ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭގައި އިމާރާތްކޮށްފައިވާ ފްލެޓުތަކުގެ ތެރެއިން ކުލި ނުދައްކައިގެން ހުސްކުރަން އެންގި ދެ ފްލެޓުގެ ތެރެއިން އެއް ފްލެޓަކުން ކުލި ދައްކަން އެއްބަސްވެ, އަނެއް ފްލެޓުގެ ވެރިފަރާތުން ކުލި ދައްކަން ދެކޮޅު ހެދުމުން އެ މައްސަލަ ކޯޓަށް ހުށަހަޅަން ނިންމައިފި އެވެ.
އެއްބަސްވުމާ އެއްގޮތަށް ގަވާއިދުން ކުލި ނުދައްކާތީ އެ ދެ ފްލެޓް ހުސްކުރަން އެފްޑީސީން އެންގީ މި ހިނގާ އޮކްޓޯބަރު 14، ގަ އެވެ. އެ ދެ ފްލެޓުގެ "ޕޯޓަލް އެކްސެސް" ކަނޑާލައި، ނޯޓިސް ލިބޭތާ 15 ދުވަހުގެ ތެރޭގައި ތަން ހުސްކުރަން އެފްޑީސީ އިން އެންގި އެވެ.
މި މައްސަލައާ ގުޅިގެން "މިހާރު" ނޫހަށް ދެއްވި އިންޓަވިއުއެއްގައި އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވީ ފްލެޓު ހުސްކުރަން އެންގުމުން އެކަކު ވަނީ ނުދައްކާ ހުރި ކުއްޔަށްވާ ފައިސާ އެއްކޮށް ދެއްކުމަށް އެއްބަސްވެފައި ކަމަށެވެ.
ނަމަވެސް، އަނެއް ފްލެޓުގެ ވެރިފަރާތުން ކުލި ދެއްކުމަށް ދެކޮޅު ހަދާފައިވާތީ، އެތަން ހުސްކުރަން އެންގުމަށްޓަކައި ކޯޓަށް މައްސަލަ ހުށަހަޅަން ނިންމާފައިވާ ކަމަށް އޭނާ ވިދާޅުވި އެވެ. ހަމްދާން ވިދާޅުވި ގޮތުގައި ކުލި ނުދައްކާތީ ހުސްކުރަން އެންގި ދެ ފްލެޓަކީ ވެސް އެތަނަށް މީހުން ވަތް ފަހުން އެއްގޮތަކަށް ވެސް ކުލި ނުދައްކާ ދިރިއުޅެމުން އައި ބަޔެކެވެ.
ހުޅުމާލޭގައި އިމާރާތްކޮށްފައިވާ އަމާން ޓަވަރުތަކުގައި މީހުން ދިރިއުޅެން ފެށީ މި އަހަރުގެ ކުރީކޮޅު އެވެ. އެތަނުގައި ދިރިއުޅެމުން ދިޔަ ނަމަވެސް ބައެއް ފަރާތްތަކުން ގަވާއިދުން ފްލެޓަށް ކުލި ނުދައްކާ މައްސަލަ ވަނީ ބޮޑުވެފަ އެވެ.
އެހެންނަމަވެސް، ދެ ފްލެޓެއް ހުސްކުރަން އެފްޑީސީން ފިޔަވަޅު އެޅުމާ ގުޅިގެން، ކުލި ނުދައްކާ އުޅެމުންދިޔަ އެހެން ބައެއް މީހުން ވެސް މިހާރު ކުލި ދައްކަން ފެށުމަށް އެ ކޯޕަރޭޝަނަށް ގުޅަމުންދާ ކަމަށް އެފްޑީސީން މައުލޫމާތުދެ އެވެ.
މިދިޔަ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ދޫކުރި ފަހި ދިރިއުޅުން ފްލެޓުތަކުގެ ކުލީގެ ގޮތުގައި އެ ސަރުކާރުން ކަނޑައަޅާފައި އޮތީ މެއިންޓެނެންސް ފީ އާއެކު، ދެ ކޮޓަރީގެ އެޕާޓުމެންޓަކަށް 6000ރ. އަދި ތިން ކޮޓަރީގެ އެޕާޓުމެންޓަކަށް 8000ރ. އެވެ.
ނަމަވެސް، މި ސަރުކާރުން ވަނީ ކުއްޔަށް ބަދަލު ގެނެސް، މެއިންޓެނެންސް ފީ އާއެކު، ދެ ކޮޓަރީގެ އެޕާޓުމެންޓަކަށް 7000ރ. އަދި ތިން ކޮޓަރީގެ އެޕާޓުމެންޓަކަށް 10،000ރ. ދައްކަން ޖެހޭ ގޮތަށް ހަދައިފަ އެވެ.
