މެޑްރިޑް (ނޮވެމްބަރު 4) - ޔުއެފާ ޗެމްޕިއަންސް ލީގުގެ އެންމެ ފަހުން ދެ ފަހަރުގެ ޗެމްޕިއަން، ޕީއެސްޖީން މި ފަހަރުގެ މުބާރާތުގައި ރޭ ކުޅުނު މެޗުގައި 17 މިނިޓް ތެރޭ ހަތަރު ގޯލު ޖަހައި، 6-0 އިން ވިޔަރެއާލް ދަނޑުގައި މޮޅުވެއްޖެ އެވެ.
ޗެމްޕިއަންސް ލީގުގެ ސެމީ ފައިނަލަށް 2006 ވަނަ އަހަރު ދަތުރުކުރި ވިޔަރެއާލްގެ ސްޓޭޑިއަމް، އެސްޓަޑިއޯ ޑެ ލަ ކެރާމީކާގައި ރޭ ކުޅުނު މެޗުގެ ނުވަ ވަނަ މިނިޓްގައި ޕީއެސްޖީން ލީޑުނެގީ ޖޮއާއޯ ނެވޭސް ޖެހި ގޯލުންނެވެ. އޭގެ ތިން މިނިޓް ފަހުން، ޑެޒީރޭ ޑޫއޭ ވަނީ ޕީއެސްޖީގެ ލީޑުފުޅާކޮށްދީފަ އެވެ. އަދި، މި ލަނޑު ޖެހިތާ މިނިޓެއް ތެރޭ ސެނީ މަޔޫލޫ ވަނީ ޕީއެސްޖީގެ ތިން ވަނަ ގޯލު ޖަހައިފަ އެވެ.
މެޗުގެ 17 ވަނަ މިނިޓްގައި ޕީއެސްޖީގެ ހަތަރު ވަނަ ލަނޑު ޖެހީ ފަބިއަން ރުއީޒް އެވެ. ރުއީޒް މި ލަނޑު ޖެހުމަށް ފަހު ވަނީ، އިއްޔެ މަރުވި 30 އަހަރުގެ ސްޕެއިން ފޯވާޑް، ޖީސޫސް ޑި މިގުއެލްގެ ހަނދާން އާ ކޮށްފަ އެވެ. ޑި މިގުއެލް މަރުވީ ދަނޑުމަތީގައި މެޔަށާއި ބޮލަށް ލިބުނު އަނިޔާ އަކަށް ހޮސްޕިޓަލަށް ގެންގޮސް ފަރުވާދޭން ފެށިތާ އެއް ދުވަސް ފަހުންނެވެ.
ދަނޑުމަތިން ލިބުނު އަނިޔާއަކަށް ފަރުވާދެނިކޮށް ސްޕެއިންގެ ފޯވާޑެއް މަރުވެއްޖެ
ސްޕެއިންގެ ދެވަނަ ޑިވިޝަނުގެ މެޗެއްގެ ތެރެއިން އިދިކޮޅު ކީޕަރުގެ ކަކޫ މޭމަތީގައި ޖެހި ލިބުނު ސީރިއަސް އަނިޔާތަކަކަށް ފަރުވާދެމުންދަނިކޮށް، ޓެނެރިފްގެ ފޯވާޑް ޖީސޫސް ޑި މިގުއެލް މަރުވެއްޖެ. އުމުރުން 30 އަހަރުގެ މި ކުޅުންތެރިޔާ މަރުވީ މޭމަތީގެ އިތުރުން ބޮލަށް ލިބުނު އަނިޔާތަކަށް ހޮސްޕިޓަލުގައި ފަރުވާދެމުން ދަނިކޮށް.
ޔޫރަޕްގެ މައި ފުޓްބޯޅަ އިދާރާ، ޔުއެފާ އިން ވަނީ މި ހަފްތާގެ ޗެމްޕިއަންސް ލީގުގެ މެޗުތައް ފެށުމުގެ ކުރިން ޑި މިގުއެލްގެ ހަނދާނުގައި ސުކޫތެއް ގެންނަން ނިންމައިފަ އެވެ.
ޕީއެސްޖީގެ ފަސް ވަނަ ލަނޑު ޖެހީ ވެސް ރުއީޒް އެވެ. މިއީ، ވިޓީނިއާ ތަނަވަސްކޮށްދިން ފުރުސަތެއްގައި، ދެ ވަނަ ހާފުގެ ކުޅުން ފެށިގެން ފަސް މިނިޓް ތެރޭ ރުއީޒް ޖެހި ގޯލެކެވެ. ޕީއެސްޖީގެ ފަހު ލަނޑު ޖެހީ 17 އަހަރުގެ ތަރި ޑޭވިޑް ބޮލީ އެވެ.
ޗެމްޕިއަންސް ލީގުގެ ލީގު ފޭސްގައި މި ވަގުތަށް ބަލާއިރު، ކުޅުނު ހަތަރު މެޗުން މޮޅުވެގެން އެއް ވަނައިގައި އޮތީ ޕީއެސްޖީ އެވެ.
ޗެމްޕިއަންސް ލީގުގައި ރޭ ބަޔާން މިއުނިކުން ވަނީ ލެނާޓް ކާލް އާއި ކޮންރަޑް ލައިމާގެ ލަނޑުތަކުން 2-0 އިން އެތުލެޓިކޯ މެޑްރިޑް ބަލިކޮށްފަ އެވެ. އަދި، އިންޓަ މިލާނުން ފެޔަނޫޑް ދަނޑުގައި 3-0 އިން މޮޅުވިއިރު، ލަނޑުތައް ޖެހީ ޔެން ބިސެކް، ޕިއޯ އެސްޕޮސީޓޯ އަދި ޕިއޮޓްރޭ ޒިއެލިންސްކީ އެވެ. މި މެޗުގައި އެސްޕޮސީޓޯ ޖެހި ގޯލެއް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިނުގަންނަން ވަނީ ނިންމައިފަ އެވެ.
