ފުރުގާން މިސްކިތުގައި ނަމާދަށް ހުރި އަންހެއްނެއްގެ ކުރިމަތީގައި ބަރަހަނާވެ، އަމިއްލައަށް ޖިންސީ އެދުން ފުއްދިކަމުގެ ތުހުމަތުގައި، މީގެ ކުރިން ވެސް މިސްކިތުގެ ހުރުމަތް ކެނޑުމުގެ މައްސަލަތަކުގައި ހައްޔަރުކޮށްފައިވާ ނައުޝާދު މޫސާ އަނެއްކާ ވެސް ހައްޔަރުކޮށްފި އެވެ.
އަދަދު އަށް އެނގިފައިވާ ގޮތުގައި ނައުޝާދު ވަނީ އިއްޔެ ހެނދުނުގެ ވަގުތެއްގައި ފުރުގާން މިސްކިތަށް ވަދެ، އެ މިސްކިތުގައި ލުހާ ނަމާދަށް ހުރި އަންހެނެއްގެ ކުރިމައްޗަށް އަރައި ބަރަހަނާވެފަ އެވެ. އަދި، އެއަށް ފަހު އެ ތަނުގައި ހުރެ އޭނާ އަމިއްލައަށް ޖިންސީ އެދުން ފުއްދި ކަމަށް އެކަމުގެ މައުލޫމާތު އެނގޭ މީހަކު މި ނޫހަށް ބުންޏެވެ.
އެ މައްސަލައާ ގުޅިގެން ނޫސްވެރިން ސުވާލުކުރުމުން ފުލުހުން ބުނީ، އެފަދަ މައްސަލައެއްގެ ރިޕޯޓު ފުލުހުންނަށް ލިބިފައިވާ ކަމަށެވެ.
"ފުރުގާން މިސްކިތުގެ ތިޔަ ވިދާޅުވި ފަދަ ކަމެއް ހިނގިކަމަށް ފުލުހުންގެ މަރުކަޒަކަށް ހާޒިރުވެ ހުށަހަޅާފައިވޭ، މި މައްސަލައިގައި އެ ފަރާތުން ދިން މައުލޫމާތާ ގުޅިގެން ނައުޝާދު ވަނީ ފުލުހުންގެ ބެލުމުގެ ދަށަށް ގެނެސްފައި،" ފުލުހުން ބުންޏެވެ.
ފުލުހުން ބުނީ ނައުޝާދުގެ ފަރާތުން އެފަދަ ކަމެއް ދެން ތަކުރާރުވިޔަ ނުދިނުމަށްޓަކައި ކަމާބެހޭ އިދާރާތަކާ ގުޅިގެން އަޅަންޖެހޭ ފިޔަވަޅުތައް އެޅުމުގެ މަސައްކަތް ކުރަމުންދާ ކަމަށެވެ.
މިދިޔަ ސެޕްޓެމްބަރު 10، ގައި ފުރުގާން މިސްކިތަށް ވަދެ، ބޮޑުކަމު ގޮސް، މިސްކިތުގެ ހުރުމަތް ކެނޑި މައްސަލައެއްގައި މި މަހުގެ 4، ވަނަ ދުވަހާ ހަމައަށް ނައުޝާދު ހުރީ ބަންދުގަ އެވެ. އޭނާ ބަންދުން ދޫކޮށްލީ، އެ މައްސަލައިގައި އޭނާގެ މައްޗަށް އިއްވި އެއް މަހާއި 15 ދުވަހުގެ ޖަލު ހުކުމް، ތަހުގީގު ބަންދުގައި އޭނާ ހޭދަކުރި އެއް މަހާއި 21 ދުވަހާ އަޅައިކެނޑުމުން ދެން ތަންފީޒުކުރަންޖެހޭ އަދަބެއް ނެތުމުންނެވެ.
އޭގެ ކުރިން ވެސް މިސްކިތަށް ގެއްލުންދިން މައްސަލަތަކުގައި އެކިފަހަރު މަތިން އޭނާ ހައްޔަރުކޮށްފައިވެ އެވެ.
