ރާއްޖެ އާއި ރަޝިއާއާ ދެމެދު ކުރެވޭ ފައިސާގެ މުއާމަލާތްތައް ހުއްޓާލާފައިވާ ކަމަށް ބުނެ އެ ގައުމުގެ މީޑިއާތަކުގައި ރިޕޯޓުކޮށްފައިވާ ވާހަކަތަކާ ގުޅިގެން، ރަޝިއާއާ ގުޅުންހުރި މުއާމަލާތްތައް ހުއްޓުވުމަށް ވަކި ހާއްސަ ސިޔާސަތެއް ނުގެންގުލޭ ކަމަށް ބޭންކް އޮފް މޯލްޑިވްސް (ބީއެމްއެލް) އިން ބުނެފިއެވެ.
މި މައްސަލައާ ގުޅިގެން ސުވާލުކުރުމުން ބީއެމްއެލްއިން ބުނި ގޮތުގައި، ރަޝިއާއަށް ފައިސާ ފޮނުވުން ހުއްޓާލި ކަމަށް ބުނެ އެ ގައުމުގެ މީޑިއާތަކުން ފަތުރެނީ ހަގީގަތާ ހިލާފު ވާހަކަތަކެކެވެ. އެ ބޭންކުން ބުނީ އެއްވެސް އިރެއްގައި ރަޝިއާގެ މީޑިއާއަކަށް މައުލޫމާތު ނުދޭ ކަމަށެވެ.
ބީއެމްއެލްއިން ބުނީ އެހެން ބޭންކުތަކެކޭ އެއްފަދައިން އެ ބޭންކުން ވެސް ބޭރު ފައިސާގެ މުއާމަލާތްތައް، ހާއްސަކޮށް އެމެރިކާ ޑޮލަރުން ކުރާ މުއާމަލާތްތައް، ނިންމުމުގައި މުޅިންހެން ބަރޯސާވަނީ ބައިނަލްއަގުވާމީ ކޮރެސްޕޮންޑެންޓް ބޭންކުތަކަށް ކަމަށެވެ.
"މި ބޭންކުތަކުން އަމަލުކުރަނީ އެ ފަރާތްތަކުގެ އަމިއްލަ ފިޔަވަޅުތަކާއި ކޮމްޕްލަޔަންސް ސިޔާސަތުތަކަށް. މީގެ ތެރޭގައި މުއާމަލާތްތަކުގައި ބައިވެރިވާ ފަރާތްތަކާއި، އެ މުއާމަލާތްތަކުން ހަގީގީ މަންފާ ލިބޭ ފަރާތްތައް ބަލައި ސްކްރީންކުރުން ހިމެނޭ،" ބީއެމްއެލްއިން ބުންޏެވެ.
މިފަދަ ބައިނަލްއަގުވާމީ ސިޔާސަތުތަކާއި ދަތިކުރުމުގެ ފިޔަވަޅުތަކުގެ ތެރެއަށް ފެތޭ މުއާމަލާތްތައް ބަލައިނުގަތުމާއި، ނުވަތަ އަނބުރާ ފޮނުވާލުމުގެ ފުރިހަމަ އިހުތިޔާރު އޮންނަނީ ކޮރެސްޕޮންޑެންޓް ބޭންކުތަކަށެވެ. އަދި ބީއެމްއެލް ފަދަ ލޯކަލް ބޭންކުތަކުން އަމަލުކުރަން ޖެހެނީ އެ ނިންމުންތަކާ އެއްގޮތަށް ކަމަށް އެ ބޭންކުން ބުންޏެވެ.
ރަޝިއާއިން ފައިސާ ބަލައިގަތުމާއި އެ ގައުމަށް ފައިސާ ފޮނުވުން ބީއެމްއެލްއިން ހުއްޓާލައިފި: ރިޕޯޓު
ބީއެމްއެލްގެ ރެމިޓެންސް މަނާ ގައުމުތަކުގެ ލިސްޓުގައި ރަޝިޔާ ހިމަނައި، އެ ގައުމުން ފައިސާ ބަލައިގަތުމާއި ފޮނުވުން ވަނީ ހުއްޓާލާފަ. މި ނިންމުމުގެ ސަބަބުން ރަޝިޔާގެ ޓޫރިސްޓުން ރާއްޖޭގެ ހޮޓާތަކަށް ފައިސާ ދެއްކުމުގައި ދަތިވާ މައްސަލަ ހައްލުކުރަން ރާއްޖެއާ މަޝްވަރާކުރާނެ ކަމަށް ވަނީ ބުނެފަ.
މި މައްސަލަ އަދަދު ނޫހުން ރިޕޯޓުކުރީ، ރަޝިއާއަށް ފައިސާ ފޮނުވުމާއި އެ ގައުމުން ފޮނުވާ ފައިސާ ޕްރޮސެސް ނުކުރަން ބީއެމްއެލް އިން ނިންމާފައިވާ ކަމަށް ބުނެ ރަޝިއާގެ އާރުބީސީ ނޫހާއި އަދި އެ ނޫން ބައެއް ނޫސްތަކުގައި ރިޕޯޓުކުރުމާ ގުޅިގެންނެވެ.
އެ ރިޕޯޓުގައި ބުނެފައިވާ ގޮތުގައި، ރަޝިއާގެ ޓޫރިސްޓުން ރާއްޖޭގައި ތިބުމަށް ހަމަޖައްސަން ދައްކަން ޖެހޭ ފައިސާ ޕްރޮސެސް ކުރުމުގައި ދަތިތަކެއް ވަނީ ކުރިމަތިވެފައެވެ. އަދި މިކަމާ ގުޅިގެން ދެ ގައުމުގެ ކަމާބެހޭ ވުޒާރާތަކާއި މަރުކަޒީ ބޭންކުތަކުގެ މެދުގައި މަޝްވަރާކުރަން ތައްޔާރުވަމުންދާ ކަމަށް ރަޝިއާގެ އިކޮނޮމިކް ޑިވެލޮޕްމަންޓް މިނިސްޓްރީއާ ހަވާލާދީ ރިޕޯޓުކޮށްފައިވެ އެވެ.
އެ ގައުމުގެ މީޑިއާތަކުން މިހެން ބުނިއިރު، ޔޫކްރެއިން ހަނގުރާމައާ ގުޅިގެން 2022 ވަނަ އަހަރުގެ މާޗު މަހުން ފެށިގެން މި ދަތިކަން އަންނާނެ ކަމަށް ބީއެމްއެލްއިން އޭރު ހާމަކޮށްފައިވެ އެވެ. އެ ދުވަސްވަރު ބައިނަލްއަގުވާމީ ގޮތުން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ރާއްޖޭގެ ހުރިހާ ބޭންކަކަށް ވެސް ސެންކްޝަން ލިސްޓުގައި ހިމެނޭ ރަޝިއާގެ ބޭންކަށް ފައިސާ ފޮނުވުން މަނާވާނެ އެވެ.
