ހޯމް ސްކޫލިންގެ ނަމުގައި ރާއްޖޭގެ ޒުވާން ޖީލު މަގުފުރައްދައި ހަލާކުކުރުމުގެ ފުރުސަތު ދީގެން ނުވާނެ ކަމަށް ކުރީގެ ރައީސް އަދި އިދިކޮޅު އެމްޑީޕީގެ ޗެއާޕާސަން މުހައްމަދު ނަޝީދު މިއަދު ވިދާޅުވެއްޖެ އެވެ.
ނަޝީދު މިހެން ވިދާޅުވީ ތައުލީމީ ގާނޫނަށް ހޯމް ސްކޫލިން ހިމަނަން ސަރުކާރުން އިސްލާހު ހުށަހަޅާފައިވާ ދަނޑިވަޅެއްގައި އެވެ.
މި މައްސަލައިގައި ނަޝީދު އެކްސްގައި ކުރެއްވި ޕޯސްޓުގައި ވިދާޅުވީ މިހާރު ވެސް ހަތަރު ހާހަށް ވުރެ ގިނަ ކުދިން ގަވާއިދުން ސްކޫލަށް ނުދާ ކަމަށެވެ. އެހެންކަމުން ހޯމް ސްކޫލިންގެ ނަމުގައި ކުދިންގެ މުސްތަގުބަލު ހަލާކުކުރުމުގެ ފުރުސަތު އެއްވެސް ފަރާތަކަށް ދީގެން ނުވާނެ ކަމަށް އެމަނިކުފާނު ވިދާޅުވި އެވެ.
ސަރުކާރުގެ ފަރާތުން މަޖިލީހަށް ހުށަހެޅި ބިލުގައި ބުނަނީ ޖިސްމާނީ ނުވަތަ ނުކުޅެދުންތެރިކަމުގެ ނިސްބަތަށް ނުވަތަ އެނޫން ވެސް ހާއްސަ ހާލަތަކަށް ބަލައި ސްކޫލަށް ހާޒިރުވުމުން އިސްތިސްނާ ދެވިދާނެ ކަމަށެވެ. އަދި ހޯމް ސްކޫލިން ޕްރޮގްރާމުގެ އުސޫލުތަކާ އެއްގޮތަށް ގޭގައި ތައުލީމު ފޯރުކޮށްދިނުމުގެ ފުރުސަތު އެފަދަ ކުދިންނަށް ލިބޭނެ ކަމަށް ވެސް ބިލުގައި ބަޔާންކޮށްފައިވެ އެވެ.
ތައުލީމީ ގާނޫނު މިހާރު އޮންނަ ގޮތުން އަސާސީ ތައުލީމު ފުރިހަމަކުރުމަކީ ކޮންމެ ކުއްޖެއްގެ ވެސް ހައްގެކެވެ. އަދި ކުދިން ސްކޫލަށް ފޮނުވުމަކީ މައިންބަފައިންގެ މައްޗަށް ލާޒިމު ކަމެކެވެ.
ނަމަވެސް ބައެއް އާންމުންނާއި ސިޔާސީ ފަރާތްތަކުން އަންނަނީ މި ބަދަލުގެ ސަބަބުން ކުދިން ސްކޫލަށް ނުފޮނުވައި ގޭގައި ބޭތިއްބުމަށް ހިތްވަރު ލިބިދާނެ ކަމަށް ބުނެ ކަންބޮޑުވުން ފާޅުކުރަމުންނެވެ. ހާއްސަކޮށް ހަރުކަށި ފިކުރުގެ މީހުން ކުދިން ސްކޫލަށް ނުފޮނުވައި ގޭގައި ބައިތިއްބަން މި ބިލުގެ ބޭނުން ހިފާފާނެ ކަމުގެ ބިރު އޮތް ކަމަށް ގިނަ ބަޔަކު ދެކެ އެވެ.
އިދިކޮޅުގެ މި ކަންބޮޑުވުންތައް ހުރި ނަމަވެސް ސަރުކާރު ހިންގާ ޕީއެންސީގެ މެންބަރުން ވަނީ މި އިސްލާހު ގެންނަން ޖެހޭ ކަމަށް ވިދާޅުވެފަ އެވެ. އެ މެންބަރުން ފާހަގަކުރެއްވި ގޮތުގައި މިއީ ނުކުޅެދުންތެރިކަން ހުންނަ ކުދިންނާއި، ބަލިވެއިންނަ ކުދިން އަދި އެކްސިޑެންޓުތަކާ ގުޅިގެން ހާއްސަ ހާލަތްތައް ދިމާވާ ކުދިންނަށް ވެސް ކިޔެވުމުގެ ފުރުސަތު ފަހިކޮށްދޭން ޖެހޭ މުހިންމު ބަދަލެކެވެ.
