ރައްޔިތުންގެ މަޖިލީހުން ކުރާނެ މަސައްކަތެއް އަދި ސަރުކާރަށް ނެރެވުނު ނަތީޖާއެއް ނެތްއިރު، މަޖިލީހުގެ ރައީސް އާއި ވަޒީރުންގެ މުސާރަ ބޮޑުކުރަން ނިންމި ނިންމުމަކީ ދިވެހި ރައްޔިތުންނަށް ކުރި ބޮޑު މަލާމާތެއް ކަމަށް އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.
ފައްޔާޒު ރޭ "އެކްސް" ގައި ކުރެއްވި ޕޯސްޓެއްގައި ވިދާޅުވީ މިހާރު ހިނގަމުންދާ 20 ވަނަ ރައްޔިތުންގެ މަޖިލީހަށްވުރެ ދަށު ދަރަޖައިގެ މަޖިލީހެއް އަދި ނާންނަ ކަމަށެވެ. އަދި މަޖިލީހުން އެ ނިންމި ނިންމުމަކީ ރައްޔިތުންނަށް ކުރި ބޮޑު މަލާމާތެއްގެ ގޮތުގައި އޭނާ ސިފަކުރެއްވި އެވެ.
ބާޒާރުގައި ތަކެތީގެ އަގުތައް އުފުލި، އެތައް ރައްޔިތުންނެއް ދިރިއުޅުމުގެ ބޮޑު ދަތިކަމެއްގައި އުޅެމުންދާ ވަގުތެއްކަން ފާހަގަކުރައްވައި ފައްޔާޒު ވަނީ ސަރުކާރާއި މަޖިލީހަށް ވަރަށް ބޮޑަށް ފާޑުވިދާޅުވެފަ އެވެ.
"ތަކެތީގެ އަގުތައް އުފުލި އެތައް ބަޔަކު ދަތީގައި އުޅެމުންދާ މި ދަނޑިވަޅުގައި މިއީތޯ ނުކުރެވި އޮތް ކަމަކީ؟" ފައްޔާޒު އުފެއްދެވި އެވެ.
ރައްޔިތުންގެ މަޖިލީހުގެ ރައީސްއަށް މިހާރު އޮންނަގޮތުން މުސާރަ އާއި އިނާޔަތްތަކާއެކު ލިބެނީ 73،000ރ. އެވެ. ސަބަބަކީ މަޖިލީހުގެ ރައީސްއަށް ކޮމިޓީތަކުގައި ބައިވެރި ނުވެވޭތީ އެވެ.
ރައްޔިތުންގެ މަޖިލީހުގެ 70 ޕަސެންޓު ކޮމިޓީތަކުގައި ބައިވެރިވާ މެންބަރުންނަށް 10،000ރ. އެލަވެންސެއްގެ ގޮތުގައި ލިބެ އެވެ. އަދި، 75 ޕަސެންޓަށްވުރެ މަތިން ކޮމިޓީތަކަށް ހާޒިރުވެއްޖެ ނަމަ، 20،000ރ. ގެ އެލަވެންސެއް ލިބެ އެވެ.
ކޮމިޓީ އެލަވަންސާއެކު މަޖިލީހުގެ ނައިބުރައީސްއަށް މިހާރު ގަވާއިދު އޮންނަގޮތުން 91،000ރ. ލިބެ އެވެ.
އެހެންކަމުން، މާލިއްޔަތު ކޮމިޓީން އިއްޔެ ފާސްކުރީ މަޖިލީހުގެ ރައީސްއަށް 22،000ރ. ގެ އިތުރު އެލަވެންސްއެއް ދިނުމަށެވެ. އެ ބަދަލާއެކު، މަޖިލީހުގެ ރައީސްއަށް މުސާރަ އާއި އިނާޔަތްތަކާއެކު ކޮންމެ މަހަކު 95،000ރ. ލިބިވަޑައިގަންނަވާނެ އެވެ.
މިނިސްޓަރުންނަށް ދޭ ޑްރައިވާސް އެލަވެންސް ވެސް ބޮޑުކުރަން އިއްޔެ ނިންމި އެވެ. މިނިސްޓަރުންނަށް ޑްރައިވާސް އެލަވެންސް ނުހިމަނައި މުސާރަ އާއި އިނާޔަތްތަކާއެކު މިހާރު ލިބެނީ 58،500ރ. އެވެ. ޑްރައިވާސް އެލަވެންސް ހިމެނުމުން މިނިސްޓަރުންނަށް 66،000ރ. ކޮންމެ މަހަކު ލިބެ އެވެ.
ޑްރައިވާސް އެލަވެންސްގެ ތެރޭގައި މިހާރު ހިމެނެނީ ޕެޓްރޯލް އެލަވެންސްގެ ގޮތުގައި ލިބޭ 1000ރ. އާއި ޑްރައިވިން އެލަވެންސްގެ ގޮތުގައި ލިބޭ 6500ރ. އާ އެއްކޮށް ޖުމުލަ 7500ރ. އެވެ.
މާލިއްޔަތު ކޮމިޓީން އިއްޔެ ފާސްކޮށްފައި ވަނީ ޕެޓްރޯލް އެލަވެންސްގެ ގޮތުގައި 2000ރ. ޑްރައިވަރުންގެ މުސާރައިގެ ގޮތުގައި 12،000ރ. އަދި ޑްރައިވަރުންގެ ލިވިން އެލަވެންސްގެ ގޮތުގައި 3000ރ. މިނިސްޓަރުންނަށް ދިނުމަށެވެ. އެ ބަދަލާއެކު ސަރުކާރު މިނިސްޓަރުންގެ މުސާރަ އާއި އިނާޔަތްތަކާއެކު 75،500ރ. ލިބޭނެ އެވެ.
