ކުއަލަ ލަމްޕޫރު، މެލޭޝިއާ (ނޮވެމްބަރު 3) - ޔަމަނުގެ ހޫތީން ސައުދީ އަރަބިއްޔާއާ ދެކޮޅަށް ފަށާފައިވާ ހަނގުރާމައިގެ ކަަންކަމާހެދި ސަލާމަތީ ސަބަބުތަކަށް ބެލުމަށް ފަހު، ސައުދީ އަރަބިއްޔާގައި އަންނަ އަހަރުގެ ކުރީކޮޅު ބާއްވަން އޮތް އޭޝިއަން ކަޕް ފުޓްބޯޅަ މުބާރާތް ފަސްކުރަން އޭޝިއަން ފުޓްބޯލް ކޮންފެޑަރޭޝަން (އޭއެފްސީ) އިން ނިންމައިފި އެވެ.
ސައުދީ އަރަބިއްޔާގައި އޭޝިއަން ކަޕް ހޯސްޓްކުރަން ތާވަލުކޮށްފައި އޮތީ އަންނަ ޖެނުއަރީ މަހު 7 އިން ފެބްރުއަރީ މަހު ފަސް ވަނަ ދުވަހުގެ ނިޔަލަށެވެ. އެކަމަކު، އޭއެފްސީން މިއަދު ނިންމާފައިވަނީ، އޭޝިއަން ކަޕް ފަސްކޮށްފައިވަނީ، އަންނަ އަހަރުގެ ޑިސެމްބަރު 23 އިން 2028 ވަނަ އަހަރު ޖެނުއަރީ 21 ގެ ނިޔަލަށް ކަމަށެވެ
ހޫތީން މިދިޔަ މަހު ރިޔާދުގެ އިންޓަނޭޝަނަލް އެއާޕޯޓަށް ދިން ހަމަލާއެއްގައި 12 މީހުން މަރުވެ، 300 އަށް ވުރެން ގިނަ މީހުން ޒަހަމްވި އެވެ. އިތުރު ހަމަލާތަކެއްގެ އިންޒާރު ދިނުމާ އެކު، އޭއެފްސީން ވަނީ އޭޝިއަން ކަޕް ފަސް ކުރަން މަޝްވަރާތައް ފަށައިފަ އެވެ.
އޭގެ ފަހުން، ހޫތީން މިދިޔަ ހޯމަ ދުވަހު ވަނީ، ހަބަރު ފަތުރާ ވަސީލަތްތައް މެދުވެރިކޮށް، ސައުދީ އަރަބިއްޔާގެ ދައްމާމަށް ޑްރޯން ހަމަލާދޭން ފަށާފައިވާކަން އިއުލާނުކޮށްފަ އެވެ. އެއާ އެކު، އޭއެފްސީން އަވަސް ބައްދަލުވުންތަކެއް ބާއްވައި، އޭޝިއަން ކަޕް ފަސްކުރަން ނިންމީ އެވެ.
"މުބާރާތް ބާއްވަން ކަނޑައެޅި އާ ތާރީހުތައް ފީފާ އަށް އަންގައި، ހުއްދަތައް ހޯދުމުގެ މަސައްކަތް ފަށައިފިން،" އޭއެފްސީން ބުނެފައިވެ އެވެ.
ސައުދީގަައި ބާއްވާ އޭޝިއަން ކަޕްގެ އޮގަނައިޒިން ކޮމިޓީގެ އެންމެ އިސް ފަރާތް، ޔާސިރު އަލް މިޝާލް ވިދާޅުވީ. އޭއެފްސީއާ އެކު ވަރަށް ގާތުން މަޝްވަރާ ކުރަމުން އަންނަ ކަމަށެވެ. އަދި، މިހާރު ކަނޑައަޅާފައި އޮތް ތާރީހުގައި އޭޝިއާގެ އެންމެ ވަރުގަދަ 24 ގައުމު ކުޅޭ ފުޓްބޯޅައިގެ ބޮުޑު މުބާެރާތް ހޯސްޓްކުރަން ސައުދީން ފުރިހަމަ އަށް ތައްޔާރު ކަމަށް ޔާސިރު ވަނީ ވިދާޅުވެފަ އެވެ.
ސައުދީން 2034 ވަނަ އަހަރުގެ ފީފާ ވޯލްޑް ކަޕް ބާއްވަން ކުރާ މަސައްކަތުގެ ތެެރެއިން، ގިނަ ލަނޑުދަނޑިތަކެއް ހާސިލްކުރުމަށް މި ފަހަރުގެ އޭޝިއަން ކަޕް މުހިންމު ރޯލެއް އަދާކުރާނެ ކަމަށް ސައުދީ ސަރުކާރުން ވަނީ މީގެ ކުރިން ބުނެފަ އެވެ.
މީގެ ދެ އަހަރު ކުރިން، އެންމެ ފަހުން ބޭއްވި އޭޝިއަން ކަޕް ހޯސްޓްކުރީ، 2024 ވަނަ އަހަރު ގަތަރުގަ އެވެ. ގަތަރުން ވަނީ 3-1 އިން ޖޯޑަން ބަަލިކޮށް، ޖެހިޖެހިގެން ދެ ވަނަ އޭޝިއަން ކަޕް ކާމިޔާބުކޮށްފަ އެވެ. ގަތަރުން ފުރަތަމަ އޭޝިއަން ކަޕް ކާމިޔާބުކުރީ، 2019 ވަަނަ އަހަރު ޔޫއޭއީގައި ބޭއްވި މުބާރާތުގައި ފައިނަލުގައި 3-1 އިން ޖަޕާން ބަލިކޮށްފަ އެވެ.
