އެންޓި ކޮރަޕްޝަން ކޮމިޝަން (އޭސީސީ) އިން އަންގައިގެން ގެދޮރުވެރިޔާ ފްލެޓުތައް ދިނުން ހައުސިން މިނިސްޓްރީން ހުއްޓާލައިފި އެވެ.
އެ މިނިސްޓްރީން މިއަދު ނެރުނު ބަޔާނެއްގައި ބުނީ ގެދޮރިވެރިޔާ ސްކީމުގެ ދަށުން މާލެ ސަރަހައްދުން ފްލެޓަށް އެދި ހުށަގަހަޅާފައިވާ ފަރާތްތަކުގެ ތެރެއިން ދާއިމީ ލިސްޓުގައި ހިމެނޭ ފަރާތްތަކަށް ފްލެޓްތައް ހަވާލުކުރުމުގެ މަސައްކަތްތައް މިވަގުތު ކުރިއަށް ނުގެންދިޔުމަށް އޭސީސީން އަންގާފައިވާތީ އެ ސްކީމްގެ ދަށުން ފްލެޓްތައް ހަވާލުކުރުމުގެ މަސައްކަތަކާއި ގުޅިގެން އޭސީސީން ވަކި ގޮތެއް އަންގަންދެން ފްލެޓްތައް ހަވާލުކުރުމުގެ މަސައްކަތް ހުއްޓާލައިފާވާ ކަމަށެެވެ.
ފްލެޓު ލިބޭ މީހުންގެ ދާއިމީ ލިސްޓު އިއްޔެ އާއްމުކޮށް ފްލެޓުތަކުގެ ގުރުނެގުމުގެ މަސައްކަތް ފެށުމާ އެކު އޭސީސީން ވަނީ އެ ފްލެޓުތަކުގެ އެއްބަސްވުމުގައި ސޮއިކުރުމާއި، އެ ފުލެޓްތައް ޙަވާލުކުރުމާ ގުޅުންހުރި އެންމެހައި މަސައްކަތްތައް ހުއްޓާލުމަށް އަންގާފަ އެވެ.
ނަމަވެސް, އޭގެ ފަހުންވެސް ފްލެޓް ލިބުނު ބައެއް ފަރާތްތަކަށް އޮންލައިންކޮށް ފްލެޓުގެ އެގްރީމެންޓުތައް ފޮނުވައިގެން އެގްރިމެންޓުތަކުގައި ސޮއިކުރުމުގެ މަސައްކަތް މިނިސްޓްރީން ވަނީ ކުރިއަށްގެންގޮސްފަ އެވެ.
ގެދޮރުވެރިޔާ ސްކީމުގެ ދަށުން ހުޅުމާލޭގެ ދެ ވަނަ ފިޔަވަހީގައި ސަރުކާރުން އަންނަނީ 18 ބުރީގެ 32 ޓަވަރު އިމާރާތް ކުރަމުންނެވެ. އޭގެ ތެރޭގައި ހިމެނެނީ ދެ ކޮޓަރީގެ 1،200 ޔުނިޓާއި ތިން ކޮޓަރީގެ 2،800 ޔުނިޓެވެ.
މި ފްލެޓުތަކުގެ ތެރެއިން ތިން ކޮޓަރީގެ ފްލެޓަކަށް ދައްކަން ޖެހެނީ ކުލީގެ ގޮތުގައި 7000ރ. އާއި މަރާމާތު ފީއަށް 1000ރ. ހިމެނޭހެން 8000ރ. އެވެ. އަދި ދެ ކޮޓަރީގެ ފްލެޓަކަށް ދައްކަން ޖެހެނީ ކުލީގެ ގޮތުގައި 5000ރ. އާއި މަރާމާތު ފީ 1000ރ. ހިމަނައިގެން 6000ރ. އެވެ.
