ފަރަންސޭސިވިލާތުގެ މަސްރަހު ނުތަނަވަސްވެފައިވާ މި ދަނޑިވަޅުގައި، އެ ގައުމުގެ ދާޚިލީ ކަންކަމުގެ ނާޖާއިޒު ފައިދާ ނަގައިގެން އަމިއްލަ ސިޔާސީ އެޖެންޑާތައް ކުރިއެރުވުމަށް ބޭރު ގައުމުތަކުގެ ލީޑަރުން މަސައްކަތް ކުރައްވަމުންދާ ކަމަށް އެ ގައުމުގެ ރައީސް އެމަނުއެލް މެކްރޮން ބުދަ ދުވަހު ވިދާޅުވެއްޖެ އެވެ.
މެކްރޮން އިޝާރާތް ކުރެއްވި ލީޑަރުންގެ ތެރޭގައި "އެޓްލާންޓިކް ކަނޑުގެ އަނެއް ފަރާތުގައި" ތިއްބެވި ބޭފުޅުން ވެސް ހިމެނިވަޑައިގަންނަވާ ކަމަށް އޭނާ ވިދާޅުވި އެވެ.
ދިރިއުޅުމުގެ ޚަރަދުތައް އިންތިހާއަށް ބޮޑުވުމާ ގުޅިގެން ކުރަމުންދާ މުޒާހަރާތައް ބޮޑެތި ހަމަނުޖެހުންތަކަކަށް ބަދަލުވެ، ފްރާންސްގެ އެކި ސަރަހައްދުތަކުގައި ވައްކަން ކުރުމާއި މުދަލަށް ގެއްލުން ދިނުމުގެ އަމަލުތައް ވަނީ އާންމުވެފަ އެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ މި ހަމަނުޖެހުންތަކުގެ ބޭނުން ހިއްޕަވައި، އޭނާއަށް ތާއީދުކުރާ މީހުން އެއްކުރުމަށް މަސައްކަތް ކުރައްވާފަ އެވެ. އެގޮތުން، މި ހަމަނުޖެހުންތަކުގެ ޒިންމާ އުފުލަންޖެހެނީ މުސްލިމް ހިޖުރަވެރިން ކަމަށް ބުނެ އެއްވެސް ހެއްކެއް ނެތް ދޮގު ތުހުމަތުތަކެއް ޓްރަމްޕް ވަނީ ކުރައްވާފަ އެވެ. އަދި "ވަގުތު ފާއިތުވުމުގެ ކުރިން ބޯޑަރުތައް ބަންދުކޮށް، ގައުމުގެ ކަންކަން ކޮންޓްރޯލް ކުރުމަށް" މެކްރޮންއަށް ޓްރަމްޕް ވަނީ ގޮވާލައްވާފަ އެވެ.
މިދިޔަ ހަފުތާ ބަންދުގައި ޕެރިހާއި އެހެން ސިޓީތަކުގައި ހިނގި ހަމަނުޖެހުންތަކަށް ފަހު، ބޭރުގެ ފަރާތްތަކުން މައުލޫމާތު އޮޅުވާލައިގެން ފަތުރަމުންދާ ކަމަށް ވިދާޅުވެ މެކްރޮން ވަނީ ރައްދު ދެއްވާފަ އެވެ.
މެކްރޮން ވިދާޅުވީ، ބޭރު ގައުމުތަކުގެ ލީޑަރުން ހިމެނޭހެން ގިނަ ބަޔަކު ދައްކަމުންދާ ވާހަކަތަކަކީ ބަލައިގަނެވޭނެ ވާހަކަތަކެއް ނޫން ކަމަށާއި، އެއީ ވަރަށް ހަމަނުޖެހޭ ވާހަކަތަކެއް ކަމަށެވެ.
މީގެ އިތުރުން މެކްރޮން ވިދާޅުވީ، ފަރަންސޭސިވިލާތުގައި ދުވަހަކުވެސް ހިނގާފައި ނުވާ ކަންކަން ދައްކުވައިދޭ އާޓިފިޝަލް އިންޓެލިޖެންސް (އޭއައި) ބޭނުންކޮށްގެން އުފައްދާފައިވާ ފޮޓޯތަކެއް ފަތުރަމުންދާ ކަމަށެވެ. އަދި ގިނަ އަދަދެއްގެ ހިޖުރަވެރިންނާއި ހަރުކަށި ފިކުރުގެ މުސްލިމުން ގައުމަށް އަރައިގަނެގެން އުޅޭ ކަމަށް ބުނެ ފަތުރާ ވާހަކަތަކަކީ ކަނޑައެޅިގެން ދޮގު ވާހަކަތަކެއް ކަމަށް ވެސް އޭނާ ވިދާޅުވި އެވެ.
މެކްރޮން އާއި ޓްރަމްޕަކީ ކުރިން ގާތް ގުޅުމެއް އޮތް ދެ ބޭފުޅުން ނަމަވެސް، ފަހަކަށް އައިސް ޓްރަމްޕް ގެންދަވަނީ އާންމުކޮށް ދެއްވާ ތަގުރީރުތަކުގައި މެކްރޮންއަށް ވަރަށް ބޮޑަށް މަލާމާތް ކުރައްވަމުންނެވެ.
