ޖުމްހޫރީ ދުވަހާ ދިމާކޮށް ނޮވެމްބަރު 11 ގައި ރަސްމާލެ މަޝްރޫއުގެ އެއްބަސްވުމުގައި ޔޫއޭއީގެ އީގަލް ހިލްސްއާއެކީ ސޮއިކުރުމަށް ތައްޔާރުވަމުން އަންނަ ކަމުގެ އަޑުތައް ފެތުރިފައި ވަނިކޮށް، ޖުމްހޫރީ ދުވަހުގެ ރަސްމީ ޖަލްސާ އަންނަ ނޮވެމްބަރު މަހުގެ 19 ވަނަ ދުވަހުގެ ރެއަށް ސަރުކާރުން ފަސްކޮށްފި އެވެ.
މި ޖަލްސާ ފަސްކުރި ކަމަށް ބުނި ނަމަވެސް އެއްވެސް ސަބަބެއް ރައީސް އޮފީހުން ހާމަ ނުކުރެ އެވެ. އަދި، ރަސްމާލެ މަޝްރޫއުގެ ބޮޑު އެއްބަސްވުމުގައި ސޮއިކުރަން އުޅޭ ވާހަކަތަކެއް ދެކެވުނު ނަމަވެސް، ސަރުކާރުން އެ މައުލޫމާތު ވެސް ރަސްމީކޮށް ކަށަވަރެއް ނުކޮށްދެ އެވެ.
މި އެއްބަސްވުމުގައި ސޮއިކުރުމުގެ ކުރިން ހަދަން ޖެހޭ ކަމަށް ބުނާ ރިއަލް އެސްޓޭޓު ގާނޫނުގެ ބިލު ވެސް ރައްޔިތުންގެ މަޖިލީހަށް އަދި ހުށަނާޅާ އެވެ. އަދި، އެހެން ބައެއް ގާނޫނުތަކަށް ގެންނަން ޖެހޭ ކަމަށް ބުނި ބަދަލުތަކާ ގުޅޭ ބިލެއް ވެސް މަޖިލީހަށް ނާދެ އެވެ.
ރައީސް އޮފީހުން ބުނީ، ޖުމްހޫރީ ދުވަހުގެ ރަސްމީ ޖަލްސާ އޮންނާނީ އަންނަ މަހުގެ 19 ވާ ބުރާސްފަތި ދުވަހުގެރޭ 8:30 ގައި ހުޅުމާލޭ ސެންޓްރަލް ޕާކުގައި ކަމަށެވެ.
މި ޖަލްސާގައި މަތީ ދަރަޖަ ހޯދާ މީހުންނަށް ރައީސުލްޖުމްހޫރިއްޔާ ދެއްވާ ހާއްސަ އިނާމާއި، ދިވެހި ދައުލަތަށް ހިދުމަތް ކުރުމުގެ އިނާމު ދެއްވުން ވެސް އޮންނާނެ އެވެ.
ހާއްސަ އިނާމަކީ އިލްމާއި ހުނަރާއި އުފެއްދުންތެރިކަމުގެ ރޮނގުން ހިތްވަރާ އެކު ހޯދާ ކާމިޔާބީ ފާހަގަކުރުމަށް ދޭ އިނާމެކެވެ. މި އިނާމު ލިބޭ މީހުންނަށް ދެއްވާނީ މެޑެއްޔަކާއި ހަނދާނީ ލިޔުމެކެވެ.
ދައުލަތަށް ހިދުމަތް ކުރުމުގެ އިނާމަކީ 35 އަހަރަށް ވުރެ ދިގު މުއްދަތެއްގައި ހިދުމަތްކޮށްފައިވާ މުވައްޒަފުންގެ އަގު ވަޒަންކުރުމަށް ދޭ އިނާމެކެވެ. ގައުމީ އިނާމާ ބެހޭ ކޮމިޓީން ހޮވާ މި މީހުންނަށް ދެއްވާނީ ޝަރަފުގެ ބެޖަކާއި އައްޑަނައެއްގެ އިތުރުން ހަނދާނީ ލިޔުމެކެވެ.
