ގްލާސްގޯ (ޖޫން 24) - ސެލްޓިކާއެކު ހަދާފައިވާ ތިން އަހަރު ދުވަހުގެ އެއްބަސްވުން ހަމަވަންދެން އެ ކްލަބުގައި މަޑުކުރާނެކަމުގެ ގެރެންޓީ އެ ކްލަބަށް ދީފައިވާނެ ކަމަށް ސެލްޓިކްގެ އާ ކޯޗު ބްރެންޑަން ރޮޖާސް ބުނެފިއެވެ.
ކުރިން ސެލްޓިކްގެ ކޯޗުކަމާ ހަވާލުވެ، ރޮޖާސް ވަނީ 2018-2019 ވަނަ އަހަރުގެ ސީޒަންގެ މެދުތެރެއިން ސެލްޓިކްގެ ކޯޗުކަން ދޫކޮށް، ލެސްޓާ ސިޓީގެ ކޯޗުކަމާ ހަވާލުވެފަ އެވެ. އެކަމާ ގުޅިގެން ސެލްޓިކްގެ ސަޕޯޓަރުން ރޮޖާސްއާ މެދު ހިތްހަަމަނުޖެހުނެވެ.
ލެސްޓާގެ ކޯޗުކަމުން މިދިޔަ ސީޒަންގައި ވަކިކުރި ރޮޖާސް އަލުން ސެލްޓިކްއާ ހަވާލުވެ، ސަޕޯޓަރުންނަށް ދިން ޔަގީންކަމަކީ އޭނާގެ މަގާމުން ވަކިނުކުރާހާ ހިނދަކު، އެ ކްލަބާ އެކު ހަދާފައިވާ ކޮންޓުރެކްޓްގެ ނިޔަލަށް އެ ކްލަބުގައި މަޑުކުރާނެ ކަމެވެ.
"އަހަރެން މި ސޮއިކުރީ ތިން އަހަރަށް. އެހެންވީމަ ތިން އަހަރު އަހަރެން މި ކްލަބުގައި މަޑުކުރާނަން. އެކަމަކު އެ މުއްދަތުގައި އަހަރެން މަގާމުން ވަކިކޮށްފިނަމަ އަހަރެން ކުރާނެ ކަމެއް ނެތް،" ރޮޖާސް ބުންޏެވެ.
"ސެލްޓިކްގެ ސަޕޯޓަރެއް އަހަންނަކީ ވެސް. އެެހެންވީމާ އޭރު (ކްލަބު ދޫކޮށްލުމުން) ސަޕޯޓަރުންނަށް ކުރާނެ އަސަރު އަހަންނަށް އެނގޭ. އެކަމާ އަހަރެން ވަރަށް ދެރަވި."
ރޮޖާސް ބުނީ ލެސްޓާގެ ކޯޗުކަމުން ވަކިވުމަށް ފަހު އޭނާ ނިންމައިގެން ހުރީ އަހަރެއްހާ ދުވަހުގެ ބްރޭކެއް ނެގުމަށް ކަމަށެވެ. އެކަމަކު ސެލްޓިން އިން ފުރުސަތު ލިބުމާއެކު، ކްލަބާއެކު ކުރެވުނު މަޝްވަރާތަކަށް ފަހު އެނާގެ ހިޔާލު ބަދަލުވީ ކަމަށެވެ.
އުތުރު އަޔަލޭންޑަށް ނިސްބަތްވާ ރޮޖާސް ވަނީ ލެސްޓާ ސިޓީއާއެކު އެފްއޭ ކަޕް ކާމިޔާބުކޮށްފަ އެވެ. ރޮޖާސް ،50، ވަނީ އޭގެ ކުރިން ލިވަޕޫލާއި ސްވަންސީ ސިޓީ އަށް ވެސް ކޯޗުކޮަށްދީފަ އެވެ.
