ރާއްޖޭގެ ތާރީހުގައި ފުރަތަމަ ފަހަރަށް ސަރުކާރުގެ ބޮންޑެއް، މޯލްޑިވްސް ސްޓޮކް އެކްސްޗޭންޖުގައި ލިސްޓުކޮށްފި އެވެ.

މޯލްޑިވްސް ސްޓޮކް އެކްސްޗޭންޖްގައި ލިސްޓުކުރުމަށް މިދިޔަ ހޯމަ ދުވަހު ސަރުކާރުން ވަނީ 50 މިލިއަން ރުފިޔާގެ ޓްރެޝަރީ ބޮންޑެއް ދޫކޮށްފަ އެވެ.

ފިނޭންސް މިނިސްޓްރީން ބުނި ގޮތުގައި މިއީ މިނިސްޓްރީގެ މީޑިއަމް ޓާމް ޑެޓް މެނޭޖްމަންޓް ސްޓްރެޓެޖީގައި ބަޔާންކޮށްފައިވާ މަގުސަދުތަކާ އެއްގޮތަށް ސަރުކާރުން އެޅި ފިޔަވަޅެކެވެ. އަދި މިކަމުގެ ސަބަބުން ވިޔަފާރިތަކާއި އާންމު ރައްޔިތުންނަށް ސަރުކާރުގެ ސެކިއުރިޓީޒް ސެކަންޑަރީ މާކެޓުން ގަނެ ވިއްކުމުގެ މަގު ފަހިވެގެންދާނެ އެވެ.

އެ ތާރީހީ ހަރަކާތް ފާހަގަކުރުމުގެ ގޮތުން ފިނޭންސް މިނިސްޓްރީގައި މިއަދު ވަނީ ހާއްސަ ރަސްމިއްޔާތެއް ބާއްވާފަ އެވެ. މި ހަރަކާތުގައި މޯލްޑިވްސް ސްޓޮކް އެކްސްޗޭންޖް، ކެޕިޓަލް މާކެޓް ޑިވެލޮޕްމަންޓް އޮތޯރިޓީ އަދި މޯލްޑިވްސް ޕެންޝަން އެޑްމިނިސްޓްރޭޝަން އޮފީހުގެ މަންދޫބުން ބައިވެރިވެފައިވެ އެވެ.

އެ ރަސްމިއްޔާތުގައި ވާހަކަ ދައްކަވަމުން ފިނޭންސް މިނިސްޓަރު ޑރ. މުހައްމަދު ޝަފީގު ވިދާޅުވީ މި ލިސްޓިން އަކީ ޑޮމެސްޓިކް ސެކިއުރިޓީޒް މާކެޓް ތަރައްގީކުރުމާ ދިމާލަށް އެޅުނު ތާރީހީ ފިޔަވަޅެއް ކަމަށެވެ. އަދި އޭގެ ސަބަބުން ޑޮމެސްޓިކް ސެކިއުރިޓީޒް މާކެޓް ތަރައްގީކުރުމުގެ ލަނޑުދަނޑި ހާސިލުކޮށް، ރާއްޖޭގައި ލިކުއިޑް އަދި އެކްޓިވް ސެކަންޑަރީ މާކެޓެއް އުފެއްދުމުގެ ފުރުސަތު ލިބިގެންދާނެ ކަމަށް ވެސް އޭނާ ވިދާޅުވި އެވެ.

މިނިސްޓްރީން ދޫކުރި ޓްރެޝަރީ ބޮންޑް ދޫކޮށްފައިވަނީ އަހަރަކު 5.5 ޕަސެންޓްގެ ކޫޕަން ރޭޓަކުންނެވެ. މި ބޮންޑުގެ މެޗުއިރިޓީ މުއްދަތަކަށް ޑިސެމްބަރު 2028 އަށް ކަނޑައަޅާފައިވާއިރު ބޮންޑަކަށް 1،000ރ. ގެ ރޭޓުން ޖުމްލަ 50،000 ބޮންޑް ވަނީ ސްޓޮކް އެކްސްޗޭންޖްގައި ލިސްޓުކޮށްފަ އެވެ.

ފިނޭންސް މިނިސްޓްރީން ބުނިގޮތުގައި މޯލްޑިވްސް ސްޓޮކް އެކްސްޗޭންޖުގައި ދިގުމުއްދަތުގެ ޓްރެޝަރީ ބޮންޑް ލިސްޓްކުރުމާއި ސެކަންޑަރީ މާކެޓުގައި ވިޔަފާރި ކުރުމަށް މަގުފަހިކުރުމަކީ ދިވެހި މާލީ ބާޒާރު އިތުރަށް ފުޅާކޮށް ތަރައްގީކުރުމަށް ސަރުކާރުން އަޅާފައިވާ މުހިންމު ފިޔަވަޅުތަކެކެވެ. އަދި އެތެރޭގެ މާކެޓް ތަރައްގީ ކުރުމަށް ސަރުކާރުން މެދުނުކެނޑި މަސައްކަތް ކުރާނެ ކަމަށާއި ކުރިއަށް އޮތް ދުވަސްތަކުގައި ކުރު މުއްދަތާއި ދިގު މުއްދަތުގެ ސެކިއުރިޓީޒް މާކެޓަށް ނެރުމަށް ރާވާފައިވާ ކަމަށް ވެސް ބުންޏެވެ.