އަވައްޓެރި އިންޑިއާ އާއި ޕާކިސްތާނާ ދެމެދު އޮތް ނުތަނަވަސްކަމުގެ ތެރެއަށް ރައީސް މުހައްމަދު މުއިއްޒު ދިވެހިރާއްޖެ ވައްދައިފި ކަމަށް އިދިކޮޅު އެމްޑީޕީގެ ޗެއާޕާސަން ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އައްޑޫގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ނަޝީދު ވިދާޅުވީ މިދިޔަ ހަފުތާގައި މުއިއްޒު ޕާކިސްތާނަށް ވަޑައިގެންނެވީ "ބައްލަވައިލެއްވުމެއް ނެތި" ކަމަށެވެ.
"ކުދި ގައުމުތައް، ހާއްސަކޮށް ދިވެހިރާއްޖެ ފަދަ ކުދި ގައުމުތަކަށް ދިމާވާނެ ނުރައްކާތެރިކަން ބޮޑު އިރުގައި، ރައީސް މުއިއްޒު ބައްލަވައިލުމެއް ނެތި ޕާކިސްތާނަށް ވަޑައިގެން އަނެއްކާ ދިވެހިރާއްޖެ އިންޑިއާ އާއި ޕާކިސްތާނުގެ ދެ ބަސްވުންތަކުގެ ތެރެއަށް ގެންނަވައިފި،" ނަޝީދު ވިދާޅުވި އެވެ.
ރާއްޖެ އާއި ޕާކިސްތާނުގެ ސަބަބުން އިންޑިއާއަށް ނުރައްކާވެދާނެ ކަމަށް އެ ގައުމަށް ހީވާ ނަމަ އެކަމުގެ ގެއްލުން ރާއްޖެއަށް ބޮޑުވާނެ ކަމަށް ވެސް ނަޝީދު ވިދާޅުވި އެވެ.
"މިއީ ދިވެހިރާއްޖޭގެ ސަލާމަތާއި ރައްކާތެރިކަމަށް ހުރި ވަރަށް ބޮޑު ގޮންޖެހުމެއް. އިންޑިއާއަށް އެމީހުންގެ ސަލާމަތާއި ރައްކާތެރިކަން ގެއްލޭކަމަށް ފެންނަ ކަމަށް ވަނީ ވިއްޔާ އެއީ ދިވެހިރާއްޖެއަށް އޭގެން ވަރަށް ހިތި އަސަރެއް ކުރާނެ ކަމެއް،" އެމަނިކުފާނު ވިދާޅުވި އެވެ.
މުއިއްޒުގެ ޕާކިސްތާނު ދަތުރާމެދު އިންޑިއާގެ އެކްސްޓާނަލް އެފެއާޒް މިނިސްޓްރީން ވަނީ ހުކުރު ދުވަހު ކަންބޮޑުވުން ފާޅުކޮށްފަ އެވެ. ހުކުރު ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އެކްސްޓާނަލް އެފެއާޒް މިނިސްޓްރީގެ ތަރުޖަމާނު ރަންދީރު ޖައިސްވާލް، ރާއްޖެ އާއި ޕާކިސްތާނުގެ ގުޅުން އިންޑިއާއިން ވަރަށް ކައިރިން ބަލަމުންދާ ކަމަށެވެ.
"ދެ ގައުމެއްގެ މެދުގައި އެގްރިމެންޓުތަކެއްގައި ސޮއި ކުރި ވާހަކަ ބުނެފި. އެ ކަންކަން އަހަރުމެން މި ދަނީ ވަރަށް ގާތު ބަލަމުން އަދި އެކަމާ ގުޅިގެން އަޅަންޖެހޭ އެއްވެސް ފިޔަވަޅެއް އަޅަންޖެހެންޏާ އަޅާނެ،" ހިންދީ ބަހުން ވާހަކަ ދައްކަވަމުން ޖައިސްވާލް ވިދާޅުވި އެވެ.
ރައީސް މުއިއްޒު ޕާކިސްތާނަށް ފުރަމާނަ ދަތުރެއް ކުރެއްވީ އޮކްޓޯބަރު 20 އިން 23 އަށެވެ. އެ ދަތުރުގައި ރާއްޖެއިން ވަނީ ޕާކިސްތާނާއެކު 20 އެމްއޯޔޫއެއްގައި ސޮއިކޮށްފަ އެވެ. އަދި ޕާކިސްތާނުން ވަނީ ކަޝްމީރާ ގުޅޭ ގޮތުން އެ ގައުމުން ގެންގުޅޭ ސްޓޭންޑު ރައީސް މުއިއްޒަށް ސާފުކޮށްދެއްވައިފަ އެވެ.
ޕާކިސްތާނަށް ކުރެއްވި ދަތުރުގައި މުއިއްޒު ވަނީ އެ ގައުމުގެ ބޮޑުވަޒީރު ޝެހްބާޒް ޝަރީފްއާ ބައްދަލުކުރައްވާފަ އެވެ. އަދި ޕާކިސްތާނުގެ ޗީފް އޮފް ޑިފެންސް ފޯސް ފީލްޑް މާޝަލް ސައްޔިދު އަހުމަދު މުނީރުއާ ވެސް ރައީސް ބައްދަލު ކުރެއްވި އެވެ.
މުއިއްޒު ވެރިކަމަށް ވަޑައިގެންނެވި ފަހުން އިންޑިއާއިން ވަނީ 1.5 ބިލިއަން ޑޮލަރުގެ ލޯނާއި ކްރެޑިޓް ފެސިލިޓީސް ރާއްޖެއަށް ފޯރުކޮށްދީފަ އެވެ. އަދި އޭގެ އިތުރުން ރާއްޖެއިން ވިއްކި 200 މިލިއަން ޑޮލަރުގެ ޓީ-ބިލުގެ އިންޓްރެސްޓަށްވާ 42.8 މިލިއަން ޑޮލަރު ދައްކައިދިނީ ވެސް އިންޑިއާއިންނެވެ.
