މިއުނިކް (ޖޫން 17) - މި ފަހަރުގެ ޔޫރޯ ފުޓްބޯޅަ މުބާރާތުގައި ރުމޭނިއާ ކުޅުނު ފުރަތަމަ މެޗުން 3-0 އިން ޔޫކްރެއިން ބަލިކޮށް، 24 އަހަރު ތެރޭ މުބާރާތުގައި ފުރަތަމަ މޮޅު ހޯދައިފި އެވެ.
މިއީ 2000 ވަނަ އަހަރުގެ ޔޫރޯ އަށް ފަހު ރުމޭނިއާ މި މުބާރާތުގެ މެޗަކުން މޮޅުވި ފުރަަތަމަ ފަަހަރެވެ. ރުމޭނިއާ އިން 2008 އާއި 2016 ގެ ޔޫރޯ ނިންމާލީ މޮޅެއް ނުލިބި، ގްރޫޕް ސްޓޭޖުން ކަަޓައިގެންނެވެ.
މީގެ ކުރިން ރުމޭނިއާ އިން، ޔޫރޯގައި ކުޅުނު 16 މެޗުގެ ތެރެއިން 10 މެޗުން ބަލިވިއިރު، ފަސް މެޗުން އެއްވަރުވި އެވެ. މޮޅުވި ހަމައެކަނި މެޗަކީ، 2000 ވަނަ އަހަރުގެ ޔޫރޯގެ ގްރޫޕް ސްޓޭޖުގައި، އިންގްލެންޑް އަތުން 3-2 އިންނެވެ. އެ ފަހަރު ރުމޭނިއާ، ގްރޫޕް ސްޓޭޖު ފަހަނައަޅައި ދިޔައީ އިންގްލެންޑާއި ޖަރުމަނު ކަޓުވާލައިފަ އެވެ. އެކަމަކު ކުއާޓާގައި އިޓަލީ އަތުން ރުމޭނިއާ ކެޓީ އެވެ.
މިއުނިކްގެ އަލިއާންޒް އެރީނާގައި މިރޭ ކުޅުނު މެޗުގައި ޔޫކްރެއިނުން އަވަސް ކުޅުންތަކާ އެކު، އެޓޭކްތަކެއް ކުރެވޭތޯ ބެލި އެވެ. އެކަމަކު، އެންމެ ފުރުސަތެއް ވެސް ގޯލަކަށް ހަދައިނުލެވުނެވެ.
ރުމޭނިއާ އިން ލީޑުނެގީ މެޗުގެ، 29 ވަނަ މިނިޓްގައި ޓީމުގެ ކެޕްޓަން ނިކޮލައެ ސްޓަންޗޫ ޖެހި މޮޅު ގޯލުންނެވެ. ޔޫކްރެއިން ފަހަތުން ހެދި ގޯހެއްގެ ފައިދާނަގައި، ރޫމޭނިއާ އަށް ލިބުނު ފުރުސަތުގައި އޭރިއާބޭރުން ސްޓަންޗޫ ޖެހި ބޯޅަ ގޯލަށް ވަނީ ޔޫކްރެއިންގެ ކީޕަރު އަންޑްރީ ލުނިން އަތްމަތިން ގޮސް މަތީ ކަަަނަށެވެ. އޭގެ ފަހުން، ސްޓަންޗޫ ކޯނަރަކުން ނެގި ބޯޅައެއް ވެސް ވަނީ ލުނިން އަތްމަތިން ގޮސް ދަނޑިއަށް އަމާޒުވެފަ އެވެ.
ރުމޭނިއާގެ ކެޕްޓަން ސްޓަންޗޫ، ލަނޑު ޖެހުމަށް ފަހު އުފާފާޅުކުރަނީ.
ދެ ވަނަ ހާފު ފަށައިގެން ވެސް ފުރަތަމަ އެޓޭކް ކުރެވޭތޯ ބެލީ ޔޫކްރެއިނުންނެވެ. އެކަމަކު، ފުރަތަމަ ހާފެކޭ އެއްގޮތަށް އެ ޓީމުން ފުރުސަތުގެ ބޭނުންހިފިގެން އުޅެނިކޮށް ރުމޭނިއާ އިން ވަނީ ލަނޑު ޖަހައިފަ އެވެ. އެ ގޮތުން، މެޗުގެ 53 ވަނަ މިނިޓްގައި ރަޒްވާން މަރިން އޭރިއާބޭރުން ޖެހި ޝޮޓް ދިފާއުކުރަން އުޅުމުގެ ތެރޭގައި ކީޕަރު ލުނިން އަތްދަށުން ވަނީ ގޯލަށެވެ. އެ ލަނޑު ޖެހިތާ ހަތަރު މިނިޓް ފަހުން، ކުރި އެޓޭކެއްގައި ރުމޭނިއާ އިން ތިން ވަނަ ލަނޑު ޖެހި އެވެ. މިއީ، ޑެނިސް މާން ދިން ބޯޅައަކުން، ޑެނިސް ޑްރަގޫސް ޖެހި ގޯލެކެވެ.
ރުމޭނިއާ ގޯލާ އަމާޒުކޮށް ޔޫކްރެއިނުން ފޮނުވާލި ފުރަތަމަ ޝޮޓް ފެނިގެންދިޔައީ 77 ވަނަ މިނިޓްގަ އެވެ. އޭރިއާބޭރުން ހިއޯހީ ސުޑާކޯވް ޖެހި ޝޮޓް ރުމޭނިއާ ކީޕަރު، ފްލޯރިން ނީސާ ވަނީ މަތަކޮށްފަ އެވެ.
އޭގެ ފަހުން ވެސް ޔޫކްރެއިނުން ކުރިއަށް ޖެހިގެން ކުޅެ، އެޓޭކްތަކެއް ކުރެވޭތޯ ބެލި އެވެ. އެކަމަކު، އޭގެއިން ފުރުސަތެއްގައި ގޯލެއް ޖެހޭގޮތެއްނުވި އެވެ.
މި ގްރޫޕްގެ ދެ ވަނަ މެޗުގައި، ސްލޮވާކިއާ އާއި ބެލްޖިއަމް މިރޭ ބައްދަލުކުރާނެ އެވެ.
