އިދިކޮޅު މައި ޕާޓީ، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ރިޔާސީ ޕްރައިމަރީގައި ކުޅުދުއްފުށި ސިޓީގެ މޭޔަރު މުހައްމަދު އާތިފް އެ ޕާޓީގެ ކުރީގެ ޗެއާޕާސަން ފައްޔާޒް އިސްމާއިލްއަށް ތާއީދުކޮށް ކެމްޕެއިނާ މިއަދު ގުޅިއްޖެ އެވެ.
ފައްޔާޒް އައްޑޫއަށް ކުރައްވަމުން ގެންދަވާ ދަތުރާ އާތިފް ގުޅިވަޑައިގެން އަންނަނީ ފައްޔާޒްއާއެކު ދޮރުން ދޮރަށް ހަރަކާތުގައި ބައިވެރިވެވަޑައިގަންނަވަމުންނެވެ.
ކުޅުދުއްފުށީ މޭޔަރަކަށް ދެވަނަ ދައުރަކަށް މި އަހަރު އިންތިހާބުވެވަޑައިގެންނެވި އާތިފްއަކީ ލޯކަލް ގަވަމަންޓް އޮތޯރިޓީ (އެލްޖީއޭ) ގެ ބޯޑުގައި ސިޓީތައް ތަމްސީލުކުރައްވާ މެންބަރެވެ.
އަންނަ އަހަރު ބާއްވާ އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އެންމެ ފުރަތަމަ އިއުލާންކުރެއްވީ ފައްޔާޒެވެ. އެގޮތުން އޭނާގެ ވެރިކަމެއްގައި ގެންނަން ބޭނުންވާ ނިޒާމީ ބަދަލުތަކާއި ކުރަން ރާވާފައިހުރި ބައެއް ކަންކަން ދަނީ ހާމަކުރައްވަމުންނެވެ.
ފައްޔާޒްގެ އިތުރުން ރިޔާސީ ޕްރައިމަރީގައި ވާދަކުރައްވާނެކަން ދެން އިއުލާންކުރައްވާފައި ވަނީ އެމްޑީޕީގެ ކުރީގެ ރައީސް އަބްދުﷲ ޝާހިދު އާއި ހުޅުމާލެ ދެކުނު ދާއިރާގެ މެންބަރު ޑރ. އަހްމަދު ޝަމްހީދު އަދި ކުރީގެ ނައިބުރައީސް ފައިސަލް ނަސީމް އެވެ.
