ވިލާ ކޮލެޖުގެ ފެކަލްޓީ އޮފް ސަރީއާ އެންޑް ލޯއިން، ޖިނާއީ އަދާލަތުގެ ދާއިރާއިން މުޅިން އައު ޑިގްރީ ޕްރޮގްރާމެއް ކަމަށްވާ 'ބެޗެލަރ އޮފް ކްރިމިނަލް ޖަސްޓިސް' ތައާރަފުކޮށްފި އެވެ.
ތިން އަހަރުގެ މި ޕްރޮގްރާމަކީ، މި ދާއިރާގެ އެކި ވަޒީފާތަކަށް ދަރިވަރުން ތައްޔާރުކުރުމަށް ފަރުމާކޮށްފައިވާ ޕްރޮގްރާމެކެވެ. އަންނަ ޖެނުއަރީ އިންޓޭކަށް، މި ޕްރޮގްރާމަށް ކުރިމަތިލުމުގެ ފުރުސަތު މިހާރު ވަނީ ހުޅުވާލައިފަ އެވެ.
މި ޕްރޮގްރާމް ތައާރަފުކުރުމާ ގުޅިގެން ވާހަކަ ދައްކަވަމުން، ވިލާ ކޮލެޖުގެ ވައިސް ރެކްޓަރު، އެސޯސިއޭޓް ޕްރޮފެސަރު ޑރ. އަލީ ނަޖީބު ވިދާޅުވީ "ރައްކާތެރި އަދި އަދުލުވެރި މުޖުތަމައެއް ބިނާކުރުމުގައި، ޖިނާއީ އަދާލަތުގެ ނިޒާމުގެ ދައުރު ވަރަށް މުހިންމު" ކަމަށެވެ.
"އެ ނިޒާމު ފުރިހަމައަށް ހިނގުމަށް ބޭނުންވަނީ، އިލްމާއި ހުނަރު ލިބިފައިވާ، އިންސާނީ ހައްގުތަކަށް އިހުތިރާމްކުރާ ޕްރޮފެސަނަލުން. ބެޗެލަރ އޮފް ކްރިމިނަލް ޖަސްޓިސް ތައާރަފުކުރުމަކީ، އެފަދަ ޕްރޮފެސަނަލުން ރާއްޖޭގައި ތަމްރީނުކުރުމަށް ވިލާ ކޮލެޖުން އަޅާ މުހިންމު ފިޔަވަޅެއް. މި ދާއިރާއަށް ސައުގުވެރިވާ ހުރިހާ ފަރާތްތަކަށް، މި ޕްރޮގްރާމަށް ކުރިމަތިލުމަށް އަޅުގަނޑު ދައުވަތު ދެން،" ނަޖީބު ވިދާޅުވި އެވެ.
މި ޕްރޮގްރާމުގައި، ކްރިމިނަލް ލޯ، ކްރިމިނޮލޮޖީ، ފޮރެންސިކް ސައިންސް އަދި ޑިޖިޓަލް ފޮރެންސިކްސް ފަދަ މާއްދާތަކުގެ ތިއަރީއާއެކު، އަމަލީ ހުނަރު ވެސް ދަރިވަރުންނަށް ދަސްކޮށްދެވޭނެ އެވެ. ތަހުގީގުކުރުމާއި، ހެކި ހޯދުމާއި، މައްސަލަތައް ހައްލުކުރުމުގެ ހުނަރު ކުރިއެރުވުމަކީ މި ޕްރޮގްރާމުގެ މައިގަނޑު އަމާޒުތަކުގެ ތެރެއިން އެއް އަމާޒެވެ. ކްރިމިނަލް ޕްރޮސީޖަރު، ލޯ އޮފް އެވިޑެންސް، ޕޮލިސް އެޑްމިނިސްޓްރޭޝަން އެންޑް މެނޭޖުމަންޓް، ވިކްޓިމޮލޮޖީ އަދި ކްރައިމް ޕްރިވެންޝަން ސްޓްރެޓެޖީސް ފަދަ މާއްދާތައް ވެސް މި ޕްރޮގްރާމުގައި ހިމެނެ އެވެ.
ޕްރޮގްރާމުގައި އިންސާނީ ހައްގުތަކާއި އެތިކަލް ސްޓޭންޑާޑްތަކަށް ހާއްސަ ސަމާލުކަމެއް ދެވޭއިރު، ހިއުމަން ރައިޓްސް އެންޑް ކްރިމިނަލް ޖަސްޓިސް އަދި ލީގަލް އެތިކްސް އެންޑް ޕްރޮފެސަނަލް ރެސްޕޮންސިބިލިޓީ ފަދަ މާއްދާތައް ވެސް ހިމެނެ އެވެ. މީގެ އިތުރުން، ޔޫތު އެންޑް ޑެލިންކުއެންސީ، ސަބްސްޓެންސް އެބިއުސް އެންޑް ކްރިމިނަލް ޖަސްޓިސް، ކަރެކްޝަންސް އެންޑް ރިހެބިލިޓޭޝަން އަދި ޖެންޑާ އެންޑް ކްރައިމް ފަދަ މާއްދާތަކުގެ ތެރެއިން، މުޖުތަމައާއެކު ސީދާ ގުޅުންހުރި މައްސަލަތައް ވެސް ދަރިވަރުން ދިރާސާކުރާނެ އެވެ.
ކްލާސްރޫމުގައި ކިޔަވައިދިނުމާއި، އަމަލީ ތަޖުރިބާއާއި، ކޮމިއުނިޓީ ހަރަކާތްތަކުގެ ތެރެއިން، ޖިނާއީ އަދާލަތުގެ ނިޒާމު މަސައްކަތްކުރާ ގޮތް ދަރިވަރުން ދަސްކުރާނެއެވެ. ޕްރޮގްރާމުގެ ކްރެޑިޓްގެ 70 އިންސައްތަ ފުރިހަމަކުރުމަށްފަހު، ކެޕްސްޓޯން ޕްރޮޖެކްޓެއް ނުވަތަ އިންޓާންސިޕެއް ދަރިވަރުންނަށް އިހުތިޔާރުކުރެވޭނެ އެވެ.
މި ދާއިރާގައި ކުރިމަތިވަމުންދާ އައު ގޮންޖެހުންތަކަށް ދަރިވަރުން ތައްޔާރުކުރުމަށް، ސަސްޓެއިނަބިލިޓީ އަދި އޭއައި އާއި ޑޭޓާ އެނަލިޓިކްސް ވެސް ކިޔަވައިދެވޭނެއެވެ. އަދި ޖިނާއީ އަދާލަތުގެ ނިޒާމު އިސްލާހުކުރުމާ ގުޅޭ ސިޔާސަތު އެކުލަވައިލުމާއި އެޑްވޮކެސީގެ މަސައްކަތަށް ވެސް ދަރިވަރުން ތައްޔާރުކޮށްދެވޭނެއެވެ. އަދި ސްޓްރީޓް ލޯ ފަދަ އެކްސްޕީރިއެންޝަލް ލާނިން (އަމަލީ ތަޖުރިބާގެ ތެރެއިން އުނގެނުމުގެ) މޮޑިއުލްތައް ކަރިކިއުލަމްގެ ތެރޭގައި ހިމެނިފައިވުމުން، މި ޕްރޮގްރާމް ކިޔަވާ ދަރިވަރުންނަށް، ސްކޫލުތަކާއި މުޖުތަމައުގައި ގާނޫނީ ހޭލުންތެރިކަން އިތުރުކުރުމުގެ މަސައްކަތުގައި ބައިވެރިވުމުގެ ފުރުސަތު ލިބިގެންދާނެ އެވެ.
މި ޕްރޮގްރާމުން ދަސްވެނިވާ ދަރިވަރުންނަށް، ގާނޫނު ތަންފީޒުކުރާ އިދާރާތަކާއި، ގާނޫނީ މުއައްސަސާތަކާއި، ކޮމިއުނިޓީ އޯގަނައިޒޭޝަންތަކުގައި، އާންމު ސަލާމަތާއި ރައްކާތެރިކަން ކަށަވަރުކުރުމަށް ހިދުމަތްކުރުމުގެ ފުރުސަތު ފަހިވެގެންދާނެއެވެ. އޭގެ ތެރޭގައި، ޕްރޮސިކިއުޓާ ޖެނެރަލްގެ އޮފީސް، ނޭޝަނަލް އިންޓެގްރިޓީ ކޮމިޝަން، ހިއުމަން ރައިޓްސް ކޮމިޝަން، ޗައިލްޑް އެންޑް ފެމިލީ ޕްރޮޓެކްޝަން ސާވިސް، މިނިސްޓްރީ އޮފް ހެލްތު، ފެމިލީ އެންޑް ވެލްފެއާ، ދިވެހި ފުލުހުންގެ ހިދުމަތާއި މޯލްޑިވްސް ކަރެކްޝަނަލް ސާވިސް ފަދަ ގާނޫނު ތަންފީޒުކުރާ އިދާރާތަކުގައި މަސައްކަތްކުރެވޭނެއެވެ. މި ޕްރޮގްރާމުގެ ފަހު ސެމިސްޓަރުގައި ހިންގޭ "ގްރެޖުއޭޓް އިމްޕެކްޓް ސެމިސްޓާ" ގެ ތެރެއިން، މުޖުތަމައަށް އަމަލީ ގޮތުން ފައިދާހުރި މަސައްކަތްތައް ކުރުމުގެ ފުރުސަތު ވެސް ދަރިވަރުންނަށް ލިބިގެންދާނެއެވެ.
ވިލާ ކޮލެޖުގެ ފެކަލްޓީ އޮފް ސަރީއާ އެންޑް ލޯގެ ޑީން، އުސްތާޒާ އަސްނާ އަހުމަދު ވިދާޅުވީ މި ޕްރޮގްރާމުން، ޖިނާއީ ގާނޫނާއި ކްރިމިނޮލޮޖީގެ އިތުރުން، ތަހުގީގުކުރުމާއި މައްސަލަތައް ހައްލުކުރުމުގެ އަމަލީ ހުނަރު ވެސް ދަރިވަރުންނަށް ލިބިގެންދާނެ ކަމަށެވެ.
"ޑިޖިޓަލް ފޮރެންސިކްސް އާއި ޑޭޓާ އެނަލިޓިކްސް ފަދަ ދާއިރާތައް ހިމަނާފައިވަނީ، މިއަދުގެ ގޮންޖެހުންތަކަށް ދަރިވަރުން ތައްޔާރުކުރުމަށް. މިއީ، ޖިނާއީ އަދާލަތުގެ ދާއިރާގައި މިހާރު ހިދުމަތްކުރާ ފަރާތްތަކަށް އެމީހުންގެ ގާބިލުކަން އިތުރަށް ކުރިއެރުވުމަށާއި، މި ދާއިރާއިން ކެރިއަރެއް ބިނާކުރަން ބޭނުންވާ ފަރާތްތަކަށް އެކަމަށް ތައްޔާރުވުމަށް ލިބޭ ރަނގަޅު ފުރުސަތެއް،" އޭނާ ވިދާޅުވި އެވެ.
ޕްރޮގްރާމުގެ މުހިންމު މައުލޫމާތު
- މުއްދަތު: 3 އަހަރު
- ކިޔަވައިދޭ ގޮތް: އީ-ލާނިން އަދި ފޭސް-ޓު-ފޭސް
- އިލެކްޓިވް: ޕްރޮގްރާމުގެ ކްރެޑިޓްގެ 70 އިންސައްތަ ފުރިހަމަކުރުމަށްފަހު، ކެޕްސްޓޯން ޕްރޮޖެކްޓެއް ނުވަތަ އިންޓާންސިޕެއް
ޝަރުތުތައް
- ޖެނެރަލް އެންޓްރީ: ޖީސީއީ އޭ-ލެވެލް ނުވަތަ އެޗްއެސްސީ އިމްތިހާނުގައި 2 މާއްދާއިން ފާސްވުން (އޭ-ލެވެލްގައި ނުވަތަ އެއަށްވުރެ މަތި، އެޗްއެސްސީގައި ސީ ނުވަތަ އެއަށްވުރެ މަތި)، ނުވަތަ ގުޅުންހުރި ދާއިރާއަކުން ލެވެލް 4 ގެ ސަނަދެއް ހާސިލުކޮށްފައިވުން، ނުވަތަ މި ޕްރޮގްރާމަށް ވަނުމަށް ފާސްކޮށްފައިވާ ލެވެލް 4 ގެ ފައުންޑޭޝަން ޕްރޮގްރާމެއް ފުރިހަމަކޮށްފައިވުން.
- އޯލްޓަނޭޓިވް އެންޓްރީ (1): އުމުރުން 20 އަހަރު ފުރި، ސާނަވީ ތައުލީމު ފުރިހަމަކޮށް، ގުޅުންހުރި ދާއިރާއެއްގައި 2 އަހަރު މަސައްކަތްކޮށްފައިވާނަމަ، މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން ފާސްކޮށްފައިވާ ޔުނިވަސިޓީ ޕްރިޕަރޭޝަން ޕްރޮގްރާމެއް ފުރިހަމަކޮށްފައިވުން.
- އޯލްޓަނޭޓިވް އެންޓްރީ (2): އުމުރުން 20 އަހަރު ފުރި، ގުޅުމެއްނެތް ދާއިރާއަކުން ލެވެލް 4 ގެ ސަނަދެއް ހާސިލުކޮށްފައިވާނަމަ، އެމްކިއުއޭ އިން ފާސްކޮށްފައިވާ ޔުނިވަސިޓީ ޕްރިޕަރޭޝަން ޕްރޮގްރާމެއް ފުރިހަމަކޮށްފައިވުން.
