ކޮލަމްބޯ (މެއި 1) - ސްރީ ލަންކާގެ ރައީސް، އަނޫރާ ކުމާރާ ޑިސަނަޔަކެއާ ބައްދަލުވުމެއް ބޭއްވުމަށް ފަހު، ސްރީ ލަންކާގެ ކްރިކެޓް ޖަމިއްޔާ، ސްރީ ލަންކާ ކްރިކެޓްގެ ރައީސް ޝައްމި ސިލްވާ އާއި އޭނާގެ ލީޑަޝިޕުން މަގާމުން އިސްތިއުފާދީފައިވާއިރު، ބޭނުންވާ ބަދަލުތައް ގެންނަން، ލަންކާ ސަރުކާރުން ނުވަ މެމްބަރުންގެ ކޮމިޓީއަކާ މަސައްކަތް ހަވާލުކޮށްފި އެވެ.
ލަންކާ ކްރިކެޓްގެ ރައީސްކަން، 2019 އިން ފެށިގެން ކުރަމުން އަންނަ ޝަންމިގެ ލީޑަޝިޕްގެ ދަށުން އެ ގައުމުގެ ކްރިކެޓް ކުރިއަށްނުދާތީ އާއި ލިބޭ ފަންޑް އެކަށީގެންވާ ގޮތަށް ހޭދަކޮށް ކުރިއެރުން ނުފެންނާތީވެ، ފާޑުކިޔުންތަކެއް ވަނީ އަމާޒުވެފަ އެވެ. އަދި، މި އަހަރު ކުރީކޮޅުގައި، ލަންކާ އާއި އިންޑިއާގައި ހޯސްޓްކުރި، ޓީ20 ވޯލްޑް ކަޕަށް ފަހު، ހާލަތު އިތުރަށް ގޯސްވަމުން އަންނާތީވެ، ސަރުކާރުން މި ކަމަށް ބަދަލެއް ގެނައުމަށް އިސްނެގީ އެވެ.
ނުވަ މެމްބަރުންގެ ކޮމިޓީގެ ޗެއާމަނަކީ، ގާނޫނު ހަދާ މަޖިލީހުގެ މެމްބަރު، އެރަން ވިކްރަމަރަތުނޭ އެވެ. އެ ކޮމިޓީގައި ދެން ހިމެނޭ ފަރާތްތަކަށް ބަލާއިރު ކުރިން ލަންކާ ގައުމީ ޓީމަށް ކުޅެފައިވާ ރޯޝަން މަހަނަމާ އާއި ކުމާރު ސަންގަކާެރާގެ އިތުރުން، ކްރިކެޓްގައި ހަރަކާތްތެރިވާ ސިދާތު ވެއްޓިމުނީ އަދި ޕްރަކާޝް ޝަފުތަރު ހިމެނެ އެވެ. އޭގެ އިތުރުން، ވިޔަފާރި ދާއިރާގެ އަވަންތީ ކޮލޮމްބަގޭ އާއި ތުޝިރާ ރަޑެއްލާގެ އިތުރުން، ގާނޫނީ ދާއިރާގެ ދެ މެމްބަރެއް ކަމަށްވާ އުޕުލް ކުމަރަޕެރުމާ އަދި ިދިނަލް ފިލިޕްސް ހިމެނެ އެވެ.
މި ކޮމިޓީގެ ބޭނުމަކީ، ސްރީ ލަންކާ ކްރިކެޓްގެ އަސާސީ ގަވާއިދުގެ ކަންކަން ރަނގަޅުކުރުމާއި ގުޑް ގަވަރްނަންސް ތެރެއިން ހިންގޭނެ އޮނިގަނޑެއް އެކުލަވާލުމުގެ އިތުރުން، ސްރީ ލަންކާގެ ކްރިކެޓްގައި ދުނިޔޭގެ ފެންވަރު ވަސީލަތްތަކެއް ގާއިމްކުރުމަށް ބޭނުންވާ ޕްލޭނެއް އެކުލަވާލުމެވެ.
ލަންކާގެ ސަރުކާރުގެ ބައިވެރިވުމާ އެކު، އެ ގައުމުގެ ކްރިކެޓް ޖަމިއްޔާ އަށް މި ގެންނަ ބަދަލާ މެދު، އިންޓަނޭޝަނަލް ކްރިކެޓް ކައުންސިލް (އައިސީސީ) އިން އަދި ވަކި ގޮތެއް ހާމަނުކުރެ އެވެ. މީގެ ކުރިން، 2023 ވަނަ އަހަރު އައިސީސީން ވަނީ ލަންކާ ސަސްޕެންޑްކޮށްފަ އެވެ. އެއީ، އޭރުގެ ސްރީ ލަންކާ ސަރުކާރުން ކްރިކެޓް ޖަމިއްޔާ އަށް ނުފޫޒު ފޯރިވި މައްސަލައިގަ އެވެ. އަދި، 2015 ވަނަ އަހަރު، ސްރީ ލަންކާ ސަރުކާރުން ވަނީ ކްރިކެޓް ޖަމިއްޔާ ހިންގުން އިންޓަރިމް ކޮމިޓީއެއްގެ ދަށަށް ގެނެސްފަ އެވެ. އެހެންވެ، އައިސީސީން އެ ފަހަރު ސްރީ ލަންކާ ކްރިކެޓްގެ ފަންޑިން ހުއްޓާލި އެވެ.
އެކަމަކު، މި ފަހަރު ސްރީ ލަންކާ ކްރިކެޓްގެ އެންމެ ފަހުގެ ހިންގާ ކޮމިޓީ އިސްތިއުފާ ދިނުމަށް ފަހު، ބަދަލުތަކެއް ގެންނަން ސަރުކާރަށް އެއްބާރުލުން ދިނުމުން، މި ކަމުގައި އައިސީސީން ފިޔަވަޅެއް އެޅުުމުގެ ފުރުސަތު ކުޑަ ކަމަށް ރިޕޯޓްތައް ބުނެ އެވެ.
