ބ. ދަރަވަންދޫ އިން ފުލުހުން ބުދަ ދުވަހުގެ ރޭ ހައްޔަރުކޮށްފައިވަނީ ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ސައިކަލެއް ގޮއްވާލި މައްސަލައާ ގުޅުން ހުރި މީހެއްކަން 'އަދަދު' އަށް ކަށަވަރުވެއްޖެ އެވެ.
މިހާތަނަށް ފުލުހުން މިކަން ކަށަވަރު ކޮށްދީފައެއް ނުވެއެވެ.
ބާރުގަދަ އައީޑީ ސައިކަލްގެ ތެރެއަށް ލައި ގޮއްވާލީ ރައީސް ނަޝީދު ދިރިއުޅުއްވާ ގ. ކެނެރީގެ އިން ނުކުމެވަޑައިގެން ކާރަށް އަރާވަޑައިގަންނަވާ ވަގުތުކޮޅާ ދިމާކޮށެވެ. އެ ސައިކަލް ބަހައްޓާފައިހުރީ ކެނެރީގޭ ހުންނަ ނީލޯފަރުހިނގުން، މަޖީދީ މަގާ ވީ ކަންމަތީގަ އެވެ.
ދަރަވަންދޫގައި ހިންގި ހާއްސަ އޮޕަރޭޝަނެއްގައި ދިވެހި ފިރިހެނަކު ހައްޔަރުކޮށްފައިވާ ކަމަށް ފުލުހުން ބުނި ނަމަވެސް އިތުރު މައުލޫމާތެއް އަދި ނުދެ އެވެ. ހައްޔަރުކުރި މިހާގެ ވަނަވަރު ވެސް އަދި ފުލުހުން ހާމަކޮށްފައެއް ނުވެ އެވެ.
"އަދަދު" އަށް ޔަގީންވެފައިވާ ގޮތުގައި ފުލުހުން އެ ރަށުން ހައްޔަރުކޮށްފައިވަނީ ލ.ގަން، ދުންފިނި އުފާ، އަހުމަދު ފާތިހު ނަމަކަށް ކިޔާ މީހެކެވެ. އޭނާއަކީ ރައީސް ނަޝީދު އަވަހާރަކޮށްލަން ސައިކަލެއް ގޮއްވާލި މައްސަލައާ ގުޅުންހުރި މީހެއްކަންވެސް ވަނީ ކަށަވަރުވެފަ އެވެ.
ލ. ކަޅައިދޫ އަށް އުފަން ފާތިހު ފަހުން އެ އަތޮޅު ގަމަށް ބަދަލުވެފައިވާއިރު، އޭނާ ދަރަވަންދޫއަށް ގޮސްފައިވަނީ އެރަށު މީހަކާ ކައިވެނިކުރުމަަށް ކަމަށް އޭނާއާ ހަވާލާދީ އެރަށު ބައެއް މީހުން ބުނެފައި ވެއެވެ. އޭނާ ކައިވެނި ކުރީ އޮންލައިންކޮށް ކަމަށް އެނގިފައިވާކަމަށް ބައެއް މީހުން ބުނި ނަމަވެސް އެ މައުލޫމާތުގެ ސައްހަކަން އަދި ކަށަވަރުކުރެވިފައެއް ނުވެ އެވެ.
ކުރިން ކެބިން ކްރޫއެއްގެ ވަޒީފާގައި އުޅުނު ފާތިހު, ހަރުކަށި ފިކުރުގެ މީހުންނާއެކު އުޅެން ފަށައި، ބަދަލުވާން ފެށި ވިސްނުމާއެކު އޭނާ ވަނީ ވަޒީފާއިންވެސް ވަކިވެފަ އެވެ.
މި މަހުގެ 10 ވަނަ ދުވަހު އެރަށަށް ދިޔަ ފާތިހު ހައްޔަރުކުރީ ކަރަންޓީނުގައި ހުއްޓައިކަމަށް ވެސް "އަދަދު"އަށް ވަނީ އެނގިފަ އެވެ. އޭނާ މިހާރު ވަނީ ފުލުހުންގެ ބެލުމުގެ ދަށުން އެ އަތޮޅު އޭދަފުށްޓަށް ގެންގޮސްފަ އެވެ. އެނގިފައިވާ ގޮތުގައި އޭނާގެ ބަންދާމެދު ގޮތެއް ނިންމުމަށް މާދަމާ އޭދަފުށި މެޖިސްޓްރޭޓް ކޯޓަށް ގެންދާނެ އެވެ.
ނަޝީދަށް ދިން ހަމަލާއާ ގުޅިގެން މިހާތަނަށް ފާތިހު ހިމެނޭ ގޮތުން ޖުމްލަ ހަތަރު މީހަކު ވަނީ ހައްޔަރު ކޮށްފަ އެވެ.
އެއީ ބޮންގޮއްވާލުމުގައި އަމަލީގޮތުން ބައިވެރިވި ކަމަށް ތުހުމަތު ކުރެވޭ އަދުހަމް އަހުމަދުގެ އިތުރުން، މއ. ފޭރުގެ މުޖާޒް އަހްމަދު 21، އާއި ގއ. ކޮނޑޭ، ފޮޅޭމާ، ތަހުމީން އަހްމަދު، 32 އެވެ.
ރައީސް ނަޝީދަށް ދިން ހަމަލާއާ ގުޅިގެން މީގެ ކުރިން ހައްޔަރުކުރި ތިން މީހުން: ކވ: މުޖާޒް، އަދުހަމް، ތަހުމީން. -ގްރެފިކްސް: އަބްދުﷲ ޝަފީއު/ އަދަދު
އޭގެ ތެރެއިން ތަހުމީނަކީ ސައިކަލުގެ ވެރި މީހާ ކަމަށް ފުލުހުން ބުނެފައިވެ އެވެ.
އެ ތިން މީހުންނަކީ ވެސް ހަރުކަށި ފިކުރާ ގުޅުން އޮތް މީހުން ކަމަށް ބެލެވޭ ކަމަށް ފުލުހުން ބުނެފައިވެ އެވެ.
ރައީސް ނަޝީދަށް އަމާޒުކޮށް ދިން ހަމަލާއަށްފަހު، ފުލުހުން ގެންދަނީ ހަރުކަށި ފިކުރާ ދެކޮޅަށް ބޮޑު އޮޕަރޭޝަނެއް ހިންގަމުންނެވެ. ސިފައިން ދަނީ މާލޭ ތެރޭގެ ސަލާމަތީ ކަންކަން ބަލަހައްޓަމުންނެވެ.
ހަރުކަށި ފިކުރުގެ ވިސްނުން ފެތުރުމުގައި އިސްކޮށް އުޅޭ ކަމުގެ ތުހުމަތަށް ރޭ ވެސް ފުލުހުން ވަނީ މީހަކު ހައްޔަރުކޮށްފަ އެވެ.
އއ. ހިމަންދޫގައި ހިންގި ހަމަނުޖެހުމާ ގުޅިގެން މީގެ ކުރިން ޖަލަށްލާފައިވާ އުމުރުން 43 އަހަރުގެ އަބްދުﷲ އަލީ މަނިކު މިއަދު ކުރިމިނަލް ކޯޓަށް ހާޒިރުކުރުމުން އޭނާގެ ބަންދަށް 15 ދުވަސް އިތުރުކޮށްދީފައިވާ ކަމަށް ފުލުހުން ބުނެފައިވެ އެވެ.
މީގެ އިތުރުން، އައްޑޫ ސިޓީގައި ވެސް ފުލުހުން އޮޕަރޭޝަނެއް ހިންގައި އައިއެސް ޖަމާއަތާ ގުޅުން އޮތް ހަތް މީހަކު ހައްޔަރުކޮށް ވަނީ ބަންދު ޖަހާފަ އެވެ. އޭގެ ފަހުން ކ. ގުރައިދޫއާ އިންވެގެން އޮންނަ ކުޑަ ފަޅު ރަށެއް ކަމަށްވާ ޅޮސްފުށި ވެސް ފުލުހުން ވަނީ ބަލާފާސްކޮށްފަ އެވެ.
މި އޮޕަރޭޝަންތަކާ ގުޅޭ ތަފްސީލީ މައުލޫމާތެއް ފުލުހުން ހާމައެއް ނުކުރެ އެވެ.
ނަމަވެސް، ކޮމިޝަނާ އޮފް ޕޮލިސް މުހައްމަދު ހަމީދު ވަނީ ރައީސް ނަޝީދުގެ ހަމަލާއާ ގުޅުން އޮތް އެންމެ ހައްޔަރުކޮށް، އެކަމަށް ފަންޑުކުރި މީހުންނާއި އަޑީގައި ތިބި މީހުން ވެސް ހޯދައި، އިންސާފުގެ ކުރިމައްޗަށް ގެންނާނެ ކަމުގެ ޔަގީންކަން ދެއްވާފަ އެވެ.
ނަޝީދަށް ހަމަލާ ދިނުމަށް ގޮއްވާލި އައިޑީގެ ތެރެއަށް އަޅާފައިވާ ރޭޒާ ފުއްތައް ބާރުގަދަ ގޮވުމާއެކު ރައީސް ނަޝީދުގެ ހަށިކޮޅުގެ އެކި ތަންތަން ފޫއަޅުވައިލި އެވެ.
އޭޑީކޭ ހޮސްޕިޓަލުގެ ޑޮކްޓަރުން ޓީމަކުން 16 ގަޑިއިރުގެ ގިނަ ސާޖަރީތަކަކަށްފަހު އާއްމުކުރި މައުލޫމާތުތަކުން އެނގޭ ގޮތުގައި އެމަނިކުފާނު ސަލާމަތްވީ ހަމަ ކިރިޔާ އެވެ.
ރައީސް ނަޝީދު މިވަގުތު ގެންދަވަނީ ޖަރުމަނުގައި އިތުރު ފަރުވާ ހޯއްދަވަމުންނެވެ.
