ފެނަކަ ކޯޕަރޭޝަން ލިމިޓެޑްގެ ހިންގުން ވަގުތީ ގޮތުން ހަވާލުކުރުމަށްޓަކައި އެ ކުންފުނީގެ އެގްޒެކެޓިވް ޑިރެކްޓަރުގެ މަގާމަށާއި އެކްޓިން މެނޭޖިން ޑިރެކްޓަރުގެ މަގާމަށް ޑރ. އަލީ އަޒުވަރު އައްޔަނުކޮށްފި އެވެ.
މި ބަދަލާއެކު ފެނަކަ ކޯޕަރޭޝަންގެ ޑިރެކްޓަރުންގެ ބޯޑަށް ވެސް އައު މެންބަރަކު ވަނީ އައްޔަނުކޮށްފަ އެވެ.
ފެނަކައިގެ ހިންގުމާ ވަގުތީ ގޮތުން ހަވާލުވެވަޑައިގެންނެވި އަޒުވަރަކީ ސްޓެލްކޯގެ އެމްޑީ އެވެ. އޭނާ މި މަގާމަށް އައްޔަނުކުރެއްވީ ކުންފުނީގެ ހިންގުން ހަރުދަނާކޮށް، ކުރިއަށް ހުރި މުހިންމު މަސައްކަތްތައް މެދުނުކެނޑި ކުރިއަށް ގެންދިއުމަށްޓަކައެވެ.
މީގެ އިތުރުން ފެނަކަ ކޯޕަރޭޝަންގެ ޑިރެކްޓަރުންގެ ބޯޑަށް އައްޔަނުކުރައްވާފައިވަނީ ހ. ހުދުރިޔާ، އިބްރާހިމް ނިޒާމެވެ. އޭނާ ބޯޑަށް އައްޔަނުކުރެއްވުމާއެކު ކުންފުނީގެ އިސް ނިންމުންތައް ނިންމުމުގައާއި ސިޔާސަތުތައް އެކުލަވާލުމުގައި އައު ހަކަތައެއް ލިބިގެންދާނެ ކަމަށް ބެލެވެ އެވެ.
ސަރުކާރުން ވަނީ ފެނަކަ އުވާލައި ސްޓެލްކޯއާ އެއްކޮށްލަން ނިންމައިފަ އެވެ. ފެނަކައިގެ އެމްޑީއަކަށް ހުންނެވި މުހައްމަދު އަފީފް ވަނީ އިއްޔެ މަގާމުން ވަކިކޮށްފަ އެވެ. ނަމަވެސް އޭނާއަށް ހަމަ އިއްޔެ އެހެން މަގާމެއް ވަނީ ސަރުކާރުން ދީފަ އެވެ.
ފެނަކަ އުވާލުމުގެ އިތުރުން ރޯޑް ޑިވެލޮޕްމަންޓް ކޯޕަރޭޝަން އުވާލަން ވެސް ސަރުކާރުން ވަނީ ނިންމައިފަ އެވެ. އެތަނުގެ މަސައްކަތް އެއްކޮށްލާނީ އެމްޓީސީސީއާ އެވެ.
