ޑޮކްޓަރުން ލަފާ ދީފައިވާ މީހެއްނަމަ، ކަސްރަތު ކުރުމަށް ބޭރަށް ނުކުމެ އުޅުމުގެ ހުއްދަ ދެމުންދާ ކަމަށް ފުލުހުން ބުނެފި އެވެ.

މާލޭގައި ކޮވިޑްގެ ހާލަތު ގޯސްވެފައިވާތީ، ދެ ހަފުތާއަށް އެޅި ހަރުކަށި ފިޔަވަޅުތަކާއެކު، ހުއްދަ ހޯދައިގެން ނޫނީ ގެއިން ބޭރަށް ނުކުމެ ނޫޅެވެ އެވެ.

އެގޮތުން، ކޮންމެ ގެއަކަށް ދެ ފާސް ދޫކުރަމުން ދަނީ ހެނދުނު 8:00 ން ފެށިގެން ހަވީރު 4:00 އާ ހަމައަށް ޒަރޫރީ ބޭނުންތަކުގައި ބޭރަށް ނުކުތުމަށެވެ. އޭގެ ތެރޭގައި ކަސްރަތު ކުރުން ނުހިމެނެ އެވެ.

އޭގެއިތުރުން އެންމެ ގިނަ ބަޔަކު ކަސްރަތު ކުރުމަށް ދުވަން ނުވަތަ ފެތުމަށް ނުކުންނަ ފަތިސް ވަގުތާއި ރޭގަނޑުގެ ވަގުތަކީ ކާފިއު ހިންގާ ގަޑިތައް ކަމުން އެ ގަޑިތަކުގައި ބޭރަށް ނުކުމެ އުޅުމުގެ ހުއްދައެއް ނޯވެ އެވެ.

ކާފިއު ގަޑިތަކުގައި ބޭރަށް ނުކުމެ އުޅެވޭނީ ހަމައެކަނި ހާއްސަ ހުއްދަ ލިބިފައިވާ ފަރާތްތަކަށެވެ.

މި ފިޔަވަޅުތަކާ ގުޅިގެން އާންމުކޮށް ކަސްރަތަށް ދިޔުން ހުއްޓިފައިވީ ނަމަވެސް، ޑޮކްޓަރުން އެމީހަކަށް ކަސްރަތަށް ދުވުން ނޫނީ ފެތުމަށް އަންގާފައިވާ މީހެއްނަމަ، އެކަން ފުލުހަށް އެންގުމުން ހުއްދަ ދަނީ ދޫކުރަމުންނެވެ.

ފުލުހުންގެ މީޑިއާ އޮފިޝަލް މިރޭ ވިދާޅުވި ގޮތުގައި، އެގޮތަށް ޑޮކްޓަރުން ލަފާ ދީފައިވާ މީހުންނަށް ވަކި ހާއްސަ ގަޑިތަކެއްގައި ކަސްރަތަށް ނުކުމެ އުޅުމަށް ހާއްސަ ހުއްދަތަކެއް މިހާރު ވަނީ ދޫކޮށްފަ އެވެ.

"މި ހާއްސަ ހުއްދަ ދޫކުރަނީ ކަސްރަތަށް ދިޔުމަކީ ކޮންމެހެން ޒަރޫރީ ކަމަކަށްވާ ހާލަތްތަކުގައި އެކަނި،" އޮފިޝަލް ވިދާޅުވި އެވެ.

އޮފިޝަލް ވިދާޅުވި ގޮތުގައި، ކަސްރަތަށް ބޭރަށް ނުކުތުމުގެ ހުއްދަ ދޫކުރަނީ އެމީހެއްގެ މެޑިކަލް ސެޓްފިކެޓްތައް ފުލުހަށް ހުށަހެޅުމުން، އެކަމުގައި އެޗްޕީއޭގެ ލަފާ ހޯދުމަށްފަހު އެވެ. އެހެންކަމުން މިއީ ވަރަށް ހާއްސަ ހާލަތްތަކެއްގައި ނޫނީ ދޫކުރާނެ ހުއްދައެއް ނޫނެވެ.

މިގޮތަށް ދޫކުރާ ހުއްދައިގައި އެމީހަކަށް ކަސްރަތު ކުރުން ކޮންމެހެން މުހިންމު ކަމާއި އެ ހުއްދަ ދޭ ގަޑި އާއި ކަސްރަތު ކުރުމަށް ދިޔުމަށް ހުއްދަ ދޭ ސަރަހައްދު ފާހަގަކޮށްފައި ހުރެ އެވެ.

އޭޑީކޭ ހޮސްޕިޓަލްގެ އެމްޑީ އަހުމަދު އަފްއާލު ވިދާޅުވި ގޮތުގައި، ކަސްރަތު ކުރުމަށް ގިނަ ބަޔަކަށް ޑޮކްޓަރުން ލަފާދީފައިވާނެއިރު، މިފަދަ ހާއްސަ ހުއްދައެއް ދޫކުރުމަކީ ރަނގަޅު ކަމެއް ކަމަށެވެ.

މާލޭގައި ދެ ހަފުތާއަށް ހަރުކަށި ފިޔަވަޅުތަކެއް އަޅައި ތަންފީޒު ކުރަމުންދާއިރު، ކުރިއާ އަޅާބަލާއިރު ކޮވިޑަށް ޕޮޒިޓިވްވާ މީހުންގެ އަދަދު ނިސްބަތުން ވަނީ ވަރަށް ބޮޑަށް ދަށަށް ގޮސްފަ އެވެ.

އެގޮތުން، މިދިޔަ 24 ގަޑިއިރު ތެރޭގައި މާލޭން ކޮވިޑަށް ޕޮޒިޓިވްވެފައިވަނީ 373 މީހުންނެވެ. އިއްޔެ މާލޭން ޕޮޒިޓިވްވެފައިވަނީ 488 މީހުންނެވެ.

މިދިޔަ 24 ގަޑިއިރުގެ ތެރޭގައި ޓެސްޓްކޮށްފައިވަނީ ޖުމްލަ 5،685 މީހުންނެވެ. އިއްޔެ ޓެސްޓްކޮށްފައިވަނީ 5،310 މީހުންނެވެ.

މިއަދު ރާއްޖޭން ކޮވިޑަށް ޕޮޒިޓިވްވި ޖުމްލަ މީހުންގެ އަދަދަކީ 768 އެވެ. އޭގެ ތެރޭގައި 357 މީހުން ރަށްރަށުން ޕޮޒިޓިވްވެފައިވާއިރު، ރިސޯޓުތަކުން 15 މީހަކު ޕޮޒިޓިވްވެފައިވެ އެވެ.

ޖުމްލަ އަދަދަށް ބަލާއިރު، އިއްޔެއަށްވުރެ މިއަދު ޕޮޒިޓިވްވީ މީހުންގެ އަދަދު ގިނަ އެވެ. އެގޮތުން އިއްޔެ ކޮވިޑަށް ޕޮޒިޓިވްވެފައިވަނީ ޖުމްލަ 710 މީހުންނެވެ. އޭގެ ތެރެއިން ރަށްރަށުން ޕޮޒިޓިވްވީ މީހުންގެ އަދަދަކީ 202 އެކެވެ.