުވި ސިޓީގައި, ގިނަ އަދަދެއްގެ ބަޔަކު ޝަރުތު ހަމަނުވާ ސަބަބު ސާފުކުރަން އަންގާފައިވާ ކަމަށެވެ. ނަމަވެސް ފޯމުތައް އަލުން ބެލުމުގެ ފުރުސަތު އަދި ނުލިބޭ ކަމަށާއި, އެކަން ވެސް ބެލޭނީ ޕޯޓަލްގެ އެކްސެސް ލިބިގެން ކަމަށް ހައިދަރު ވިދާޅުވި އެވެ.