ގިނަ އަދަދެއްގެ މީހުނާ އެކު އެއް ޖިންސުން ގުޅުން ހިންގި ކަމަށް އިއުތިރާފުވެފައިވާ ބަންގްލަދޭޝްގެ ރައްޔިތެއް ކަމަށްވާ އެމްޑީ އަލަމްގީރު ޝަރީއަތުގެ މަޖިލީހުގައި ތައުބާވުމުން އަދަބު ކުޑަކުރުމަށްފަހު ޖަލު ހުކުމެއް އިއްވައިފި އެވެ.
އެއް ޖިންސުން ގުޅުން ހިންގުމުގެ ކުށަށް ޝަރީއަތުގައި އިއުތިރާފުވެފައިވާ އަލަމްގީރްގެ މައްޗަށް ހުކުމް އިއްވުމުގެ އަޑުއެހުން މިހާރު ކުރިމިނަލް ކޯޓުގައި ކުރިއަށްދާއިރު, އެ އަޑުއެހުމުގައި ގާޒީގެ ކުރިމަތީގައި އަލަމްގީރް ތައުބާވިކަން މި ނޫހަށް ވަނީ އެނގިފަ އެވެ.
ކުށަށް ތައުބާވުމަކީ, އެ ކުށާ މެދު ދެރަވެ މާފަށް އެދި އަދި އެ ކުށް ދެން އިތުރަށް ތަކުރާރު ނުކުރާނެ ކަމަށް އެއްބަސްވުމެވެ.
އަލަމްގީރްގެ އިއުތިރާފާއި ތައުބާއަށް ރިއާޔަތްކުރުމަށްފަހު އަދަބު ލުއި ކުރުމަށްފަހު މައްސަލަ ބައްލަވާ ގާޒީ އިއްވެވީ ހަތް މަހާއި ހަ ދުވަހުގެ ޖަލު ހުކުމެކެވެ. އަވަސް ނިޔާގައި މައްސަލަ އެއް ހަފުތާގެ ތެރޭ ކުރިމިނަލް ކޯޓުން މި ނިންމީ, އިއުތިރާފުވާ މައްސަލަތަކުގައި އެގޮތަށް އަމަލުކުރުމަށް ޖިނާއީ އިޖުރާއަތުގެ ގާނޫނުގައި ބަޔާންކޮށްފައިވާތީ އެވެ.
އަލަމްގީރްގެ މައްޗަށް ކުށް ސާބިތުވެފައިވާއިރު, އޭނާއާއެކު ގުޅުން ހިންގި ކަމުގެ ތުހުމަތުވާ ރައްޔިތުންގެ މަޖިލީހުގެ ކުރީގެ މެމްބަރު މުހައްމަދު "ކާނަލް" ނަޝީދުގެ މައްޗަށް ވެސް ޝަރީއަތް ވަނީ ފަށާފަ އެވެ. އޭނާ ކުށަށް އިއުތިރާފުވެފައެއް ނުވެ އެވެ.
އޭގެއިތުރުން މި މައްސަލާގައި ގާނޫނީ ވަކީލު ނާޒިމް އަބްދުއްސައްތާރާއި ފުލުހުންގެ ވަޒީފާއެއްގައި ހުރި އަބްދުއްރަހްމާން ރަފީއުގެ މައްޗަށް ދައުވާ އުފުލާފައިވެ އެވެ. މި ޝަރީއަތްތައް ކުރިއަށް ގެންދާނީ, ޖިންސީ ކުށާ ގުޅޭ މައްސަލައަކަށްވާތީ ސިއްރުކޮށްގެންނެވެ.
މައްސަލާގައި ދައުވާ ލިބޭ މީހުން ހައްޔަރު ކުރުމަށްފަހު، މައްސަލަ ތަހުގީގުކޮށް، ޕީޖީއަށް ފޮނުވުމާއެކު އަލަމްގީރު ނޫން އެހެން މީހުން ވަނީ ދޫކޮށްލާފަ އެވެ. މި މައްސަލައިގައި ހަމައެކަނި ހަތަރު މީހުން ހައްޔަރުކުރި ނަމަވެސް އެއްޖިންސުން ގުޅުން ހިންގި ކަމަށް ތުހުމަތު ކުރެވޭ 18 މީހެއްގެ ޕާސްޕޯޓު ފުލުހުން ވަނީ ހިފަހައްޓައިފަ އެވެ.
ފުލުހުން މީގެ ކުރިން ބުނެފައިވާ ގޮތުގައި، ތަހުގީގަށް މީހުން ހައްޔަރުކުރުމާއި މިފަދަ މައްސަލަތަކުގައި އެކަށީގެންވާ މީންވަރަށް ހެއްކާއި ގަރީނާ ހޯދިފައިވާ ދައުލަތުގެ އެކި އިދާރާތަކުގައި މަސައްކަތްކުރާ ފަރާތްތައް ނިސްބަތްވާ އޮފީސްތަަކަށް އެމީހުންގެ މައްސަލަތައް ތަހުގީގު ކުރަމުންދާކަން އަންގަމުންދާ ކަމަށް ވަނީ ބުނެފަ އެވެ.
އެއާއެކު، ގިނަ އިދާރާތަކުން އަންނަނީ ވީޑިއޯތަކުގެ މައްސަލައިގައި ހިމެނޭ މީހުން ސަސްޕެންޑުކުރަމުންނެވެ. މިގޮތުން މިހާތަނަށް ކަސްޓަމްސް ދެ މުވައްޒަފަކާއި ބައެއް މިނިސްޓްރީތަކުގެ މުވައްޒަފުންނާއި އިމާމެއްގެ އިތުރުން ޓީޗަރަކާއި ސިފައިންގެ މީހެއް ވެސް ވަނީ ސަސްޕެންޑުކޮށްފަ އެވެ.
