ދައުލަތުގެ ހެލްތު އިންޝުއަރެންސް ސްކީމް "އާސަންދަ" އާއި ދައުލަތުން ދޭ ސަބްސިޑީތަކަށް ހަރަދުކުރަން މިއަހަރުގެ ބަޖެޓްގައި ޖެހި ފައިސާގެ ބޮޑު ބައެއް މިހާރު ހަރަދުވެފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފި އެވެ.

ފިނޭންސް މިނިސްޓްރީން ކޮންމެ ހަފްތާއަކު އާންމުކުރާ ފިސްކަލް ޑިވެލޮޕްމެންޓް ރިޕޯޓްތަކުގައިވާ ގޮތުން އާސަންދައަށް ހަރަދުކުރަން މިއަހަރުގެ ބަޖެޓްގައި ޖެހި 1.04 ބިލިޔަން ރުފިޔާގެ ތެރެއިން މިހާރު (އޭޕްރިލްމަހުގެ 20 ވަނަ ދުވަހާ ހަމައަށް) ބާކީ އޮތީ 237.8 މިލިޔަން ރުފިޔާ އެވެ. ސަބްސިޑީއަށް ހަރަދުކުރަން މިއަހަރުގެ ބަޖެޓްގައި ޖެހި 2.28 ބިލިޔަން ރުފިޔާގެ ދެބައި ކުޅަ އެއްބަޔަށް ވުރެ ބޮޑު ބައެއް ވެސް އެ ތާރީހާ ހަމައަށް ވަނީ ހަރަދުވެފަ އެވެ.

ފިނޭންސްގެ ހިސާބުތަކުގައިވާ ގޮތުން އާސަންދައަށް ކަނޑައެޅި 1.04 ބިލިޔަން ރުފިޔާގެ ތެރެއިން އޭޕްރިލް 20، ވަނަ ދުވަހާ ހަމައަށް ހަރަދުވީ 807.2 މިލިޔަން ރުފިޔާ އެވެ. އެ ތާރީހާ ހަމައަށް ސަބްސިޑީއަށް ހަރަދުވީ 1.35 ބިލިޔަން ރުފިޔާ އެވެ.

ފިނޭންސްގެ ހިސާބުތަކުގައިވާ ގޮތުން މިދިޔަ މާޗް 23، ވަނަ ދުވަހުން ފެށިގެން އޭޕްރިލް 20، ވަނަ ދުވަހާ ހަމައަށް އާސަންދައަށް ހަރަދުވި ފައިސާގެ ޖުމްލައަކީ 182.7 މިލިޔަން ރުފިޔާ އެވެ. އެ މުއްދަތުގައި ސަބްސިޑީއަށް 352.8 މިލިޔަން ރުފިޔާ ހަރަދުވި އެވެ.

ފެބްރުއަރީ 23، ވަނަ ދުވަހުން ފެށިގެން މާޗް 23، ވަނަ ދުވަހާ ހަމައަށް އާސަންދައަށް ހަރަދުވީ 166.1 މިލިޔަން ރުފިޔާ އެވެ. އެ މުއްދަތުގައި ސަބްސިޑީއަށް 223.3 މިލިޔަން ރުފިޔާ ހަރަދުވި އެވެ.

ޖެނުއަރީ 26، ވަނަ ދުވަހުން ފެށިގެން ފެބްރުއަރީ 23، ވަނަ ދުވަހާ ހަމައަށް އާސަންދައަށް ހަރަދުވީ 175 މިލިޔަން ރުފިޔާ އެވެ. އެ މުއްދަތުގައި ސަބްސިޑީއަށް 516.3 މިލިޔަން ރުފިޔާ ހަރަދުވި އެވެ.

އެ ހިސާބުތަކުން އެނގޭ ގޮތުގައި މިދިޔަ ތިން މަސް ދުވަހު ވެސް މަހެއްގެ ތެރޭގައި އާސަންދައަށް ހަރަދުވި ފައިސާގެ އަދަދު 160 މިލިޔަން ރުފިޔާއަށް ވުރެ މަދުވެފައެއް ނުވެ އެވެ. އަދި ސަބްސިޑީއަށް ހަރަދުވި ފައިސާގެ އަދަދު މަހަކަށް 200 މިލިޔަން ރުފިޔާއަށް ވުރެ މަދުވެފައެއް ނުވެ އެވެ.

އެ ރޭޓުން ހަރަދުވާ ނަމަ އާސަންދަ އާއި ސަބްސިޑީއަށް މިއަހަރުގެ ބަޖެޓްގައި ޖެހި ފައިސާ އަހަރު ދެބައިވުމުގެ ކުރިން ހުސްވާނެ ކަމަށް ބެލެވެ އެވެ.