ހިލައާއި ހިލަވެލި އަދި އެހެން ގިނަ ބާވަތްތަކެއް ރާއްޖެއަށް ފުޅާދާއިރާ އެއްގައި އެތެރެކޮށް ވިއްކަމުން އަންނަ އިންޑިއާގެ މޯހަން މުތާ(އެމްއެމް އެކްސްޕޯޓްސް) އިން ރާއްޖޭގައި ރިސޯޓެއް ވެސް ހަދަން ތައްޔާރުވަމުންދާ ކަމަށް ބުނެފި އެވެ.
އެމްއެމް އެކްސްޕޯޓްސްގެ އެގްޒެކެޓިވް ޑިރެކްޓަރު ސުރޭޝް މުތާއާ ހަވާލާދީ 'ދަ ހިންދޫ ބިޒްނަސްލައިން' އިން ރިޕޯޓުކޮށްފައިވާ ގޮތުގައި އެކުންފުނިން އަންނަނީ ރާއްޖޭގައި "ވެލްނަސް" ރިސޯޓެއް ހަދަން ބޭނުންވާ އެންމެ ފަހުގެ ހުއްދަތައް ހޯދަމުންނެވެ.
އެ ނޫހުން ރިޕޯޓުކޮށްފައިވާ ގޮތުން މި ރިސޯޓު ތަރައްގީ ކުރަން އެމްއެމް އެކްސްޕޯޓުން 30 މިލިއަން ޑޮލަރު އިންވެސްޓު ކުރަން ނިންމާފައި ވާއިރު، އެކަމަށް ބޭނުންވާ ލޯނު ވެސް ނަގަނީ ރާއްޖޭގެ ބޭންކަކުންނެވެ. އަދި އެ ރަށުގައި ހަދަނީ އޯލް-ވީގަން- ވެޖިޓޭރިއަން ރިސޯޓެއް ކަމަށާއި ރިސޯޓުގައި ބަނގުރާ ވެސް ނުވިއްކާނެ ކަމަށް ވަނީ ބުނެފަ އެވެ.
'ދަ ހިންދޫ ބިޒްނަސްލައިން' އަށް ސުރޭޝް މުތާ ދިން އިންޓަވިއުގައި ބުނެފައިވާގޮތުން މި ރިސޯޓު ތަރައްގީކުރާނީ ވާދޫ ކިޔާ ރަށެއްގަ އެވެ. ނަމަވެސް ރާއްޖޭގައި އޮންނަނީ އެ ނަން ކިޔާ މީހުން ދިރިނޫޅޭ އެންމެ ރަށެކެވެ. އެއީ މާލެ އަތޮޅުގައި "އަދާރަން ޕްރެސްޓީޖް ވާދޫ" ރިސޯޓު މިހާރުވެސް ހިންގަމުން އަންނަ ރަށެވެ. ދެން އޮންނަނީ ރ. ވާދޫ އާއި ގދ. ވާދޫ އެވެ. އެ ދެރަށަކީވެސް މީހުން ދިރުއުޅޭ ރަށްތަކެވެ.
އެމްއެމް އެކްސްޕޯޓަކީ އިންޑިޔާގެ އެންމެ ކުރިއަރާފައިވާ އެއް އެކްސްޕޯޓް ކުންފުންޏެވެ. ރާއްޖެއަށް ހިލަ އެތެރެކުރުމުގެ އިތުރުން އެކުންފުނިން އަންނަނީ ރާއްޖޭގައި ޕީއެސްއައިޕީގެ ގިނަ މަޝްރޫއުތައްވެސް ހިންގަމުންނެވެ.
ޖަލުގައި އޮންނެވި ކުރީގެ ރައީސް އަބްދުﷲ ޔާމީނު ސަރުކާރުން ކޮރަޕްޝަނަށް މަގުފަހިވާގޮތައް ގިނަ މަޝްރޫއުތަކެއް ހަވާލުކޮށްފައިވާ ކަމަށް ތުހުމަތުވާ އެމްއެމް އެކްސްޕޯޓުގެ ޓަގު ބޯޓާއި ބާޖުތައް އެކިފަހަރު މަތިން ރާއްޖޭގެ ފަރުތަކަށް އަރައިގެން އީޕީއޭ އިން އެކުންފުނި ބޮޑެތި އަދަދުތަކުންް ޖޫރިމަނާ ވެސް ކުރި އެވެ. އަދި ދާދި ފަހުން އެކުންފުނީގެ ބާޖެއް ފުވައްމުލަކު ފަރަށް އުރި ބޮޑެތި ގެއްލުންތަކެއް ލިބިފައިވާއިރު އެ މައްސަލަ އެންވަޔަރްމެންޓަލް ޕްރޮޓެކްޝަން އެޖެންސީ (އީޕީއޭ) އިން ތަހުގީގު ނުކުރަނީސް އެ ބާޖު ވަނީ ރާއްޖެއިން ފުރައިގެން ގޮސްފަ އެވެ.
