ޓޯޓަލް ފިޒިއޯގެ ދެވަނަ އަހަރީ ދުވަހާ ގުޅިގެން ހާއްސަ ހަދިޔާއެއްގެ ގޮތުގައި ހިލޭ މޮބިލިޓީ ސްކްރީނިން ހެދުމުގެ ފުރުސަތު ހުޅުވާލުމަށް އެ ކްލިނިކުން ނިންމައިފި އެވެ.
މި ފުރުސަތު ހުޅުވާލަނީ އެ ކްލިނިކްގެ އަހަރީ ދުވަސް ކަމަށްވާ ނޮވެމްބަރު މަހުގެ 9 ވަނަ ދުވަހުން ފެށިގެން 15 ވަނަ ދުވަހުގެ ނިޔަލަށެވެ. މި ހާއްސަ އޮފާގެ ދަށުން ކޮންމެ މީހަކަށްވެސް ފަނަރަ މިނެޓުގެ މޮބިލިޓީ ސްކްރީނިންގްއެއް މުޅިން ހިލޭ ފޯރުކޮށްދިނުމަށް ވަނީ ހަމަޖެހިފަ އެވެ.
މިއީ ހަށިގަނޑުގެ ގުނަވަންތަކުގެ ހަރަކާތްތެރިކަން ހުރި މިންވަރު ދެނެގަތުމަށާއި، ހުޅުތަކާއި މަސްތަކުގެ ދުޅަހެޔޮކަން ވަޒަންކުރުމަށް ލިބޭ ރަނގަޅު ފުރުސަތެކެވެ. މި ސްކްރީނިންގެ ސަބަބުން ހަށިގަނޑަށް ދިމާވެދާނެ އަނިޔާތަކުން ރައްކާތެރިވުމަށް ކުރެވިދާނެ ކަންކަން ދެނެގަނެވޭނެ އެވެ.
މީގެ އިތުރުން ވެސް ކްލިނިކްގެ ޚިދުމަތްތައް ހިލޭ އަދި ޑިސްކަައުންޓްތަކާއެކު ލިބޭނެ ފުރުސަތުތައް ހުޅުވާލުމަށް ކްލިނިކުންވަނީ ނިންމާފަ އެވެ.
ޓޯޓަލް ފިޒިއޯއަކީ ފިޒިއޮތެރަޕީގެ ދާއިރާއިން ފާހަގަކޮށްލެވޭ ފެންވަރުގެ ހިދުމަތްތަކެއް ދެމުން އަންނަ މަރުކަޒެކެވެ. އެ ކްލިނިކުގެ ލޯގޯއިން ރަމްޒުކޮށްދޭ ބުރަކަށީގެ ކަށިބަދައިގެ ކުރެހުމުން ދޭހަވަނީ ހަށިގަނޑުގެ މައިބަދައާއި ގުޅުންހުރި ފަރުވާތަކަށް އެތަނުން ދޭ ހާއްސަ ސަމާލުކަމެވެ. މިފަދަ ހިލޭ ސްކްރީނިންގްއެއް ކުރިއަށް ގެންދިއުމުގެ މައިގަނޑު މަގްސަދަކީ އާންމުންގެ މެދުގައި ދުޅަހެޔޮ ދިރިއުޅުމަކަށް ހޭލުންތެރިކަން އިތުރުކުރުމެވެ.
އަހަރީ ދުވަހުގެ މި ހަރަކާތަކީ ކްލިނިކުގެ ކަސްޓަމަރުންނަށާއި އާންމުންނަށް ޝުކުރު އަދާކުރުމުގެ ގޮތުން ކުރިއަށް ގެންދާ ހަރަކާތެއް ކަމަށް އެ ކްލިނިކުން ބުންޏެވެ.
ފަހުގެ އެޑްވާންސްޑު ލޭޒާ ތެރަޕީ އާއި ކްރަޔޯތެރަޕީ ރާއްޖެއަށް ތައާރަފުކޮށް، ބަލި މީހުންނަށް ފަރުވާ ދިނުމަށް އިންގިލާބީ ބަދަލެއް ގެނެސް ޓޯޓަލް ފިޒިއޯ އިން ހިދުމަތް ދޭން ފެށީ މިދިޔަ އަހަރުގެ ނޮވެމްބަރު މަހު އެވެ.
ޒަމާނީ ވަސީލަތްތަކާއެކު ފިޒިއޮތެރަޕީގެ އެންމެ އެޑްވާންސް ހިދުމަތްތައް އެ ކްލިނިކުން ފޯރުކޮށްދެނީ ހަމައެކަނި ކްލިނިކް ހެދިފައިވާ އިމާރާތުގެ ހަތަރުފާރުގެ ތެރޭގައެއް ނޫނެވެ. ބަލީގެ ބާވަތުން އެނދުގައި އޮންނަން ޖެހިފައިވާ މީހުންނާއި، އުމުރުން ދުވަސްވުމުގެ ސަބަބުން އެއްތަނުން އަނެއްތަނަށް ގޮސްއުޅުމަށް ދަތި ފަރާތްތަކުގެ އިތުރުން، އޮޕަރޭޝަނަށް ފަހު ފަރުވާ ބޭނުންވާ ފަރާތްތަކަށް ގޭގެއަށް ގޮސްގެން ވެސް އެ ކްލިނިކުން ފަރުވާ ދެ އެވެ.
ހ. ސަކީނާ މަންޒިލްގެ ތިން ވަނަ ބުރީގައި ހުންނަ މި ކްލިނިކްގައި ތިބީ ދާއިރާގެ މާހިރުންނެވެ. އެ މީހުންގެ ތަޖުރިބާ އާއި ޒަމާނީ ވަސީލަތްތަކަކީ ޓޯޓަލް ފިޒިއޯގެ އެންމެ ބޮޑު ކާމިޔާބީ އެވެ.
ކްލިނިކްގެ ހިދުމަތްތަކާ ބެހޭ މައުލޫމާތު ހޯދުމަށާއި ބުކިން ހެދުމަށް 3301700 ނުވަތަ 7661700 އަށް ގުޅައިގެން ކުރިއަށް ދެވޭނެ އެވެ. އަދި ވައިބާ މެދުވެރިކޮށް ވެސް މައުލޫމާތު ސާފުކޮށް އެޕޮއިންޓްމެންޓް ހެދޭނެ އެވެ.
