ފެނަކަ ކޯޕަރޭޝަންގެ އދ. މަހިބަދޫ ބްރާންޗުގެ މަސައްކަތްތައް ސްޓެލްކޯގެ ދަށަށް ބަދަލުކުރާއިރު މުވައްޒަފުން ވަކިނުކުރާނެ ކަމަށް ބުނެ ހުވަފެން ދެއްކުމަށްފަހު، ފަހު ވަގުތު 11 މުވައްޒަފުން ވަކިކޮށްފި އެވެ.
އަަދަދު އަށް އެނގިފައިވާ ގޮތުގައި ފެނަކަ މަހިބަދޫ ބްރާންޗުގެ މަސައްކަތްތައް ސްޓެލްކޯގެ ދަށަށް ބަދަލުކުރުމުގެ ކަންކަން ކުރިއަށްދިޔައިރުވެސް، ފެނަކައިގެ މުވައްޒަފުން ސްޓެލްކޯގެ ދަށަށް ދާނެ ކަމަށް ޔަގީންކަންދީ ކޮންޓްރެކްޓު ދޭނެ ކަމަށް ބުންޏެވެ.
މިދިޔަ ބުރާސްފަތި ދުވަހު މަހިބަދޫ ފެނަކަ ބްރާންޗުން ވަކިކުރި މުވައްޒަފަކު އަދަދު އަށް ބުނީ ވަކިނުކުރާނެ ކަމަށް ބުނެ ހުވަފެން ދެއްކުމަށްފަހު ވަކިކުރުމުގެ ކުރިން، ހުރިހާ މުވައްޒަފުން ޕީއެންސީއަށް ސޮއިކުރުވި ކަމަށެވެ.
ފެނަކަ މަހިބަދޫ ބްރާންޗުގެ ހުރިހާ މަސައްކަތެއް ސްޓެލްކޯގެ ދަށަށް ބަދަލުކޮށް ނިމުމާއެކު 11 މުވައްޒަފަކު ވަކިކުރީ ފެނަކައިގެ ރިޑަންޑަންސީ އުސޫލުގެ ދަށަުން ކަމަށް ބުނެ އެވެ. ވަކިކުރި މީހުންގެ ތެރޭގައި އެ ބްރާންޗުގައި 10 އަހަރަށްވުރެ ގިނަ ދުވަހު މަސައްކަތްކުރި މުވައްޒަފުން ހިމެނޭއިރު، ގިނައީ އެމްޑީޕީއަށް ނިސްބަތްވާ މުވައްޒަފުންނެވެ.
އެ ބްރާންޗުގައި ޖުމްލަ 26 މުވައްޒަފުން މަސައްކަތް ކުރަމުންދިޔައިރު، 15 މުވައްޒަފަކު ވަނީ ސްޓެލްކޯގެ ދަށަށް ބަދަލުކޮށްފަ އެވެ. އޭގެ ތެރޭގައި ގިނައީ ޕީއެންސީއަށް ތާއީދުކުރާ މީހުން ކަމަށް މައުލޫމާތު ލިބެ އެވެ.
މަހިބަދޫގައި ފެނަކައިން ދެމުން ގެންދިޔައީ ނަރުދަމާގެ ހިދުމަތެވެ. ސްޓެލްކޯއިން އެ ރަށުގައި ދެނީ ފެނާއި ކަރަންޓުގެ ހިދުމަތެވެ.
