އަންނަ އަހަރަށް ލަފާކޮށް ސަރުކާރުން ހުށަހެޅި ބަޖެޓަށް 300 މިލިއަން ރުފިޔާ އިތުރުކޮށް, 49.8 ބިލިއަން ރުފިޔާގެ ބަޖެޓެއް މަޖިލީހުގެ އިއްތިފާގުން މިއަދު ފާސްކޮށްފި އެވެ.

ނިމިދިޔަ ސަރުކާރުގެ ފިނޭންސް މިނިސްޓްރީން ހުށަހެޅީ 49.5 ބިލިއަން ރުފިޔާގެ ބަޖެޓެކެވެ. އެ ބަޖެޓަށް ކޮމިޓީ މަރުހަލާގައި އެކި ދާއިރާތަކުން 306 މިލިއަން ރުފިޔާ އިތުރުކުރި އެވެ.

ރާއްޖެ-މޮރިޝަސް ކަނޑުގެ އިން ވަކިކުރުމުގެ މައްސަލާގައި ރާއްޖެއަށް ގެއްލުނު ކަނޑުގެ ބައި ހޯދުމަށް ކުރާ މަސައްކަތުގައި ގާނޫނީ މަސައްކަތްތައް ކުރުމަށް އެޓާނީ ޖެނެރަލްގެ އޮފީހުގެ ބަޖެޓަށް 10 މިލިއަން ރުފިޔާ ވެސް ބަޖެޓުގައި ހިމަނާފައިވެ އެވެ.

މި ސަރުކާރުގެ ފުރަތަމަ 100 ދުވަހުގެ ތެރޭގައި ފެށުމަށް ނިންމި ފުށިދިއްގަރު ފަޅު ހިއްކުމުގެ މަޝްރޫއުއަށް ހާއްސަކުރި 400 މިލިއަން ރުފިޔާ ކޮމިޓީން އުނިކުރި އެވެ. އެކަމާ ގުޅިގެން އެމްޑީޕީއަށް ފާޑުކިޔުން އަމާޒުވެސްވި އެވެ. އެ ޕާޓީން ބުނީ އެ ފައިސާ ހަރަދުކުރާނީ ނިމިދިޔަ ސަރުކާރުގައި ފެށި ގުޅީފަޅާއި, ގިރާވަރުފަޅުގެ މަޝްރޫއުތަކަށެވެ.

ޕަބްލިކް ސެކްޓާ އިންވެސްޓްމަންޓް (ޕީއެސްއައިޕީ) މަޝްރޫއުތަކަށް ބަޖެޓުކޮށްފައިވާ އަދަދުތަކަށް ވެސް ކޮމިޓީން ބަދަލު ގެނަ އެވެ. ފުށިދިއްގަރު ފަޅު ހިއްކުން ފަދަ ބައެއް މަޝްރޫއުތައް ޕީއެސްއައިޕީ ބަޖެޓުން އުނިކުރުމުން މުޅި ޕީއެސްއައިޕީ ބަޖެޓަށް އިރުވީ 248 މިލިއަން ރުފިޔާއެވެ. ފާސްކުރި ބަޖެޓުގައި ޕީއެސްއައިޕީ މަޝްރޫއުތަކަށް ބަޖެޓުކުރަން ހުށަހަޅާފައިވާ ޖުމްލަ އަދަދަކީ ގާތްގަނޑަކަށް 8.8 ބިލިއަން ރުފިޔާ އެވެ.