ނަސްރުގެ ދުވަހުގެ މުނާސަބަތުގައި ބާއްވާ ތަފާތު ހަރަކާތްތަކާ ގުޅިގެން މާލޭގެ ޖުމްހޫރީ މައިދާނާއި ޝަހީދުންގެ ބިނާ އަދި އިސްލާމީ މަރުކަޒު ހިމެނޭ ސަރަހައްދުގެ ބައެއް މަގުތަކާއި ކަނޑުގެ ސަރަހައްދު މާދަމާ ބަންދުކުރަން ދިވެހިން ފުލުހުންގެ ހިދުމަތުން ނިންމައިފި އެވެ.
ފުލުހުން އާންމުކުރި ތާވަލުގައިވާ ގޮތުން, މާދަމާ ފަތިހު 04:00 އިން ފެށިގެން ޖަމާއަތުގައި ކުރާ ފަތިސް ނަމާދާއި ދިދަ މައުންޓްކުރުމުގެ ރަސްމިއްޔާތު ނިމެންދެން ޝަހީދުންގެ ބިނާ އާއި އިސްލާމީ މަރުކަޒު ހިމެނޭ ސަރަހައްދު ބަންދުވާނެ އެވެ.
މީގެ އިތުރުން މެންދުރުފަހު 13:30 އިން ފެށިގެން މިލިޓަރީ ޑިސްޕްލޭއަށް ޖުމްހޫރީ މައިދާން ސަރަހައްދުގެ މަގުތަކުގެ އިތުރުން ފަޅާއި ކަނޑުގެ ސަރަހައްދު ބަންދުކުރާއިރު، ހަވީރު 18:30 އިން ފެށިގެން ރަސްމީ ޖަލްސާ ނިމެންދެން އެ ސަރަހައްދުގެ މަގުތަކާއި ފަޅު ބަންދު ހުންނާނެ އެވެ.
މި ވަގުތުތަކުގައި ޖުމްހޫރީ މައިދާން ވަށައިގެންވާ ހުރިހާ މަގުތަކަކުން އެއްގަމު އުޅަނދު ދުއްވުން މަނާވާނެ އެވެ. އަދި މެންދުރުފަހުގެ ހަރަކާތްތަކާ ދިމާކޮށް އެ ސަރަހައްދުގެ ފަޅަށް އޮޑިދޯނިފަހަރު ވަދެ ނިކުުމާއި ކަނޑުގެ ދަތުރުފަތުރަށްވެސް ބަދަލުތަކެއް އަންނާނެ އެވެ.
މި ނިންމުމަކީ މާދަމާ ނަސްރުގެ ދުވަހު ބޭއްވުމަށް ހަމަޖެހިފައިވާ ރަސްމީ ހަރަކާތްތައް ސަލާމަތީގޮތުންނާއި އިންތިޒާމީގޮތުން އެންމެ ފުރިހަމައަށް ކުރިއަށް ގެންދިއުމަށްޓަކައި ޓްރެފިކް ފްލޯއަށް ގެނައި ބަދަލެއްގެ ގޮތުގައި ފުލުހުން ބުނެފައިވެ އެވެ.
