ބާމިންހަމް (ޑިސެމްބަރު 6) - އިނގިރޭސި ޕްރިމިއާ ލީގުގައި ރޭ ސްޓީވެން ޖެރާޑް ކޯޗުކޮށްދޭ އެސްޓަން ވިލާ އިން 2-1 އިން ބްރެންޑަން ރޮޖާސްގެ އިރުޝާދުގެ ދަށުން ކުޅޭ ލެސްޓާ ސިޓީ ބަލިކޮށްފި އެވެ.
މީގެ ކުރިން ސްކޮޓްލެންޑްގެ ލީގުގައި ވަނީ ޖެރާޑް ކޯޗުކޮށްދިން ރޭންޖާސް އާއި ރޮޖާސް ހުރި ސެލްޓިކް ވާދަކޮށްފަ އެވެ. ފުރަތަމަ މެޗުން ރޮޖާސްގެ ސެލްޓިކް 1-0 މޮޅުވިއިރު، ދެ ވަނަ މެޗުން ރޭންޖާސް ކާމިޔާބުކުރީ 1-0 އިންނެވެ. ޕްރިމިއާ ލީގުގައި ޖެރާޑް ވަނީ ފުރަތަމަ ކުރިމަތިލުމުގައި ވިލާ ގޮވައިގެން ފަހަތުން އަރައި ރޮޖާސްގެ ލެސްޓާ 2-1 އިން ބަލިކޮށްފަ އެވެ.
"މިއީ އެސްޓަން ވިލާ އަށް ލިބުނު މޮޅެއް. މިއީ އަހަަންނަށް ވަކި މީހެއް އަތުން ލިބުނު މޮޅެއް ކަމަށް ނުދެކެން،" ރޭގެ މެޗަށް ފަހު ރޮޖާސް އަތުން މޮޅުވުމުން ދެކެނީ ކިހިނެއްތޯ އެހުމުން ޖެރާޑް ބުންޏެވެ.
ރޭ އެސްޓަން ވިލާ ދަނޑުގައި ލީޑުނެގީ ލެސްޓާ އިންނެވެ. ޖޭމީ ވާޑީގެ މަގާމުގައި ލެސްޓާގެ އެންމެ ކުރިއަށް ކުޅެމުން ދިޔަ ޕެޓްސަން ޑަކާ ދިން ބޯޅައަކުން މެޗުގެ 14 ވަނަ މިނިޓްގައި ލެސްޓާ އަށް ލީޑުނަގައިދިނީ ހާވީ ބާންސް އެވެ. ލެސްޓާ އަށް ލީޑު ހިފަހައްޓައިލެވުނީ ތިން މިނިޓް އެވެ. މެޗުގެ 17 ވަނަ މިނިޓްގައި އެސްޓަން ވިލާގެ އެމީ ބުއެންޑީއާ ބޮލުން ޖެހި ބޯޅަ ގޯލަށް ވަނީ އެޒްރީ ކޮންސާ ފައިގައި ޖެހިފަ އެވެ.
ފުރަތަމަ ހާފު ނިމުމުގެ ކުރިން ވިލާގެ ޖޭކޮބް ރަމްސޭ ޖެހި ގޯލެއް ރެފްރީ ބަލައިނުގަތެވެ. އެއީ ލެސްޓާގެ ކީޕަރު ކެސްޕާ ޝްމައިކަލަށް ފައުލް ކޮށްފައި ޖެހި ގޯލެއް ކަމަށް ބެލުމަށް ފަހު އެވެ.
ވިލާ މޮޅުވި ގޯލު ޖެހީ ދެ ވަނަ ހާފުގެ ކުރީކޮޅުގަ އެވެ. ދެ ވަނަ ހާފް ފަށައިގެން ނުވަ މިނިޓް ތެރޭ ޖޯން މެކްގިން ދިން ބޯޅައަކުން ކޮންސާ ވަނީ ދެ ވަނަ ގޯލެއް ޖަހައި ވިލާ މޮޅުކޮށްދީފަ އެވެ.
ޖެރާޑް މި ވަނީ ވިލާއާ ހަވާލުވިފަހުން ކޯޗުކޮށްދިން ހަތަރު މެޗުގެ ތެރެއިން ތިން މެޗުން މޮޅުވެފަ އެވެ. ބަލިވީ ޕެޕް ގާޑިއޯލާގެ މެންޗެސްޓާ ސިޓީ އަތުންނެވެ.
ލީގުގައި ދެން ވިލާ އަށް އޮތީ ޖެރާޑް 17 އަހަރު ވަންދެން ކުުޅުނު ލިވަޕޫލް މެޗެވެ. އެ މެޗު ކުޅޭނީ ލިވަޕޫލްގެ އެންފީލްޑް ސްޓޭޑިއަމްގަ އެވެ.
