އިންޑިއާގެ ނޫސްވެރިން އެ މީހުން ލިޔާ ޚަބަރުތަކުގައި ހިމެނޭ ފަރާތްތަކުގެ ހުއްދަ ހޯދަން މަޖުބޫރުވާ ގޮތަށް އެކުލަވާލާފައިވާ އާންމު ފަރުދުންގެ އަމިއްލަ މިނިވަންކަމާ ބެހޭ ގާނޫނަކީ، ޝާއިއުކުރުމުގެ ކުރިން ޚަބަރުތައް ސެންސަރުކުރުން ފަދަ ކަމެއް ކަމަށާއި، މީގެ ސަބަބުން ނޫސް އިދާރާތައް ބަންދުކުރަން ޖެހިދާނެ ކަމަށް މީޑިއާ ގްރޫޕްތަކުން އަންގާރަ ދުވަހު ސުޕްރީމް ކޯޓުގައި ބުނެފި އެވެ.
މި މައްސަލަ ކޯޓަށް ހުށަހަޅާފައި މިވަނީ، 2014 ވަނަ އަހަރު ބޮޑުވަޒީރު ނަރެންދުރަ މޯދީ ވެރިކަމާ ހަވާލުވެވަޑައިގަތް ފަހުން އިންޑިއާގައި ނޫސްވެރިކަމުގެ މިނިވަންކަން ހަނިވަމުންދާ ކަމުގެ ތުހުމަތުތައް އިތުރުވެފައިވާ ދަނޑިވަޅެއްގަ އެވެ. ފާޑުކިޔާ ފަރާތްތަކުން ބުނާ ގޮތުގައި އިންޑިއާގެ ގިނަ މީޑިއާ އިދާރާތަކުން މޯދީގެ ސަރުކާރު ޒިންމާދާރުކުރުވުމަށް ކުރަންޖެހޭ މަސައްކަތްތައް އެކަށީގެންވާ މިންވަރަށް ނުކުރެ އެވެ. ނަމަވެސް ސަރުކާރުން މި ތުހުމަތުތައް ދޮގުކުރަމުން ބުނަނީ، ނޫސްވެރިކަމުގެ މިނިވަންކަމަށް އިހުތިރާމްކުރާ ކަމަށެވެ.
މުކޭޝް އަމްބާނީ އާއި ގޯތަމް އަދާނީ ފަދަ ބިލިއަނަރުންގެ ކުންފުނިތައް ހިމެނޭހެން، ޖުމްލަ 21 ނޫސް އިދާރާއަކުން ވަނީ މި ގާނޫނު އިސްތިއުނާފުކޮށްފަ އެވެ. ރޮއިޓާސްއިން ހޯމަ ދުވަހު ރިޕޯޓުކޮށްފައިވާ ގޮތުގައި، އެ ފަރާތްތަކުން ވަކާލާތު ކުރަނީ މި ގާނޫނުގެ ސަބަބުން ތަހުގީގީ ނޫސްވެރިކަމަށް ހުރަސް އެޅި، ނޫސްވެރިންނަށް މައުލޫމާތު ދޭ މަސްދަރުތައް ދެނެގަތުމުގެ ފުރުސަތު ސަރުކާރަށް ލިބިގެންދާނެ ކަމަށެވެ.
"މި ގާނޫނުގެ ސަބަބުން ޚަބަރަކީ ކޮބައިކަމާ މެދު އޮތް މުޅި ތަސައްވުރު ބަދަލުވެގެންދާނެ،" ޑިޖިޓަލް ނިއުސް ޕަބްލިޝާސް އެސޯސިއޭޝަން (ޑީއެންޕީއޭ) ގެ ވަކީލު މާދަވީ ގޮރާޑިއާ ދިވާން ފަނޑިޔާރުންގެ ކުރިމަތީގައި ވިދާޅުވި އެވެ.
އޭނާ އިތުރަށް ވިދާޅުވީ، ޚަބަރު ލިޔުމުގެ ކުރިން ކޮންމެ ފަހަރަކު ހުއްދަ ހޯދަން ޖެހޭ ނަމަ ނޫސް އިދާރާތައް ބަންދުކުރަން ޖެހޭނެ ކަމަށާއި، މިއީ ޚަބަރު ފެތުރުމުގެ ކުރިން އެއްކޮށް ސެންސަރުކުރުމުގެ ނިޒާމެއް ކަމަށެވެ.
މި މައްސަލައަކީ މޯދީ ސަރުކާރުގެ އަމިއްލަ މިނިވަންކަމާ ބެހޭ ގާނޫނާ ދެކޮޅަށް ހުށަހެޅުނު އެންމެ ބޮޑު ގާނޫނީ ގޮންޖެހުމެވެ. މީގެ ކުރިން މި ގާނޫނާ ދެކޮޅަށް ކޯޓަށް ގޮސްފައިވަނީ ހަމައެކަނި ޚިޔާލު ފާޅުކުރުމުގެ މިނިވަންކަމަށް މަސައްކަތްކުރާ އެކްޓިވިސްޓުންނާއި ކުދި ނޫސް އިދާރާތަކުންނެވެ.
މި މައްސަލައިގެ އަޑުއެހުންތައް އަންނަ މަހު ކުރިއަށް ގެންދިއުމަށް ސުޕްރީމް ކޯޓުން ވަނީ ނިންމާފަ އެވެ.
