މެލްބާން، އޮސްޓްރޭލިއާ (ނޮވެމްބަރު 4) - މަޝްހޫރު އޯލް ރައުންޑަރު، ގްލެން މެކްސްވެލް، 38، އޮސްޓްރޭލިއާ ގައުމީ ޓީމަށް އެއްކޮށް ކުޅުން ހުއްޓާލައިފި އެވެ.
މިދިޔަ އަހަރުގެ ޖޫން މަހުގައި، މެކްސްވެލް ވަނީ ވަން ޑޭ އިންޓަނޭޝަނަލް (އޯޑީއައި) ފޯމެޓްގައި ކުޅޭ އޮސްޓްރޭލިއާ ޓީމަށް ކުޅުން ހުއްޓާލައިފަ އެވެ. އޭގެ ފަހުން، އޭނާ ވަނީ އޮސްްޓްރޭލިއާގެ ޓީ20 ކްރިކެޓް ޓީމަށް މި އަހަރު ކުޅެފަ އެވެ. އެ މުބާރާތުގައި އޮމާނާ ދެކޮޅަށް އޮސްޓްރޭލިއާ އިން ކުޅުނު މެޗަކީ މެކްސްވެލް، އޮސްޓްރޭލިއާ ޖޯޒީގައި ފެނުނު ފަހު މެޗެެވެ.
"ވަރަށް ބަައިވަރު މަޝްވަރާތަކެއް ހަގީގަތުގައި ދިޔަ (ރިޓަޔަމަންޓާ ގުޅޭގޮތުން) ވޯލްޑް ކަޕްގެ ކުރިން ވެސް އަދި ފަހުން ވެސް. ވަރަށް ހަމަޖެހިލައިގެން ނިންމާ ނިންމުމެއް މިއީ، އެއްވެސް ފަރާތެއްގެ ޕްރެޝަރެއް އެ ކަހަލަ އެއްވެސް ކަމެއް އޮވެގެނެއް ނޫން. މުސްތަގުބަލަށް ވިސްނަން ޖެހޭ،" މެކްސްވެލް ބުންޏެވެ.
އޮސްޓްރޭލިއާ ޓީމާ އެކު، އޯޑީއައިގެ ދެ ވޯލްޑް ކަޕެއްގެ ޗެމްޕިއަންކަން (2015 އާއި 2023 ވަނަ އަހަރު) ހޯދި މެކްސްވެލް ވަނީ 2021 ވަނަ އަހަރު އޮސްޓްރޭލިއާ އިން ޓީ20 ވޯލްޑް ކަޕް ހޯދިއިރު ވެސް މޮޅު ކުޅުމެއް ދައްކައިފަ އެވެ. މެކްސްވެލް ބުނީ، ޓީ20 ގެ އިތުރު އެއް މުބާރާތް އޮސްޓްރޭލިއާ އަށް ކާމިޔާބުކޮށްދޭން ވަރަށް ބޭނުންވި ކަމަށާއި ކުރިއަށް އޮތް 2028 ގެ އޮލިމްޕިކްސްގައި ކުޅޭ އޮސްޓްރޭލިއާ ޓީމަށް އެކަން ކުރެވިދާނެ ކަމަށެވެ.
އޮސްޓްރޭލިއާގެ ޓެސްޓް ކްރިކެޓް ޓީމަށް ހަތް މެޗު ކުޅެދީފައިވާ މެކްސްވެލް ބޮޑަށް ފެނުނީ ޓީ20 އާއި އޯޑީއައި ފޯމެޓުގަ އެވެ. އެ ގޮތުން، 149 އޯޑީއައި މެޗު އޮސްްޓްރޭލިއާ އަށް ކުޅެދިން މެކްސްވެލް ވަނީ 130 ޓީ20 މެޗު އެ ޓީމަށް ކުޅެދީފަ އެވެ.
