އިންޑިއާގެ އިލެކްޝަން ކޮމިޝަނުގެ ރައީސާ ދެކޮޅަށް ކުރި މުޒާހަރާއެއްގައި ބައިވެރިވެ، އެ ގައުމުގެ އިމިގްރޭޝަން ގާނޫނުތަކާ ޚިލާފުވެފައިވާ ކަމަށް ބުނެ، ބޮލީވުޑްގެ އެކްޓަރު އިމްރާން ޚާން މި މަސް ނިމުމުގެ ކުރިން ގައުމުން ބޭރުވުމަށް އިންޑިއާގެ ކަމާބެހޭ ފަރާތްތަކުން އަންގައިފި އެވެ.
އިންޑިއަން އެކްސްޕްރެސް ނޫހުން ރިޕޯޓްކޮށްފައިވާ ގޮތުގައި، އުމުރުން 43 އަހަރުގެ އިމްރާން ޚާނަކީ އެމެރިކާގެ ރައްޔިތެކެވެ. އިންޑިއާގެ ގާނޫނުތައް ބުނާ ގޮތުން ބޭރު ގައުމުތަކުގެ ރައްޔިތުން ސިޔާސީ މުޒާހަރާތަކުގައި ބައިވެރިވުމަކީ އިމިގްރޭޝަނާއި ވިސާގެ ގަވާއިދުތަކާ ޚިލާފު އަމަލެއްގެ ގޮތުގައި ބެލެވިދާނެ ކަމެކެވެ.
ޓައިމްސް އޮފް އިންޑިއާ ނޫހުން ބުނި ގޮތުގައި، މި މަހުގެ 28 ވަނަ ދުވަހުގެ ކުރިން އިންޑިއާއިން ފުރައިގެން ދިއުމަށް އިމްރާން ޚާނަށް މިހާރު ވަނީ މުހުލަތެއް ދީފަ އެވެ.
އޮކްޓޫބަރު މަހުގެ 10 ވަނަ ދުވަހު މުމްބާއީގައި ބޭއްވި މުޒާހަރާއެއްގައި އިމްރާން ޚާން ބައިވެރިވީ، ވޯޓުލާ މީހުންގެ ލިސްޓަށް ގެނައި ބަދަލުތަކަކީ ބޮޑުވަޒީރު ނަރެންދުރަ މޯދީގެ ޕާޓީއަށް ފައިދާވާ ގޮތަށް ގެނައި ބަދަލުތަކެއް ކަމަށް ބުނެ، އިދިކޮޅު ފަރާތްތަކުން ކުރަމުންދާ ތުހުމަތުތަކާ ގުޅިގެން، އިލެކްޝަން ކޮމިޝަނުގެ ޗީފް ކޮމިޝަނަރު ގްޔަނޭޝް ކުމާރު އިސްތިއުފާ ދިނުމަށް ގޮވާލުމަށެވެ.
މުޒާހަރާ ބޭއްވި ދުވަހު، ފުލުހުންގެ ވޭނެއްގެ ތެރޭގައި ހުރި ފޮޓޯއަކާއެކު އިމްރާން ޚާން އޭނާގެ އިންސްޓަގްރާމްގައި ކުރި ޕޯސްޓެއްގައި ބުނެފައިވަނީ، އޭނާ މިދަނީ "ބުރުޖަހާލަން" ކަމަށެވެ.
އިންޑިއަން އެކްސްޕްރެސް އިން ރިޕޯޓްކޮށްފައިވާ ގޮތުގައި، އިމްރާން ޚާން ގާނޫނާ ޚިލާފުވެފައިވާ ކަމަށް ބުނެ މުމްބާއީގެ ފުލުހުންގެ އިދާރާއަކަށް މައްސަލައެއް ހުށަހެޅުމާ ގުޅިގެން، އިންޑިއާގައި އުޅޭ ބޭރު ގައުމުތަކުގެ މީހުން މޮނިޓާކޮށް ބަލަހައްޓާ ފެޑަރަލް އެޖެންސީއެއް ކަމަށްވާ ފޮރިނާސް ރީޖަނަލް ރެޖިސްޓްރޭޝަން އޮފީހުން ވަނީ އޭނާ ގައުމުން ފުރުމަށް އަންގައި ނޯޓިސް ފޮނުވާފަ އެވެ.
މަޝްހޫރު އެކްޓަރު އާމިރު ޚާންގެ އާއިލާއަށް ނިސްބަތްވާ އިމްރާން ޚާން ވަނީ 2008 އިން 2015 އާ ދެމެދު ބޮލީވުޑްގެ ކާމިޔާބު ފިލްމުތަކެއްގައި މަސައްކަތް ކުރުމަށް ފަހު، ކުއްލި ގޮތަކަށް ފިލްމީ ދާއިރާއާ ދުރަށް ޖެހިފަ އެވެ.
