ލެސްޓާ (ފެބްރުއަރީ 8) - އެފްއޭ ކަޕްގެ ހަތަރު ވަނަ ބުުރުގައި ދެ ވަނަ ޑިވިޝަނުގެ ނޮޓިންހަމް ފޮރެސްޓް އަތުން ބަލިވި މެޗަށް ފަހު ލެސްޓާ ސިޓީގެ ކޯޗު ބްރެންޑަން ރޮޖާސް އެ ޓީމުގެ ކުޅުންތެރިންނާ ބެހޭގޮތުން ދެއްކި ބައެއް ވާހަކަތަކުގެ ސަބަބުން އޭނާ އަށް ޕްރެޝަރު ބޮޑުވެއްޖެ އެވެ.
އެފްއޭ ކަޕްގެ އެންމެ ފަހުގެ ޗެމްޕިއަން ލެސްޓާ މި ފަހަރުގެ މުބާރާތުން ކެޓީ ލަދުވެދި ނަތީޖާއަކަށް ފަހު އެވެ. އާދިއްތަ ދުވަހުގެރޭ ކުޅުނު އެފްއޭ ކަޕްގެ ހަތަރު ވަނަ ބުރުގެ މެޗުން ލެސްޓާ ވަނީ ދެ ވަނަ ޑިވިޝަނުގެ ޓީމެއް ކަމަށްވާ، ނޮޓިންހަމް އަތުން 4-1 އިން ބަލިވެފަ އެވެ.
އެ މެޗަށް ފަހު އޮތް ނޫސްވެރިންގެ ބައްދަލުވުމުގައި ރޮޖާސް ހުރީ ވަރަށް ބޮޑަށް ހިތްހަމަނުޖެހިފަ އެވެ.
ނޮޓިންހަމް މެޗުގެ ކުރިން އޮތް ލެސްޓާ ޓީމު ބައްދަލުވުމަށް ރޮޖާސް ވަނީ މިދިޔަ ސީޒަނުގައި އެ ޓީމުން ހޯދި އެފްއޭ ކަޕްގެ ރަމްޒީ ތަށްޓެއް ގެންގޮސްފަ އެވެ. އެއީ ލެސްޓާ ކުޅުންތެރިން މޮޓިވޭޓް ކުރުމުގެ ގޮތުން ތަށި ލިބޭނީ މަސައްކަތް ކޮށްގެން ކަން ކިޔައިދިނުމުގެ ބޭނުމުގައި ކުރި ކަމެއް ކަމަށް ރޮޖާސް ވަނީ ބުނެފަ އެވެ. އެކަމަކު، އެކަން އެ ގޮތަށް ޓީމު ބައްދަލުވުމަށް ގޮސްގެން ކަންތައްތަކެއް ކުރިކަމުގެ ފައިދާއެއް ނުފެނި، ބަލިވާން ޖެހުމުގެ ޒިންމާ ރޮޖާސް އެޅުވީ ޓީމުގެ ކުޅުންތެރިންގެ ބޮލުގަ އެވެ. ހާއްސަކޮށް މެޗުގެ ފުރަތަމަ 32 މިނިޓް ތެރޭ ނޮޓިންހަމް އިން ލެސްޓާ ކޮޅަށް ތިން ގޯލު ޖެހުން ރޮޖާސް އަށް "ހަޖަމްކުރަން" އުނދަގޫވި އެވެ.
ރޮޖާސް ބުނީ ނަތީޖާއާ މެދު ސަޕޯޓަރުން ކިބައިން އޭނާ މައާފަށް އެދޭ ކަމަށެވެ. އެކަމަކު، މީގެ ކުޅުންތެރިންގެ ޒިންމާއެއް ވެސް އޮތް ކަން ގަބޫލުކުރަން ޖެހޭ ކަމަށް ރޮޖާސް ވަނީ ބުނެފަ އެވެ.
"ކަމެއް ހާސިލްކުރަން ބޭނުންވެފައި ހުރި މަންޒަރެއް ނުފެނުނު ބައެއް ކުޅުންތެރިންގެ މޫނުމަތިން. ބައެއް ކުޅުންތެރިންގެ ކިބައިން ފެންނަނީ އެހެން ކަހަލަ މަންޒަރުތަކެއް. މި ޓީމުގައި ހުރެގެން ދެން އިތުރު ކާމިޔާބީއެއް ހޯދިދާނެ ކަމަށް ގަބޫލުނުކުރާ ވިސްނުމުގައި ދަނޑުމަތީގައި ތިބޭ ކުޅުންތެރިން ވެސް އެބަތިބި. އެއީ ރަނގަޅު ގޮތެއް ނޫން. މިދިޔަ ސީޒަނުގައި ހޯދި ފަދަ ކާމިޔާބެއް ނުހޯދޭނެ އެންމެ ބޮޑު ސަބަބަކީ ޓޮޕް ވިސްނުން ހުރި ކުޅުންތެރިން މި ޓީމުގައެއް ނެތް. އެ އަށް ވުރެ ވިސްނުން ދަށްކޮށް ފެންނަނީ. އަހަންނަށް ހުރިހާ މަންޒަރެއް ވެސް ފެނޭ،" ކުޅުންތެރިންނަށް ފާޑުކިޔަމުން ރޮޖާސް ބުންޏެވެ.
ކުރިން ސްވަންސީ ސިޓީ އާއި ލިވަޕޫލަށް ޕްރިމިއާ ލީގުގައި ކޯޗުކޮށްދިން އުމުރުން 49 އަހަރުގެ ރޮޖާސްގެ މި ވާހަކަތަކަށް ފަހު ލެސްޓާގެ ބޯޑުގެ ވެސް ހިތްހަމަނުޖެހުންތަކެއް އެބަހުއްޓެވެ. ބޯޑުން ވަނީ ކުޅުންތެރިންނާ ބެހޭގޮތުން ރޮޖާސް ދެއްކި ވާހަކައިގެ ތަފްސީލެއް ދޭން ބުނެފަ އެވެ.
ރިޕޯޓްތައް ބުނާގޮތުން ކުޅުންތެރިންނާ ބެހޭގޮތުން ރޮޖާސް ދެއްކި ވާހަކައިގެ ސަބަބުން އޭނާ އަށް ލެސްޓާގެ ވަޒީފާ ގެއްލުމުގެ ފުރުސަތު ވެސް އެބައޮތެވެ.
ފަހަކަށް އައިސް ރޮޖާސް އަށް ވަނީ ލެސްޓާގައި ނަތީޖާ ނެރެން އުނދަގޫވެފަ އެވެ. ލެސްޓާ، މި ވަގުތު އިނގިރޭސި ޕްރިމިއާ ލީގުގެ 10 ވަނައިގައި އޮތްއިރު، އެއީ ގަދަ ހަތަރަކަށް ވުރެ 12 ޕޮއިންޓް ފަހަތުގަ އެވެ. ލީގުގައި ދެން ލެސްޓާ ކުޅޭ މެޗަކީ އަންނަ ބުރާސްފަތި ދުވަހުގެރޭ ރަށުންބޭރުގައި ލިވަޕޫލާ ދެކޮޅަށް ކުޅޭ މެޗެވެ.
ރޮޖާސް އަކީ މި ސީޒަން ފެއްޓުމުގެ ކުރިން ޓޮޓެންހަމް ހޮޓްސްޕާސްގެ ކޯޗަކަށް ގެންދަން އެ ޓީމުން ބޭނުންވި ކޯޗެކެވެ. އަންނަ ސީޒަނަށް މެންޗެސްޓާ ޔުނައިޓެޑުން ދާއިމީ އެއްބަސްވުމެއްގެ ދަށުން ކޯޗެއް ހޯދަން ކުރާ މަސައްކަތުގައި ފާރަލަމުން އަންނަ ކޯޗުންގެ ޝޯޓްލިސްޓުގައި ރޮޖާސްގެ ނަން ހިމެނެ އެވެ.
