ސްޓްލެކޯގެ ޖަނަރޭޓަރުތަކުން އަރާ ދުމުންނާއި އިވޭ އަޑުން އަދި ޖެނެރޭޓަރުތަކުން ކުރާ ވައިބްރޭޝަނުގެ ސަބަބުން ލިބޭ ގެއްލުމުގެ ބަދަލު ހޯދަން ދައުވާ ކުރެވިދާނެ ކަމަށް ކަނޑައަޅަން ހުށަހެޅި މައްސަލައެއްގެ އިސްތިއުނާފް ކުރިއަށްގެންދެވޭނެކަން ހައި ކޯޓުން މިއަދު ކަނޑައަޅައިފި އެވެ.
މި މައްސަލައަކީ ސްޓެލްކޯގެ އިންޖީނުތަކުން ބޭރުވާ ނުރައްކާތެރި ދުމާއި ގަދަ އަޑުގެ ސަބަބުން، ރައްކާތެރި މާހައުލެއްގައި ދިރިއުޅުމުގެ އަސާސީ ހައްގު ގެއްލޭ ކަމަށް ބުނެ ހ. ފެހިހިރީގައި ދިރިއުޅޭ ފަސް މީހަކު ހުށަހެޅި ދައުވާއެކެވެ.
އެ މައްސަލައިގައި ސިވިލް ކޯޓުން ނިންމީ ގެއްލުމުގެ ބަދަލު ހޯދަން ދައުވާ ކުރުމުގެ ހައްގު ލިބިގެންވާ ކަމަށް ކަނޑައެޅެން ނެތް ކަމަށެވެ. ދަށު ކޯޓުގެ އެ ނިންމުން ހައި ކޯޓުގައި އިސްތިއުނާފު ކުރުމުން ސްޓެލްކޯއިން އެދިފައި ވަނީ އެ އިސްތިއުނާފް ބާތިލްކޮށްދޭށެވެ. ހައި ކޯޓުން ގޮތެއް ކަނޑައެޅީ އެ ހުށަހެޅުމަށެވެ.
"މި އިސްތިއުނާފުގެ މައްސަލަ ބާތިލުކުރާނެ ތަނެއް ނެތް ކަމަށް މި އިސްތިއުނާފު ބަލަމުންދާ ފަނޑިޔާރުންގެ މަޖިލީހުގެ އިއްތިފާގުން ނިންމައިފިން،" އެ ނިންމުމުގައި ބުނެފައިވެ އެވެ.
ސްޓެލްކޯއާ ދެކޮޅަށް ދަށު ކޯޓަށް ހުށަހެޅި މައްސަލައިގައި ބުނެފައި ވަނީ ޖެނެރޭޓަރުތަކުގެ ސަބަބުން ސާފު އަދި ސިއްހަތަށް ރަނގަޅު މާހައުލެއްގައި ދިރިއުޅުމުގެ ހައްގު ގެއްލިފައިވާ ކަމަށެވެ.
"ސްޓެލްކޯ އިން ގާނޫނާ ހިލާފަށް ޖަނަރޭޓްތަކެއް ބަހައްޓައި، އެ ޖަނަރޭޓްތަކުގެ ކަޅު ވިހަ ދުންތަކާއި، ސިއްހަތަށް ގެއްލުންވާ ބާރުގަދަ އަޑުން އެ ސަރަހައްދު ތަގައްޔަރުކޮށް, އެ ސަރަހައްދުގައި ދިރިއުޅޭ މީހުންގެ ސިއްހަތަށް ވަނީ ގެއްލުންދީފަ،" އެ ދައުވާގައި ބުނެފައިވެ އެވެ.
ހ. ފެހިހިރީގައި ދިރިއުޅޭ މީހުންނަށް މާލެ ސަރަހައްދުން އެހެން ބިމެއް ހަމަޖައްސައިދެއްވާނެ ކަމަށް މާލޭގެ މޭޔަރުގެ މަގާމުގައި ހުންނެވިއިރު، ރައީސް މުހައްމަދު މުއިއްޒު އިއުލާނު ކުރެއްވި އެވެ. ނަމަވެސް އޭގެ ފަހުން އެ ވައުދުގެ ހަބަރެއް އެ އާއިލާއަކަށް ނުލިބެ އެވެ.
