ރާއްޖޭގެ ދެކުނުގެ މަސްވެރިކަން އިންތިހާއަށް ރަނގަޅުވެ ކެޕޭސިޓީއަށް ވުރެ އިތުރަށް މަސް ބާނަމުންދާތީ މިފްކޯއިން ހިންގާ ކޫއްޑޫއިން މަސްގަތުން ކޮންޓްރޯލްކޮށް ދޯންޏަކުން ފަސް ޓަނު ނަގަން ނިންމީ އިއްޔެ އެވެ.

މިފްކޯއިން އިއްޔެ ބުނީ ދެކުނަށް އާދަޔާ ހިލާފަށް މަސްވެރިކަން ރަނގަޅުވެ ކޫއްޑޫގެ ފްރީޒިން ކެޕޭސިޓީއަށްވުރެ އިތުރަށް މަސް ބާނަމުން ދާތީ، ދުވަހުން ދުވަހަށް މަސްވެރިން ބާނާ މަސް ކިރުމުގެ ގޮތުން ދޯންޏަކުން ކިރަމުން ދާނީ ދުވާލަކަށް ފަސް ޓަނު ކަމަށެވެ.

އެގޮތުން މިދިޔަ އާދިއްތަ ދުވަހު 770 ޓަނުގެ މަސް އަދި އަންގާރަ ދުވަހު 620 ޓަނުގެ މަސް ބާނައިގެން މަސްވެރިން އައިސް ތިބި ކަމަށެވެ. އެވެރެޖުކޮށް ދޯންޏަކަށް 12 ޓަނުގެ މަސް ބާނަމުންދާއިރު ބޮޑެތި ދޯނިފަހަރުތަކުން 25 ޓަނާއި 60 ޓަނުގެ މަސް ވަނީ ބާނާފަ އެވެ. އަދި، އިއްޔެ (ނޫސް ބަޔާން ނެރުމުގެ ވަގުތާ ހަމައަށް) 510 ޓަނުގެ މަސް ބާނާފައިވާ ކަމަށް މިފްކޯއިން ބުންޏެވެ.

މިހާލަތުގައި ދޯނިފަހަރު ކިޔުގައި ހޭދަކުރާ ވަގުތު މަދުކުރުމުގެ ގޮތުންނާއި ރަނގަޅު ފެންވަރުގައި މަސް ގަނެ ބެހެއްޓުމަށް ބޭނުންވާތީ އަންގާރަ ދުވަހު ކިޔުއަށް އެރި ދޯނިތަކުގެ މަސް ކިރުމުގެ މަސައްކަތް މިހާރު ކުރަމުންދާ ކަމަށް ބަޔާނުގައި މިފްކޯ އިން އިއްޔެ ބުންޏެވެ.

"މިހާރު ކިޔުގައި ތިބި ދޯނިފަހަރުގައި ހުރި މަސް ކިރާ، ފްރީޒް ކުރުމަށް ބޭނުންވާތީ މިއަދުން ފެށިގެން [އިއްޔެއިން ފެށިގެން] ކިޔުގައި ހުރި ދޯނިފަހަރުގެ މަސް މެނޭޖް ކުރެވެންދެން ނިންމާފައި ވަނީ ދޯންޏަކުން ފަސް ޓަނުގެ މަސް ކިރުމަށް،" މިފްކޯއިން އިއްޔެ ނެރުނު ބަޔާނުގައި ބުންޏެވެ.

ނަމަވެސް، ކޫއްޑޫ އާއި އައްޑޫ ފިޝަރީޒް ކޮމްޕްލެކްސްގައި މިހާރު ކިޔު ނަމްބަރު ދީފައިވާ ދޯނިފަހަރުގެ މަސް ކިރާ ނިމެންދެން ކޮންޓްރޯލްނުކޮށް ނަގަމުންދާނެ ކަމަށް ވެސް އެ ކުންފުނިން ބުނެ އެވެ.

ކެޕޭސިޓީއަށް ބަލައިގެން މަސް ބޭނޭނެ ގޮތެއް ނެތް

ކޫއްޑޫ ކައިރިއަށް މަސްކިރަން ގޮސް އޮތް "ތެދުމަގު" ދޯނީގެ ކެޔޮޅު މި ނޫހަށް އިއްޔެ ބުނީ މިފްކޯގެ ކެޕޭސިޓީއަށް ވިސްނައިގެން މަސް ބޭނޭނެ ގޮތެއް ނޯންނާނެ ކަމަށެވެ. އަދި، އެކަމުގެ ސަބަބުން މަސްބާނާ މިންވަރު މަދުވެ ދަތިތަކާއި ކުރިމަތި ވެދާނެ ކަމަށް އޭނާ ބުނެ އެވެ.

"އަނެއްހެން އަހަރުމެންނަށް ކިހިނެތް އިނގޭނީ ކެޕޭސިޓީއަށް ވުރެ ގިނަ ވާނެ ކަމެއް. ކޮންމެ ދޯންޏަކުން ބާނާނީ މިވަރު ކަމެއް؟ މިކަމަށް އޮތް ހައްލަކީ ސްޓޮރޭޖް އިތުރުކުރުން ހަމަ. ހުވަދުއަކީ އަބަދު ވެސް މަސްވެރިކަން އެންމެ ރަނގަޅު ތަން. އެހެންވީމަ މިކޮޅަށް އެބަ އިތުރުކުރަން ޖެހޭ ކަންނޭނގެ. ކޫއްޑޫއިން އެކަނި ނުވޭ،" "ތެދުމަގު" ދޯނީގެ ކެޔޮޅު ބުންޏެވެ.

އޭނާ އިއްޔެ ބުނީ މަސްވެރިންނަށް މަސްކިރުމުގެ އިތުރުން އައިސް ލިބުމުގައި ވެސް ދަތިތަކާ ކުރިމަތިވާ ކަމަށެވެ. އަދި، ތިނަދޫގައި މިހާރު އަޅަމުންދާ އައިސް ޕްލާންޓުގެ މަސައްކަތް ކުރިއަށް ނުދާކަމަށާއި އައްޑޫގައި އެޅި ސްޓޯރޭޖް ޕްލާންޓުގެ ކެޕޭސިޓީ ކުޑަކަމުން ބޭކާރު ވެފައިވާ ކަމަށް އޭނާ ބުނެ އެވެ. އެކަންކަމާ މަސްވެރިންގެ މެދުގައި ހިތްހަމަނުޖެހުން ހުރި ކަމަށް އޭނާ އިއްޔެ ފާހަގަކުރި އެވެ.

މިފްކޯއަށް މަސް ގަންނަ މިންވަރު އިތުރުކުރުމަށާއި، ފިނިކޮފައި މަސް ބެހެއްޓޭ ޖާގަ އިތުރުކުރުމަށް މަޝްރޫއުތައް ވަނީ ފަށައިފަ އެވެ. އެގޮތުން ކޫއްޑޫ ބަނދަރު ގެ ޖާގަ ކުޑަވުމާއެކު މަސްވެރިކަން ކުރާ ބޮޑެތި އުޅަނދުތައް އެބަނދަރުގެ ބޭނުންކުރަން ދަތިތަކަކާއި ކުރިމަތިވެ މަސްވެރިކަމުގެ ފަހި މޫސުމްގައި މަސްކިރުން ލަސްވާ މައްސަލައަށް ހައްލެއް ހޯދުމަށްޓަކައި ފަޅުގެ ޖާގަ ބޮޑުކޮށް، ކޯލްޑް ސްޓޯރޭޖް ކެޕޭސިޓީ އިތުރު ކުރުމަށް ވަނީ ނިންމައިފަ އެވެ. މި މަޝްރޫއުގެ ދަށުން ކޫއްޑޫގެ ކޯލްޑް ސްޓޯރަށް އިތުރުކުރެވޭ 4،000 ޓަނާއެކު ޖުމްލަ 6،000 ޓަނަށް ޖާގަ އިތުރު ވާނެ އެވެ.

ފެލިވަރުގައި މުޅިން އަލަށް 4،000 ޓަނުގެ ކޯލްޑް ސްޓޯރޭޖަކާއި 200 ޓަނުގެ ބްރައިން ފްރީންޒިން އަދި 80 ޓަނުގެ އާރުއެސްޑަބްލިޔޫ ސިސްޓަމެއް ގާއިމްކުރުމާއި، 3،500 ޓަނުގެ ކާގޯ ވެސަލް ކައިރިކުރެވޭ ފެންވަރަށް ތަރައްގީ ކުރުމާއި، މަސްކިރާނެ ޖެޓީއަކާއި ފެލިވަރުގެ ބޭނުންތަކަށް އިތުރު ޖެޓީއެއް ތަރައްގީ ކުރުމުގެ އަމަލީ މަސައްކަތް ވަނީ ފެށިފައެވެ. އަދި 100 ޓަނުގެ ޕްރޮސެސިސް ކޭނެރީއެ އެއް ވެސް ފެލިވަރުގައި ގާއިމުކުރެ އެވެ.

ނިމިގެންދިޔަ 2021 ވަނަ އަހަރަކީ މިފްކޯއިން އެންމެ ގިނައިން މަސް ގަތް އަހަރެވެ. އެގޮތުން މިދިޔަ އަހަރު މަސްވެރިންގެ އަތުން 58،350 ޓަނުގެ މަސް މަސް މިފްކޯއަށް ގަތެވެ. 2020 ވަނަ އަހަރު 49،000 ޓަނުގެ މަސް ގަނެފައިވާއިރު، އޭގެ ކުރީ އަހަރު ގަނެފައިވަނީ 48،000 ޓަނުގެ މަހެވެ.

ބައެއް މުހިންމު ހަބަރުތައް

• ރާއްޖޭގައި އެންމެ ބޮޑު އަދި އެންމެ ގިނަ ދުވަސްވަންދެން ނެރުނު ނޫސް، ހަވީރު ނޫހުގެ މިލްކުވެރިކަމުގެ މައްސަލައިގައި ސުޕްރީމް ކޯޓުގެ ނިންމުން މުރާޖައާ ކުރުމަށް ހުށަހެޅި މައްސަލައިގެ އަޑުއެހުންތައް ނިންމާލީ އިއްޔެ އެވެ.

• ރާއްޖޭގެ ހަތް ރަށެއްގައި ހޮސްޕިޓަލު އަޅައިދޭނެ ބަޔަކު ހޯދުމަށް ސަރުކާރުން އިއުލާނުކުރީ އިއްޔެ އެވެ.

• ސީލައިފް ފްލެޓްތަކުގެ މައްސަލައިގައި ހިޔާނާތުގެ ދައުވާ އުފުލާފައިވާ އެ ކުންފުނީގެ ވެރިޔާ އަހުމަދު މޫސާ މުހައްމަދު (އަންމަޓީ) ބަންދުން ދޫކޮށްލަން ކްރިމިނަލް ކޯޓުން ނިންމި ނިންމުން ހައި ކޯޓުގައި އިސްތިއުނާފު ކުރަން ޖެހޭ މުއްދަތުގެ ތެރޭގައި ނުކުރުމުން އޭނާ ސަލާމަތްވީ އިއްޔެ އެވެ.

ދުވަހުގެ ކޯޓޭޝަން

ކުންފުނިތައް އުފައްދަނީ ސަރުކާރުން ބޭނުންވެގެން ނޫން ކަމަށާއި ވިޔަފާރީގެ އުސޫލުން އެ ހިދުމަތްތައް ދޭނެ އަމިއްލަަ ކުންފުނިތައް ނެތުމުން ކަމަށް ހާމަކުރައްވަމުން ކެނދިކުޅުދޫ ދާއިރާގެ މެމްބަރު އަހްމަދު އީސާ އިއްޔެގެ މަޖިލިސް ޖަލްސާގައި ވިދާޅުވީ:

"ކާކު ފެލިވަރު މިއަދު ގަނެގެން އެތަނަށް 50 މިލިޔަން ޑޮލަރު އިންވެސްޓުކޮށްގެން، އަޅުގަނޑުމެންގެ މަސްވެރިން މި އުއްމީދުކުރާ އަގުގައި މަސް ގަންނާނީ؟"

ދުވަހުގެ ފޮޓޯ

އެޕްރީލް 5، 2022: މަހަލްދީބު ފައުންޑޭޝަނުން ރޯދަމަހު ކުރިއަށްގެންދާ "ގިފްޓް އަ ސްމައިލް" ކެމްޕޭނަށް ބޭނުންވާ ކެއާ ޕެކޭޖުތައް ބަންދުކުރުމުގައި ގިޔާސުއްދީން އިންޓަނޭޝަނަލް ސްކޫލްގެ ދަރިވަރުން ހަރަކާތްތެރިވަނީ. މި ޕެކޭޖުތައް ހަތް ސަރަހައްދެއްގައި ބަހާއިރު 11 ބާވަތެއްގެ ތަކެތި ހިމެނޭނެ --- ފޮޓޯ: މުހައްމަދު ޝާބިން/އަދަދު

ދިރާސާތަކުން ކިޔާލުމަށް

"މޯލްޑިވްސް ފިޝަރީ ސާވޭ 2015"

މިއީ ރާއްޖޭގައި މަސްވެރިކަމުގެ ސިނާއަތް އޮތް ހާލަތާއި ކަނޑުފަޅުތަކުގައި ދިރުމަށް މަސްވެރިކަމުގެ ސަބަބުން ކުރާ އަސަރުތައް ދެނެގަތުމަށް 2015 ވަނަ އަހަރު މޯލްޑިވްސް މެރިން ރިސާޗު އިންސްޓިޓިއުޓް އިން ކުރިއަށް ގެންގޮސްފައިވާ ދިރާސާއެކެވެ.