އިންޑިއާގެ ދެވަނައަށް އެންމެ މުއްސަނދި މީހާ ކަމަށްވާ މުކޭޝް އަމްބާނީގެ ޑިޖިޓަލް އަދި ޓެލެކޮމިއުނިކޭޝަން ވިޔަފާރިން، އެ ގައުމުގެ ތާރީޚުގައި ބާއްވާ އެންމެ ބޮޑު ހިއްސާގެ ބާޒާރަށް ފުރަތަމަ ފަހަރަށް އާންމު އިންވެސްޓަރުންނަށް ހުޅުވާލައިފި އެވެ.
ރިލަޔަންސް އިންޑަސްޓްރީޒް ލިމިޓެޑްގެ ދަށުން ހިންގާ ޖިއޯ ޕްލެޓްފޯމްސް އިން ބުދަ ދުވަހު ފެށި އައިޕީއޯ ނުވަތަ އަލަށް ހިއްސާ ވިއްކުމުގެ މަރުހަލާގައި، އަލަށް ނެރޭ ހިއްސާ ވިއްކައިގެން 302 ބިލިއަން ރުޕީސް (3.2 ބިލިއަން ޑޮލަރު) ހޯދުމަށް ވަނީ އަމާޒު ހިފާފަ އެވެ.
މި ހިއްސާ ވިއްކައިގެން ލިބޭ ފައިސާ އެ ކުންފުނިން ބޭނުންކުރާނީ، އިންޑިއާގެ އަމިއްލަ ދާއިރާގެ އެންމެ ބޮޑު ޓެލެކޮމް އޮޕަރޭޓަރު ކަމަށްވާ ރިލަޔަންސް ޖިއޯ އިންފޯކޮމް ލިމިޓެޑް ބިނާކުރުމަށާއި ފުޅާކުރުމަށް ނަގާފައިވާ ލޯނުތައް އަނބުރާ ދެއްކުމަށެވެ.
އިންޑިއާގެ ހިއްސާގެ ބާޒާރު މިވަގުތު ދަށްކޮށް އޮތް ނަމަވެސް، މިއީ ނޭޝަނަލް ސްޓޮކް އެކްސްޗޭންޖް (އެންއެސްއީ) އިން ނެރުނު 2.4 ބިލިއަން ޑޮލަރުގެ ހިއްސާގެ ފަހުން، އެއް މަސް ދުވަހުގެ ތެރޭގައި އިންޑިއާގައި ބާއްވާ މިފަދަ ދެވަނަ ބޮޑު އައިޕީއޯ އެވެ.
ހުކުރު ދުވަހުގެ ނިޔަލަށް ކުރިއަށްދާ މި ހިއްސާ ވިއްކުމުގައި، ޖިއޯ ޕްލެޓްފޯމްސްގެ ހިއްސާއެއް ވިއްކުމަށް ހަމަޖެހިފައިވަނީ 1,065 އާއި 1,119 ރުޕީސްއާ ދެމެދުގެ އަގަކަށެވެ.
މި ހިއްސާ ވިއްކަން ފަށާފައި މިވަނީ، އިންޑިއާގެ އެންމެ ކުރިއަރާފައިވާ 50 ކުންފުނި ހިމެނޭ އެންއެސްއީގެ ބެންޗްމާކް އިންޑެކްސް "ނިފްޓީ 50" މި އަހަރުގެ ތެރޭގައި 12 އިންސައްތައަށް ވުރެ ބޮޑަށް ދަށަށް ގޮސްފައިވާ ދަނޑިވަޅެއްގަ އެވެ.
ރޮއިޓާސްގެ ރިޕޯޓެއްގައިވާ ގޮތުން، އައިޕީއޯ ރަސްމީކޮށް ހުޅުވާލުމުގެ ކުރިން، މުއައްސަސާތަކަށް ޚާއްސަކޮށްފައިވާ ހިއްސާތަކަށް ހޯމަ ދުވަހު އެކަނިވެސް 3.2 ބިލިއަން ޑޮލަރުގެ ބިޑް ވަނީ ލިބިފަ އެވެ. މިއީ އެ ފަރާތްތަކަށް ކަނޑައަޅާފައިވާ މިންވަރަށް ވުރެ 30 ގުނަ އިތުރު އަދަދެކެވެ.
މުއައްސަސާތަކުން ލިބުނު މި ބޮޑު ތަރުހީބަކީ، ޖިއޯގެ ފުޅާ ދާއިރާ އާއި، ނެޓްވޯކް އިންފްރާސްޓްރަކްޗާ އަދި ގާއިމުވެފައިވާ ކަސްޓަމަރުންގެ ބޮޑު އާބާދީގެ ސަބަބުން އިންވެސްޓަރުން އެ ކުންފުންޏަށް ޝައުގުވެރިވާނެ ކަމަށް އެނަލިސްޓުން ލަފާކުރި ގޮތާ އެއްގޮތް ނަތީޖާއެކެވެ.
ކުންފުނީގެ ބާނީ ދީރޫބާއީ އަމްބާނީ ވަނީ ހިއްސާދާރުންނަކީ "ރިލަޔަންސް އާއިލާ" ގެ ބައެއްގެ ގޮތުގައި މަޝްހޫރުކޮށްފަ އެވެ. މިއީ މިއަދާ ހަމައަށް ވެސް ދެމިއޮތް އުސޫލެއް ކަމުން، އެ ކުންފުންޏަށް ވަފާތެރި އާންމު އިންވެސްޓަރުންގެ ބޮޑު އާބާދީއެއް އޮވެ އެވެ.
ޖިއޯ ޕްލެޓްފޯމްސްގެ އައިޕީއޯއަކީ ފާއިތުވި ވިހި އަހަރު ތެރޭގައި އެ ގްރޫޕުން އާންމުންނަށް ހިއްސާ ވިއްކާ ފުރަތަމަ ފަހަރެވެ. އަދި މިއީ އަމްބާނީ އާއިލާގެ އާ ޖީލަށް ކުންފުނީގެ ލީޑަޝިޕް ބަދަލުވަމުންދާކަމުގެ ނިޝާނެއް ވެސް މެއެވެ.
އިންވެސްޓަރުންނަށް މައުލޫމާތު ދިނުމުގެ ހަރަކާތްތައް އިސްކޮށް ކުރިއަށް ގެންދިޔައީ ޖިއޯ ޕްލެޓްފޯމްސްގެ މެނޭޖިން ޑިރެކްޓަރު އާކާޝް އަމްބާނީ އާއި ރިލަޔަންސް ރީޓެއިލް ވެންޗާސްގެ އެގްޒެކެޓިވް ޑިރެކްޓަރު އިޝާ އަމްބާނީ އެވެ. މި ދެބެންނަކީ ރިލަޔަންސްގެ ޗެއާމަން މުކޭޝް އަމްބާނީގެ އެއްމާބަނޑު ދެ ދަރިންނެވެ. މިފަހަރުގެ އައިޕީއޯގެ ކަންކަމުގައި މުކޭޝް އަމްބާނީ އިންވެސްޓަރުންނާ ބައްދަލުކުރައްވާފައެއް ނުވެ އެވެ.
