ޓެކްސީ ދަތުރުތަކުގެ އަގު ބޮޑުކުރުމަށް ސަރުކާރުން ހުއްދަ ނުދެނީސް، އަމިއްލަ އަގުތަކެއްގައި ޓެކްސީތަކުން ދަތުރުކުރަމުންދާތީ ކަނޑައަޅާފައިވާ އަގަށް ވުރެ ބޮޑުއަގު ނަގާ ޓެކްސީތަކުގެ މައްސަލަ ބަލައި ފިޔަވަޅު އަޅާނެ ކަމަށް ފުލުހުން ވެސް ބުނެފި އެވެ.
ޓެކްސީތަކުން ކަނޑައަޅާފައިވާ އަގަށް ވުރެ ބޮޑު އަގުގައި ހޮނިހިރު ދުވަހުން ފެށިގެން ދަތުރުކުރަމުންދާތީ "އަދަދު" އިން ސުވާލުކުރުމުން ފުލުހުން ބުނީ އެ ފަދަ މައްސަލައެއް ހުށަހަޅައިފިނަމަ ބަލާނެ ކަމަށެވެ.
"އެފަދަ މައްސަލައެއް ހުށަހަޅައިފި ކަމުގައިވާނަމަ އެ މައްސަލައެއް ބަލައި، އެއްގަމު ދަތުރުފަތުރުގެ ގާނޫނުގައިވާ ގޮތުގެ މަތިން ފިޔަވަޅު އަޅާނެ،" ފުލުހުންގެ މީޑިއާ އޮފިޝަލް "އަދަދު" އަށް ވިދާޅުވި އެވެ.
މިފަދަ އެއްވެސް މައްސަލައަކާ ގުޅިގެން މިހާތަނަށް އެއްވެސް ޓެކްސީއެއް ނުވަތަ ޓެކްސީ ސެންޓަރަކާ ދެކޮޅަށް ފިޔަވަޅު އަޅާފައިވާކަން ފުލުހުން ހާމަކޮށްފައެއް ނުވެ އެވެ.
ޓެކްސީ ގަވާއިދުގެ ދަށުން ކަނޑައަޅާފައިވާ އަގަށް ވުރެ ބޮޑު އަގެއް ނުނެގުމަށާއި އަދި ޓެކްސީގެ ހިދުމަތަށް ބުރޫ ނާރާނެ ގޮތަށް ޓެކްސީގެ ހިދުމަތް ދިނުމަށް މިއަދު ޓްރާންސްޕޯޓު މިނިސްޓްރީން ވެސް ވަނީ އިލްތިމާސްކޮށްފަ އެވެ.
"ގަވާއިދުން ބާރުލިބިގެން ކަނޑައަޅާފައިވާ އަގަށް ވުރެ ބޮޑުއަގު ނަގާ ޓެކްސީ ޑްރައިވަރުންނާއި އަދި ޓެކްސީ ސެންޓަރުތަކާމެދު ގަވާއިދު ނަންބަރު 1475-R/2013 (ޓެކްސީ ގަވާއިދު) ގެ 20 ވަނަ މާއްދާގެ ދަށުން ފިޔަވަޅު އަޅާނެ ކަމުގައި ދަންނަވަމެވެ،" ޓްރާންސްޕޯޓުން މިއަދު ނެރުނު ބަޔާނުގައިވެ އެވެ.
ޖުމްލަ 16 ޓެކްސީ ސެންޓަރު ހިމެނޭހެން އަގު ބޮޑުކުރުމަށް ޓްރާންސްޕޯޓް މިނިސްޓްރީ އަށް ހުށަހެޅީ މާޗް 7، 2022 ގަ އެވެ. ނަމަވެސް، އަގުތައް ބަދަލުކުރަން ހުއްދަ ނުދިނުމުން މިދިޔަ ހަފްތާގެ ހޯމަ އަދި ބުރާސްފަތި ދުވަހު ޓެކްސީ ޑްރައިވަރުން މުޒާހަރާ ވެސް ކުރި އެވެ.
މުޒާހަރާގެ ބައިވެރިން މިދިޔަ ބުރާސްފަތި ދުވަހު ކާރުތަކާއެކު މާލެ އައުމަށް ވެސް މަސައްކަތް ކުރި އެވެ. ނަމަވެސް ފުލުހުން ވަނީ އެމީހުން ހުއްޓުވި އެވެ. އެއާއެކު، ހޮނިހިރު ދުވަހުން ފެށިގެން ނަގަމުން އަންނަނީ ބޮޑުކުރި އަގުތަކެވެ.
ބައެއް ޓެކްސީތަކުން މާލެ ތެރޭގެ ދަތުރުތައް ކުރަނީ ރަސްމީކޮށް ނެގުމަށް ހުއްދަ އޮންނަ 25ރ. ގެ ބަދަލުގައި ފަސް ރުފިޔާ ބޮޑުކޮށް 30ރ. އަށެވެ. އަދި މާލެއިން ހުޅުމާލެ އަށް ބައެއް ޓެކްސީތަކުން ދަތުރު ކުރަނީ 100ރ. އަށެވެ. މާލެއިން ހުޅުމާލެއަށް އަދި ހުޅުމާލެއިން މާލެއަށް ކުރާ ދަތުރުތަކަށް އަސްލު ނެގޭނީ 75ރ. އެވެ.
