ވެރިކަމުގައި 10،000 ވިޔަފާރިވެރިން އުފައްދައި، ރައްޔިތުންނަށް މާލީ މިނިވަންކަން ހޯދައިދިނުމަކީ އަމާޒެއް ކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް މިއަދު ވިދާޅުވެއްޖެ އެވެ.
އައްޑޫ ސިޓީގައި ކުރިއަށްގެންދިޔަ ބޮޑު ބަދަލު ވޯކްޝޮޕްގައި ވާހަކަދައްކަވަމުން ފައްޔާޒް ވިދާޅުވީ އޭނާގެ ވެރިކަމެއްގައި ކުރިއަށްގެންދާނެ އެންމެ ބޮޑު މެގަ ޕްރޮޖެކްޓަކަށްވާނީ 10،000 ވިޔަފާރިވެރިން އުފެއްދުން ކަމަށާއި އެކަމާ ގުޅިގެން ހިޔާލުތައް ދެއްވުމަށް އެދޭ ކަމަށެވެ.
"އަޅުގަނޑުގެ މެގަ ޕްރޮޖެކްޓަކަށް ވާނީ ދިވެހިރާއްޖޭގައި 10،000 ވިޔަފާރިވެރިން އުފެއްދުން. ބްރިޖެއް ނޫން. އެހެން ކަމެއް ނޫން. އެހެންވީމަ އަޅުގަނޑު ވަރަށް ބޮޑަށް އެދެން އެ އޭންގަލުންވެސް ތިބޭފުޅުން ވިސްނާފައި އަޅުގަނޑުމެންނާ ހިސާބަށް ހިޔާލުތަކެއް ދެއްވުން،" ވޯކްޝޮޕްގައި ވާހަކަދައްކަވަމުން ފައްޔާޒް ވިދާޅުވި އެވެ.
އެމްޑީޕީގެ ރިޔާސީ ޕްރައިމަރީގައި ވާދަކުރައްވާކަން އިއުލާންކުރައްވާފައިވާ ފައްޔާޒް ވިދާޅުވީ އޭނާ ބޭނުންވަނީ ވަޒީފާތަކުން ރައްޔިތުން މިނިވަންކޮށް، މާލީގޮތުން މިނިވަންކަން ދިނުމަށް ކަމަށެވެ. އެއީ ބައެއް ފަހަރު ސިޔާސީ ގޮތުން ވަޒީފާ ގެއްލުމުގެ ފުރުސަތުވެސް އޮންނާތީ ކަމަށް އޭނާ ވިދާޅުވި އެވެ.
"އަޅުގަނޑު މިދައްކަނީ ވަޒީފާގެ ވާހަކައެއް ނޫން. އަޅުގަނޑު މިދައްކަނީ ވަޒީފާއިން ތިބޭފުޅުން މިނިވަންކުރާ ވާހަކަ. ސަރުކާރެއްގެ ފަސް އަހަރު ވަޒީފާ މި އޮންނަނީ. އޭގައި ވެސް އޭރެއްގެ އޮތް ސަރުކާރަކާއި، އަމިއްލަ ޕާޓީ ކަމުގައިވިޔަސް ޕާޓީއާ ހިތްހަމަ ނުޖެހޭ އިރެއްގައި ވަޒީފާ ގެއްލުމުގެ ފުރުސަތު އެބަ އޮވޭ. މިހާރު ވެއްޖެއްޔާ،" ފައްޔާޒް ވިދާޅުވި އެވެ.
"އަޅުގަނޑުގެ ބޭނުމަކީ އަޅުގަނޑުމެންނަށް ފުރުސަތު ލިބިއްޖެ ކަމަށްވަންޏާ ތިބޭފުޅުން މިނިވަންކުރުން. މާލީ މިނިވަންކަން ތިބޭފުޅުންނާ ހިސާބަށް ގެނައުން."
މީގެއިތުރުން ފައްޔާޒް ވިދާޅުވީ ކޮންމެ ރަށެއްގައި ހުރި އިގްތިސާދީ ފުރުސަތުތައް ބަލާފައި، އެކަމަށް އަމިއްލައަށް މަސައްކަތްކުރަން ބޭނުންވާ މީހުންނަށް ބަޖެޓުން ބޮޑުބައެއް ހޭދަކޮށް އެކި ގޮތްގޮތުން އެހީތެރިކަން ފޯރުކޮށްދިނުމަކީ އަމާޒެއް ކަމަށެވެ.
ފައްޔާޒް އައްޑޫ ސިޓީއަށް ކުރައްވާ ދަތުރަކީ ރިޔާސީ ޕްރައިމަރީއަށް ތާއީދު ހޯއްދެވުމަށް ކުރައްވަމުން ގެންދަވާ ދަތުރެކެވެ. މި ދަތުރުގައި އައްޑޫގެ އެކި ރަށްތަކަށް ޒިޔާރަތްކޮށް ދޮރުން ދޮރަށް ހަރަކާތްވެސް ދަނީ ހިންގަމުންނެވެ.
