ހުޅުމާލެ ފޭސް ދޭއްގައި ހުންނަ އަމާން އުދަރެސް ޓަވަރަކުން މީހަކު ވެއްޓި މަރުވެއްޖެ އެވެ.
މީޑިއާތަކަށް ފުލުހުން ފޮނުވި މެސެޖެއްގައި ބުނީ މީހަކު ވެއްޓިފައި ވަނީ އަމާން އުދަރެސް ޓަވަރު އަށަކުން ކަމަށެވެ. އިތުރު ތަފުސީލެއް ހާމައެއް ނުކުރެ އެވެ.
މި ނޫހަށް މައުލޫމާތު ލިބިފައިވާ ގޮތުގައި ވެއްޓި މަރުވެފައި ވަނީ ފިރިހެނެކެވެ. އެ މީހާގެ ހަށިގަނޑު ވަރަށް ބޮޑަށް ޒަހަމުވެފައިވާ ކަމަށް މި ނޫހަށް އެނގިފައިވެ އެވެ. އެނގިފައިވާ ގޮތުގައި އެ މީހާ ވެއްޓިފައި ވަނީ އެ ޓަވަރުގެ 15 ވަނަ ފަންގިފިލާއިންނެވެ.
އެ ސަރަހައްދުގައި ގިނަ އަދަދެއްގެ ފުލުހުން ދަނީ ހަރަކާތްތެރިވަމުންނެވެ. އެކަމާ ބެހޭ އިތުރު ތަފުސީލު ފަހުން ހާމަކުރާނެ ކަމަށް ފުލުހުން ބުންޏެވެ.
މި ފަހަކަށް އައިސް ހުޅުމޭލެ ފޭސް ދޭއްގެ ޓަވަރުތަކުން މީހުން ވެއްޓުމުގެ ހާދިސާތައް ވަނީ ވަރަށް ބޮޑަށް އިތުރުވެފަ އެވެ. އެފަދަ ހާދިސާތައް މަދުކުރުމަށްޓަކައި އަމާން ފްލެޓުތަކުގެ ކުޑަދޮރުތަކުގައި ދަގަނޑު ގްރިލް ޖެހުމުގެ މަސައްކަތް އެފްޑީސީން ވަނީ ފަށައިފަ އެވެ.
