ރާއްޖޭގައި ސަގާފީ ޓޫރިޒަމް ކުރިއެރުވުމުގެ ގޮތުން އަންނަ އަހަރުން ފެށިގެން ބައިނަލްއަގުވާމީ ޔޮޓް ރެލީއެއް ބާއްވާނެކަން މޯލްޑިވްސް އިންޓެގްރޭޓަޑް ޓޫރިޒަމް ޑިވެލޮޕްމަންޓް (އެމްއައިޓީޑީސީ)އިން މިއަދު ބުނެފި އެވެ.
ޓޫރިޒަމްގެ ރަން އަހަރާ ގުޅުވާ "ސަވާދީއްތަ ދަތުރު"ގެ ނަމުގައި ބާއްވާ މި ޔޮޓް ރެލީ އިވެންޓުގައި ހެރިޓޭޖް މިނިސްޓްރީ އާއި ސިވެކް އަދި އެމްއެމްޕީއާރްސީ ވެސް ބައިވެރިވާނެ އެވެ.
ގައުމީ ދާރުލް އާސާރުގައި ބޭއްވި ހާއްސަ ހަފުލާއެއްގައި މި އިވެންޓު އިފުތިތާހުކޮށްދެއްވީ ވޮޔޭޖަސް މޯލްޑިވްސްގެ މެނޭޖިން ޑިރެކްޓަރު ސޮލާހް ޝިހާބާއި އެމްއައިޓީޑީސީގެ މެނޭޖިން ޑިރެކްޓަރު މުހައްމަދު ރާއިދު އެވެ. މި ހަފުލާގައި އިވެންޓުގެ ތީމް ސޯންގާއި ރަސްމީ ވެބްސައިޓު ވެސް ވަނީ ލޯންޗުކޮށްފަ އެވެ.
މި ޔޮޓް ރެލީއާ ގުޅޭގޮތުން އެމްއައިޓީޑީސީގެ ރާއިދު ވިދާޅުވީ، މިއީ ރާއްޖޭގެ ސަފާގަތާއި އާސާރުތަކާއި ތަރިކަތައް ޓޫރިޒަމުގެ ތެރެއަށް ވެއްދުމަށް ސަރުކާރުން ގެންގުޅޭ ވިސްނުމަށް އެއްބާރުލުން ދިނުމަށް ބާއްވާ އިވެންޓެއް ކަމަށެވެ. އަދި މަގުސަދަކީ ރާއްޖޭގެ ސަގާފަތާއި އާދަކާދަތައް ބައިނަލްއަގްވާމީ އޯޑިއެންސަކަށް އިޝްތިހާރުކުރުން ކަމަށް އޭނާ ވިދާޅުވި އެވެ.
މި އިވެންޓަކީ ކޮންމެ އަހަރަކު ވަކި ތީމްއެއް ކަނޑައަޅައިގެން ބާއްވާ އިވެންޓެކެވެ. އެގޮތުން ފުރަތަމަ ޔޮޓް ރެލީގެ ތީމާއި ނަން ރައްދުވަނީ ބޮޑުތަކުރުފާނަށެވެ. އަދި ފުރަތަމަ ދަތުރުގައި ދަތުރުކުރަން ހަމަޖެހިފައިވާ 15 ރަށަކީ ބޮޑުތަކުރުފާނުގެ ހަޔާތުގެ ކަންކަމާއި އާސާރުތައް ހިމެނޭ ރަށްރަށް ކަމަށް އެމްއައިޓީޑީސިން ވަނީ ބުނެފަ އެވެ. މި ރަށްރަށުގެ ތެރޭގައި މީހުން ދިރިއުޅޭ ރަށްރަށާއި ދިރިނޫޅޭ ރަށްރަށް ވެސް ހިމެނެ އެވެ.
މި ދަތުރުގައި ޔޮޓު ދަތުރުކުރަން ހަމަޖެހިފައިވާ ރަށްތަކަކީ ބޮޑުތަކުރުފާނު ނިސްބަތްވާ ހއ. އުތީމުގެ އިތުރުން ހއ. އުލިގަން، ހއ. ހޯރަފުށި، ހއ. މަތީރަށް، ހއ. ގައްލަންދޫ، ހއ. އިހަވަންދޫ، ހއ. ތަކަންދޫ، ހއ. ބާރަށް، ހދ. ނޮޅިވަރަންފަރު، ހދ. ކޭލަކުނު، ށ. ފުނަދޫ، ށ. ނަލަންދޫ، ށ. ލަންދޫ އަދި ބ. ތުޅާދޫ އަދި ކުޅުދުއްފުށި ސިޓީއަށެވެ.
އެމްއައިޓީޑީސީން ބުނި ގޮތުގައި މިހާރު ވެސް މި އިވެންޓުގައި ބައިވެރިވާނެ ދެ ޔޮޓެއް ވަނީ ހަމަޖެހިފަ އެވެ. އަދި ކުރިޔަށް އޮތް ތަނުގައި ވެސް އިތުރު ޔޮޓުތައް ގުޅޭނެ ކަމަށް އެމްއައިޓީޑީސީން ބުންޏެވެ.
