ސްޓަޓްގާޓް (ޖޫން 26) - ޔޫރޯ ފުޓްބޯޅަ މުބާރާތުގެ ގްރޫޕް އީގައި ބެލްޖިއަމް އާއި ޔޫކްރެއިން ބައްދަލުކުރި މެޗު 0-0 ގެ ނަތީޖާ އަކުން އެއްވަރުވެ، ބެލްޖިއަމް ގްރޫޕްގެ ދެ ވަނަ ޓީމުގެ ގޮތުގައި ދެ ވަނަ ބުރަށް ދަތުރުކޮށްފި އެވެ.
މި ގްރޫޕްގެ ޓީމުތަކުން ގްރޫޕް ސްޓޭޖު ނިންމާލިއިރު, ކޮންމެ ޓީމަކަށް ވެސް ވަނީ ހަތަރު ޕޮއިންޓް ލިބިފަ އެވެ.
ގްރޫޕް އީގެ އެއް ވަނަ އަށް ރުމޭނިއާ ދިޔައިރު، ދެ ވަނަ ހޯދީ މިރޭ، 0-0 އިން ޔޫކްރެއިނާ އެއްވަރުވި ބެލްޖިއަމް އެވެ. ތިން ވަނަ އަށް ދިޔަ ސްލޮވާކިއާ އަށް ވެސް ވަނީ އަށް އަހަރަށް ފަހު ޔޫރޯގެ ދެ ވަނަ ބުރުން ފުރުސަތު ލިބިފަ އެވެ. އެންމެ ފަހުން، ޔޫރޯގެ ކުއާޓާ ފައިނަލުގައި ކުޅުނު ޔޫކްރެއިން ވަނީ ގްރޫޕްގެ ފުލަށް ދިއުމުން ކަޓައިފަ އެވެ.
ގްރޫޕްގެ އެއް ވަނަ ހޯދާނެ ކަމަށް ބެލެވުނު ބެލްޖިއަމް ދެ ވަަނަ އަށް ދިއުމުން، އެ ޓީމުން ގަދަ 16 ބުރުގައި ކުޅޭނީ ފްރާންސާ ދެކޮޅަށެވެ.
މި މެޗުގެ ފުރަތަމަ ހާފުގައި ބެލްޖިއަމް އަށް ވަނީ ލަނޑު ޖަހަން ރަނގަޅު ފުރުސަތުތަކެއް ލިބި ބޭކާރުވެފަ އެވެ. އެ ގޮތުން މި ހާފުގައި ބެލްޖިއަމް އަށް ލިބުނު އެންމެ ހުސް ފުރުސަތު ލިބުނީ, އިތުބާރު ފޯވާޑް ރޮމޭލޫ ލުކާކޫ އަށެވެ. ބެލްޖިއަމްގެ ކެޕްޓަން ކެވިން ޑި ބްރޭނާ އޭރިއާ ތެރެއަށް ހުސްކޮށްލި ފުރުސަތުގައި އޭރިއާ ތެރެއިން މުޅިން ހުހަށްހުރެފައި ލުކާކޫ ފޮނުވާލި ހަމަލާގެ ހުރަހަކަށްވީ ޔޫކްރެއިންގެ ކީޕަރު އެނެޓޮލީ ޓާބިން އެވެ.
އޭގެ ފަހުން، ފުރަތަމަ ހާފުގެ އިތުރު ވަގުތުގައި ޑި ބްރޭނާ އޭރިއާ ބޭރުން ބާރު ހަމަލާ އެއް ފޮނުވާލިއިރު, މި ހަމަލާގެ ހުރަހަކަށްވީ ވެސް ޔޫކްރެއިންގެ ކީޕަރު ޓާބިން އެވެ.
މެޗުގެ 58 ވަނަ މިނެޓުގައި ބެލްޖިއަމްގެ ޖެރެމީ ޑޮކޫ އޭރިއާ ތެރެއަށް ނުރައްކާތެރި ހުރަހެއް ފޮނުވާލި ނަމަވެސް ބެލްޖިއަމްގެ ކުޅުންތެރިއަކަށް ބޯޅަ ލިބޭ ގޮތް ނުވެ ދިޔައީ ގޯލު ކުރިމަތިން ހުރަސްވެފަ އެވެ.
ލުކާކޫ އަށް މެޗުގެ 65 ވަަނަ މިނިޓްގައި ގޯލު ޖަހަން ފުރުސަތު ލިބި ވަނީ ބޭކާރުވެފަ އެވެ. ޔޫކްރެއިންގެ ދެ ކުޅުންތެރިން ކައިރިން ނައްޓާލާފައި ލުކާކޫ ފޮނުވާލި ހަމަލާގައި ބާރެއް ނެތި ލިބުނީ ކީޕަރު ޓާބިން އަށެވެ.
މެޗުގެ 82 ވަނަ މިނެޓުގައި ޔޫކްރެއިންގެ ރުސްލާން މަލިނޯސްކީ ކޯނަރަކުން ގޯލެއް ޖެހޭތޯ ކުރި މަސައްކަތް ކާމިޔާބު ނުވީ ބެލްޖިއަމްގެ ކީޕަރު ކޮއިން ކާސްޓީލްސް ދިފާއު ކުރުމުންނެވެ. މި ހަމަލާ އޭނާ ދިފާއުކުރީ ގޯލު ރޮނގު މަތިން ކަހަލަ ގޮތަކަށެވެ.
މެޗުގެ ލީޑު ނަގަން ބެލްޖިއަމް އަށް މެޗުގެ 87 ވަނަ މިނެޓުގައި ވަނީ ފުރުސަތެއް ލިބި ބޭކާރުވެފަ އެވެ. ކައުންޓަ އެޓޭކެއްގައި ބެލްޖިއަމްގެ ތިން ކުޅުންތެރިން އޭރިއަަ ތެރެއަށް ހުސްވިއިރު, ޑި ބްރޭނާ ވަނީ އޭރިއާ ތެރެއިން ހުސްކޮށްލާފައި ޖޯހާން ބަކަޔޯކޯ އަށް ދިން އިރު, އޭނާ ފޮނުވާލި ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.
މިރޭގެ މެޗުން މޮޅުނުވެވުމުން، ޔޫކްރެއިން މުބާރާތުން ކެޓިއިރު، އެ ޓީމުން ވަނީ އެންމެ ފަހުން ބޭއްވި ޔޫރޯގެ ކުއާޓާ ފައިނަލުގައި ކުޅެފަ އެެވެ.
