ކިޔުންތެރިން ބޭނުން ހިޔާލެއް ސޯޝަލް މީޑިއާގައި ފާޅުކުރެވެން އެބައޮތެވެ. އަދި ނޫސްތަކުގެ ކޮމެންޓް ސެކްޝަން ވެސް އެ އޮންނަނީ ކިޔުންތެރިންގެ ހިޔާލުތަކަށް މަރުހަބާ ކިޔައިގެންނެވެ. އެކަމަކު "އަދަދު" އިން ބޭނުންވަނީ ތަންކޮޅެއް އާރުލާ ގޮތެއްގައި ކިޔުންތެރިންނަށް، އެ ކިޔުންތެރިންގެ ހިޔާލާއި ފިކުރު މުޖުތަމައުގެ ތެރެއަށް ދޫކޮށްލެވޭނެ މަގެއް ތަނަވަސްކޮށްދޭށެވެ.

އެކަމަށްޓަކައި އަދަދު އިން މި ފަށަނީ "އަދަދު ސިޓީބިިޓީ" އެވެ.

ސިޔާސަތާ މެދު ފާޑެއް ކިޔަން އޮތީ ހެއްޔެވެ؟ ކަމެއް އިސްލާހުކުރަން މުއައްސަސާއެއްގެ ސަމާލުކަމަށް ގެންނަން ބޭނުންވަނީ ހެއްޔެވެ؟ ޝަކުވާއެއް ބޮޑުވެ އާއްމުންނާ ހިއްސާކުރަން ބޭނުންވީ ހެއްޔެވެ؟ "އަދަދު" ގެ އެޑިޓަރަށް އެޑްރެސްކޮށް [email protected] އަށް އީމެއިލްކޮށްލާށެވެ. އޭގެ ތެރެއިން އެޑިޓޯރިއަލް ސިޔާސަތާ ފުށުން ނާރާ ސިޓީތައް ވީ އެންމެ އަވަހަށް އަދަދުގައި ޝާއިއުކުރެވޭނެ އެވެ. ޖަހައިދޭނީ އަކުރުން އަކުރަށް ފިލިން ފިއްޔަށެވެ. އެކަމަކު އަދަދުގެ ސްޓައިލް ގައިޑަށް ފެއްތުމަށްޓަކައި ބަހަވީ ގޮތުން ކޮންމެވެސް ވަރަކަށް ކޮށައި މަށައިލެވޭނެ އެވެ.

"ލެޓާސް ޓު ދަ އެޑިޓާ" މިއީ ދުނިޔެ އާއި ރާއްޖޭގައި ވެސް ނޫސްވެރިކަމުގައި އިހުގައި ހިނގި ސެކްޝަނެކެވެ. އޭރު އާއްމުންގެ މީހެއްގެ ހިޔާލުތަކާއި ފިކުރުތައް މުޖުތަމައުގެ ތެރެއަށް ދޫކޮށްލެވެން އޮންނަ ހަމައެކަނި މަގަކީ އެއީ އެވެ. އެކަމަކު ސޯޝަލް މީޑިއާ އައުމާއި އޮންލައިން ނޫސްވެރިކަން ފެށުމާ އެކު، އާއްމުންނަށް ވެސް އިންތިހާ އަށް ބޮޑު އޯޑިއެންސެއް އެ ޒަރިއްޔާ އިން ލިބުމުން، އެ ސެކްޝަން އޮޔާ ދިޔައީ އެވެ.

"އަދަދު" އިން ބޭނުންވަނީ އެ ސެކްޝަން ގާދޫކޮލުން އެތެރެކޮށް، ޒަމާނުގެ ތެރެއަށް ގެއްލިފައިވާ ނޫސްވެރިކަމުގެ މުހިއްމު ސަގާފަތެއް ދިރުވުމަށެވެ. އަނެއް ބޭނުމަކީ ކިޔުންތެރިންގެ އިލްމީ އޮއްޓަރު ހުރި ލިޔުންތަކަކަށް ޖާގައެއް ދިނުމެވެ.

ނޫސްވެރިކަމުގައި ހަބަރު ރިޕޯޓްކުރުމުގެ އިތުރުން ދެން އެންމެ މުހިއްމު އެއް ބަޔަކީ ބިނާކުރުވަނިވި ފާޑުކިޔުމެވެ. އެފަދަ ލިޔުންތަކުން "އަދަދު" ގެ ކޮލަމް ސެކްޝަން މިހާރު ވެސް މުއްސަންޖެވެ. ނޫހުގެ އެޑިޓޯރިއަލް ބޯޑުގެ މެމްބަރުންނާއި ދާއިރާތަކުގެ ބައެއް ތަޖުރިބާކާރުންގެ ކޮލަމްތައް ގެނެސްދެ އެވެ. އަދި މުނާސަބަތު ވަގުތުތަކުގައި، އޮޕް-އެޑްސްތައް ވެސް އަންނަނީ ޝާއިއުކުރަމުންނެވެ. އޭގެ ތެރޭގައި ސިޔާސީ، އިލްމީ، ދީނީ، އަދަބީ، ތާރީހީ އަދި ފައިސަލޫފި ލިޔުންތައް ހިމެނެ އެވެ.

ކިޔުންތެރިންގެ ސިޓީބިޓީތަކުން މި ނޫހަށް އިތުރު މުއްސަނދި ކަމެއް ލިބޭނެ ކަމާ މެދު ޝައްކެއް ނެތެވެ.