މުހަައްމަދު މުއިއްޒުއާ އަރިސް ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު މިއަދު މަގާމުން އިސްތިއުފާދެއްވައިފި އެވެ.
އަދަދު އަށް އެކި މަސްދަރުތަކުން އެނގިފައިވާ ގޮތުގައި ހައިދަރު މަގާމުން އިސްތިއުފާދެއްވީ މުއިއްޒު އެގޮތަށް އެކަން ކުރައްވަން އެންގެވުމާ ގުޅިގެންނެވެ. އެކަމާ ގުޅިގެން މިހާތަނަށް ހައިދަރު މިހާތަނަށް އެއްވެސް އެއްޗެއް ވިދާޅެއް ނުވެ އެވެ.
ހަޔާ އެޑިއުކޭޝަން މިނިސްޓަރުގެ މަގާމަށް ހައިދަރު އައްޔަންކުރެއްވީ ޑިސެމްބަރު، 2024، ގަ އެވެ. މި ސަރުކާރު ވެރިކަމަށް އައުމަށްފަހު ހައިދަރު އެންމެ ފުރަތަމަ އައްޔަންކުރެއްވީ ހައުސިން މިނިސްޓަރަކަށެވެ.
ހައިދަރުގެ އިތުރުން މިއަދު މިހާތަނަށް ޖުމްލަ ނުވަ މިނިސްޓަރުން މަގާމުން ވަނީ އިސްތިއުފާ ދެއްވާފަ އެވެ. އެ ހުރިހާ މިނިސްޓަރުން ކުއްލި ގޮތަކަށް އިސްތިއުފާދެއްވި ސަބަބެއް މިހާތަނަށް އެނގިފައެއް ނުވެ އެވެ.
އިސްތިއުފާ ދެއްވި ކެބިނެޓް މިނިސްޓަރުން:
- ފޮރިން މިނިސްޓަރު ޑރ. އަބްދުﷲ ހަލީލް
- ސޯޝަލް އެންޑް ފެމިލީ ޑިވެލޮޕްމަންޓު މިނިސްޓަރު ޑރ. އައިޝަތު ޝިހާމް
- ޑިފެންސް މިނިސްޓަރު ގައްސާން މައުމޫން
- ލޯކަލް ގަވަމެންޓް މިނިސްޓަރު އާދަމް ޝަރީފް
- ހެލްތު މިނިސްޓަރު އަބްދުالله ނާޒިމް
- އެގްރިކަލްޗާ މިނިސްޓަރު މަރިޔަމް މާރިޔާ
- ޓޫރިޒަމް މިނިސްޓަރު ތޯރިގު އިބްރާހިމް
- ޔޫތު މިނިސްޓަރު އިބްރާހިމް ވަހީދު (އަސްވާޑު)
- ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު
މީގެއިތުރުން އިތުރު މިނިސްޓަރުންތައް ވެސް މަގާމުން އިސްތިއުފާ ދެއްވާފައިވާ ކަމަށް މައުލޫމާތު ލިބިފައިވެ އެވެ. ނަމަވެސް އެއީ ކޮން މިނިސްޓަރުންނެއް ކަމެއް މިހާތަނަށް ޔަގީންކުރެވިފައެއް ނުވެ އެވެ.
ސަރުކާރުގެ މިނިސްޓަރުންތައް މިއަދު ވަކިކޮށްފައި މިވަނީ ނިމިދިޔަ ލޯކަލް ކައުންސިލް އިންތިހާބުގައި ސަރުކާރު ހިންގާ ޕީއެންސީ ބޮޑު ނާކާމިޔާބީއަކާ ކުރިމަތިލާފައި ވަނިކޮށެވެ. ކައުންސިލް އިންތިހާބާއެކު ނެގި ފެންނަ ނުފެންނަ ވޯޓުން ވެސް ސަރުކާރުން ހުށަހެޅި ދެ އިންތިހާބު އެއްކޮށްލުމާ ގުޅޭ ހުށަހެޅުމަށް ވެސް ބޮޑުތަނުން ވަނީ ނޫނެކޭ ބުނެފަ އެވެ.
