ގއ. އަތޮޅާއި ގދ. އަތޮޅުގައި އާރްޓީއެލް ފެރީގެ ހިދުމަތް ދިނުމަށް ބޭނުންވާ އުޅަނދުތައް މިއަދު އެ އަތޮޅުތަކަށް ފުރުވާލައިފި އެވެ.

ދަތުރުފަތުރުގެ ނިޒާމުން ގދ. އަދި ގއ. އަތޮޅު ގުޅާލުމަށް ފަށާ އާރުޓީއެލް ހިދުމަތަށް ޖުމްލަ ހަ ފެރީ މިއަދު ފުރުވާލާފައިވާއިރު، ސަރުކާރުގެ އަމާޒަކީ މިއަހަރު ނިމުމުގެ ކުރިން ދެކުނުގެ ހަތަރު އަތޮޅެއްގައި އާރުޓީއެލް ފެރީގެ ހިދުމަތް ފެށުން ކަމަށް ރައީސް އިބްރާހިމް މުހައްމަދު ސޯލިހް މީގެ ކުރިން ވަނީ ވިދާޅުވެފަ އެވެ.

އެމްޓީސީސީގެ ސީއީއޯ އާދަމް އާޒިމް މިއަދު ވިދާޅުވީ ހުވަދު އަތޮޅުގައި މި މަހުގެ 13 އިން 19 ވަނަ ދުވަހަށް ފެރީގައި ހިލޭ ދަތުރު ކުރެވޭނެ ކަމަށެވެ.

"20 ޖުލައިން ފެށިގެން އަގު ނަގައިގެން ދަތުރުތައް ފެށޭނެ،" އާޒިމް ވިދާޅުވި އެވެ.

މި ހިދުމަތް މިހާރު ފަށާފައި ވަނީ އެންމެ ރާއްޖޭގެ އެންމެ އުތުރުން ހއ. އަދި ހދ. އަތޮޅާއި ށ. އަތޮޅާއި ޅ. އަތޮޅުގަ އެވެ. މި މަޝްރުއޫގެ ފުރަތަމަ ފިޔަވަހީގެ މަސައްކަތް ސަރުކާރުން އެމްޓީސީސީއާ ހަވާލުކޮށްފައި ވަނީ 2021 ވަނަ އަހަރުގެ ޖެނުއަރީ މަހު އެވެ.